“Edinam Ererimbot Emi ke Okpụhọrede”

“Ndọhọ mbufo, nditọ-ete, nte, ẹsịbe ini omụhọ.”—1 CORINTH 7:29.

1, 2. Mme ukpụhọde ewe ke afo okụt ke eyouwem fo?

 MME ukpụhọde ewe ke afo okụt ke eyouwem fo? Nte afo emekeme ndisiak ndusụk mmọ? Ke uwụtn̄kpọ, ẹmenam n̄kọri ke ifiọk ibọkusọbọ. Ke ntak ndụn̄ọde oro ẹnamde ke afan̄ oro, ke ndusụk idụt ibat isua oro mme owo ẹkemede ndidu uwem ke ẹbaharede ukem ukem omoto se isụhọrede ikan isua 50 oro enye ekedide ke ntọn̄ọ ntọn̄ọ ọyọhọ isua ikie 20 esịm se iwakde ibe isua 70 mfịn! N̄ko, kere ban̄a mme usụn̄ emi nnyịn ibọde ufọn ito edida ekebe ukopikọ, ekebe ndise, urụk ukopikọ oro ẹkamade-kama ẹsan̄a, ye ukwak unọ etop nnam n̄kpọ nte ọfọnde. N̄wọrọnda n̄kpọ efen edi n̄kọri oro ẹnamde ke unọ ukpep, ke ukaisan̄, ye ke edikpeme unen mme owo, ndien kpukpru emi ẹfori uwem ediwak miliọn owo.

² Nte ededi, idịghe kpukpru ukpụhọde ẹfọn. Owo ikemeke ndifụmi mme akama-nsobo utịp ẹtode ubiatibet, mbiara ido uwem, edida n̄kpọsọn̄ ibọk ke idiọk usụn̄, usiondọ, ekọmurua n̄kpọ ndidọk, ye mme edinam oyomonsia emi ẹkade-ka iso ndikọri. Ke usụn̄ ekededi, eyedi afo eyenyịme ye se apostle Paul ekewetde ke anyan ini mi ete: “Edinam ererimbot emi ke okpụhọrede.”—1 Corinth 7:31, NW.

3. Nso ke ikọ Paul ọkọwọrọ ke ini enye ekewetde ete ke “edinam ererimbot emi ke okpụhọrede”?

³ Ke ini Paul eketịn̄de ikọ oro, enye ekemen ererimbot odomo ye itie edinam. Mbon edinam emi ẹdude ke itie edinam oro—kpa mme ọwọrọiso owo ke ukara, ke ido ukpono, ye ke  obio—ẹsiwọrọ ẹdi ẹdinam se anade mmọ kiet kiet ẹnam, ndien ekem ẹkpọn̄ itie edinam ẹnọ mbon en̄wen. Emi amaka iso ke ediwak isua ikie. Ke eset, udịm ubọn̄ kiet ama esikara ke ediwak iduọk isua—idem ke ediwak isua ikie—ndien mme ukpụhọde ẹkesida itie sụn̄sụn̄. Idịghe aba ntre mfịn emi n̄kpọ ekemede ndikpụhọde ke ini ẹwotde andikara! Ih, ke mme ntịme ntịme ini emi, nnyịn ifiọkke se iditịbede n̄kpọn̄.

4. (a) Nso ekikere emi adade ukem ukem ke oyom mme Christian ẹnyene ẹban̄a mme n̄kpọntịbe ererimbot? (b) Ewe uyarade iba oro ẹnamde ẹnịm ke nnyịn ididụn̄ọrede idahaemi?

⁴ Edieke ererimbot edide itie edinam ndien mme adausụn̄ esie ẹdide mbon edinam, do mme Christian ẹdi mme andida nse. * Nte ededi, sia ‘mîdịghe eke ererimbot,’ mmọ inen̄ekede idọn̄ enyịn ke se ẹnamde m̀mê ndikam nyom ndidiọn̄ọ mbon edinam. (John 17:16) Utu ke oro, mmọ ẹkam ẹnyene ọkpọsọn̄ udọn̄ ke mme n̄kpọ oro ẹwụtde ke edinam emi ke asan̄a ekpere utịt—akama-nsobo utịt—koro mmọ ẹfiọkde ke ana editịm n̄kpọ emi esịm utịt mbemiso Jehovah adade edinen obufa ererimbot oro nnyịn iketiede ibet ke anyan ini edi. * Ke ntre, ẹyak nnyịn idụn̄ọde uyarade iba oro ẹwụtde ke nnyịn idu uwem ke utịt ini ye nte ke obufa ererimbot ke asan̄a ekpere. Mmọ ẹdi (1) ubatini Bible ye (2) mme idaha ererimbot oro ẹkade-ka iso ndidiọk.—Matthew 24:21; 2 Peter 3:13.

Ẹyarade Ndịben̄kpọ ke Akpatre!

5. Nso idi “ini mme Gentile,” ndien ntak emi enye ebehede nnyịn?

⁵ Ubatini edi ukpepn̄kpọ aban̄ade ebuana oro ini enyenede ye mme n̄kpọntịbe. Jesus ama etịn̄ aban̄a ini oro mme adaiso ererimbot ẹdidide akpan mbon edinam ye unana Obio Ubọn̄ Abasi ndisịbe ndụk mbiọn̄ọ mmọ. Jesus okokot ini oro “ini mme Gentile.” (Luke 21:24) Ke utịt “ini” oro, Obio Ubọn̄ Abasi eke heaven ekenyene nditọn̄ọ ukara, ye Jesus nte enyene-unen Andikara esie. Akpa kan̄a, Jesus ekenyene ndibem iso n̄kara “ke otu mme asua [esie].” (Psalm 110:2) Ekem, nte Daniel 2:44 ọdọhọde, Obio Ubọn̄ oro “ayanuak onyụn̄ ama” kpukpru ukara owo, ndien enye ayada ke nsinsi.

6. Ini ewe ke “ini mme Gentile” ọkọtọn̄ọ, enye ekebịghi adan̄a didie, ndien ini ewe ke enye ekesịm utịt?

⁶ Ini ewe ke “ini mme Gentile” ekenyene ndisịm utịt man Obio Ubọn̄ Abasi ọtọn̄ọ ndikara? Ibọrọ emi ‘ẹkedịpde ẹnyụn̄ ẹnịmde mmọ seal ke esịt tutu esịm utịt ini,’ abuana ubatini Bible. (Daniel 12:9) Nte “ini” oro akasan̄ade ekpere, Jehovah ama ọtọn̄ọ ndinọ otu mme osụhọde-idem nditọ ukpepn̄kpọ Bible ibọrọ. Ye un̄wam spirit Abasi, mmọ ẹma ẹfiọk ke “ini mme Gentile” ọkọtọn̄ọ ke ini ẹkesobode Jerusalem ke 607 M.E.N. ye nte ke uniọn̄ “ini” oro ekedi isua 2,520. Mmọ ẹma ẹda emi ẹfiọk ke 1914 ekedi utịt “ini mme Gentile.” Mmọ n̄ko ẹma ẹdi ẹdifiọk nte ke 1914 ekedi ntọn̄ọ utịt editịm n̄kpọ emi. Nte eyen ukpepn̄kpọ Bible, ndi afo emekeme ndida N̄wed Abasi nnam an̄wan̄a nte ẹbatde ekesịm 1914? *

7. Mme itie N̄wed Abasi ewe ẹn̄wam nnyịn ndifiọk ntọn̄ọ, uniọn̄, ye utịt ini itiaba oro ẹtịn̄de ẹban̄a ke n̄wed Daniel?

⁷ Un̄wam kiet odu ke n̄wed Daniel. Sia Jehovah akadade Nebuchadnezzar, edidem Babylon ndisobo Jerusalem ke ntọn̄ọ “ini mme Gentile,” ke 607 M.E.N., Enye ama ada andikara oro ayarade nte ke mme Gentile ẹyekara ke ndamban̄a ini itiaba ye unana Abasi ndisịbe ndụk. (Ezekiel 21:26, 27; Daniel 4:16, 23-25) Ini itiaba oro ọniọn̄ adan̄a  didie? Nte Ediyarade 11:2, 3, ye Edi 12:6, 14 ẹdọhọde, ini ita ye ubak edi usen 1,260. Ntem, ana ini itiaba edi ntre utịm ikaba, m̀mê, edi usen 2,520. Ndi okụre ke oro? Baba, koro Jehovah ama ọnọ prọfet Ezekiel, emi okodude uwem ke ukem iduọk ini ye Daniel, ndausụn̄ ndisiak ndamban̄a ini oro, ete: “Mmenịm usen ke ibuot isua nnọ fi.” (Ezekiel 4:6) Ke ntre, ini itiaba ẹdi isua 2,520 ke uniọn̄. Ke itọn̄ọde ke 607 M.E.N. ibat isua 2,520, nnyịn imekeme ndibiere nte ke ini mme Gentile ẹkenyene ndisịm utịt ke 1914.

Ẹsọn̄ọ ke Idu ke “Utịt Ini”

8. Mme uyarade ewe ke afo ekeme ndisio n̄wụt ndisọn̄ọ nte ke mme idaha ẹtetịm ẹdiọk toto ke 1914?

⁸ Mme n̄kpọ oro ẹtịbede ke ererimbot ọtọn̄ọde ke 1914 ka iso ẹsọn̄ọ nte ke se nnyịn ifiọkde oro ẹtịn̄de ke enyọn̄ emi, oro ọkọn̄ọde ke ubatini Bible, enen. Jesus ke idemesie ama ọdọhọ ke ẹdida ekọn̄, akan̄, ye idiọk udọn̄ọ ẹdiọn̄ọ “akpatre ini eyo emi.” (Matthew 24:3-8; Ediyarade 6:2-8) Oro enen̄ede edi ntre toto ke 1914. Apostle Paul ama adian do ete ke akwa ukpụhọde oyodu ke nte mme owo ẹnamde n̄kpọ ye kiet eken. Nnyịn imenen̄ede ikụt mme ukpụhọde oro enye eketịn̄de aban̄a.—2 Timothy 3:1-5.

9. Nso ke mme anam-ndụn̄ọde ẹtịn̄ ẹban̄a mme idaha ererimbot toto ke 1914?

⁹ Ndi “edinam ererimbot emi” enen̄ede okpụhọde toto ke 1914? Ke n̄wed oro The Generation of 1914, Prọfesọ Robert Wohl ọdọhọ ete: “Mbon oro ẹkebọhọde ẹkọn̄ oro ikemeke-keme ndifre nte ke ererimbot kiet ama etre efen onyụn̄ ọtọn̄ọ ke August 1914.” Ke ọsọn̄ọde emi, Dr. Jorge A. Costa e Silva, emi edide adausụn̄ itieutom nsọn̄idem ekikere eke Esop Kaban̄a Nsọn̄idem Ererimbot, ekewet ete: “Nnyịn idu uwem ke ini emi mme n̄kpọ ẹkpụhọrede ata usọp usọp, osụn̄ọde ke anana-mbiet editịmede esịt ye mfịghe ke mbụk ubonowo.” Ndi afo omokụt emi?

10. Didie ke Bible esịn un̄wana kaban̄a ntak emi mme idaha ererimbot ẹkade-ka iso ndidiọk toto ke 1914?

¹⁰ Anie edi owo ubi emi edide ntak oro mme idaha ererimbot ẹkade-ka iso ndidiọk? Ediyarade 12:7-9 ayarade owo ubi emi: “Ekem [ekọn̄] etịbe ke heaven; Michael [Jesus Christ] ye mme angel esie ẹn̄wana ekọn̄ ye dragon [Satan kpa Devil]; dragon ye mme angel esie ẹnyụn̄ ẹn̄wana ekọn̄, edi mmọ ikanke. Ufan̄ inyụn̄ idụhe aba inọ mmọ ke heaven. Ndien ẹsio akwa dragon ẹduọk ke isọn̄, . . . andibian̄a ofụri ererimbot.” Ntre Satan kpa Devil edi ntak mfịna, ndien ndikosio enye ke heaven nduọk ke 1914 ọwọrọ “mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.”—Ediyarade 12:10, 12.

Nte Ẹdinamde Akpatre Edinam

11. (a) Mme usụn̄ ewe ke Satan ada ndibian̄a “ofụri ererimbot”? (b) Nso ke apostle Paul okodụri ntịn̄enyịn owụt nte Satan edinen̄erede anam?

¹¹ Sia ọdiọn̄ọde ete utịt imọ ke asan̄a ekpere,  toto ke 1914 Satan emenen̄ede esịn ukeme ndibian̄a “ofụri ererimbot.” Sia edide enye etubom abian̄a, Satan ke edịbe ada mme adaiso ke ererimbot ye mme etịbi-n̄kpọ-nnam, anam n̄kpọ nte akpan mbon edinam. (2 Timothy 3:13; 1 John 5:19) Utịtmbuba esie kiet edi ndibian̄a ubonowo nnyụn̄ nnam mmọ ẹkere ke usụn̄ edikara imọ ekeme ndida ata emem nsọk mmọ. Ke ofụri ofụri, mme owo ẹnyịme nsunsu ekikere esie emi koro mmọ isụk iduọkke idotenyịn kpa ye akpakịp uyarade oro ẹwụtde ke mme idaha ẹtetịm ẹdiọk. Apostle Paul ama ebem iso etịn̄ nte ke ẹyenen̄ede ẹkụt nsunsu ekikere Satan esisịt ini mbemiso ẹsobode editịm n̄kpọ emi ẹfep. Enye ekewet ete: “Ini mme owo ẹdọhọde ẹte, idu ke emem ye ifụre, kpa adan̄aoro ke nsobo abuat mmọ, nte emi uman abuatde n̄wan idịbi.”—1 Thessalonica 5:3; Ediyarade 16:13.

12. Nso n̄kaiso ukeme ke ẹsịn ndinam emem odu ke eyo nnyịn?

¹² Ke mme isua ndondo emi, mbon mbre ukara ẹmewak ndida ikọ oro “emem ye ifụre” ntịn̄ mban̄a nsio nsio ediomi owo. Mmọ ẹkekam ẹkot 1986 Isua Emem Ofụri Ererimbot, okposụkedi emi mîkedịghe ntre. Ndi utọ ukeme oro mme adaiso ererimbot ẹsịnde do edi ọyọhọ ọyọhọ edisu 1 Thessalonica 5:3, mîdịghe nte Paul eketịn̄ aban̄a akpan n̄kpọntịbe oro edikponde ke usụn̄ oro ofụri ererimbot ọfiọkde?

13. Ke ini Paul ekebemde iso etịn̄ aban̄a mfiori “emem ye ifụre,” enye ekemen nsobo oro editienede emi odomo ye nso, ndien nso ke nnyịn ikeme ndikpep nto emi?

¹³ Sia mme ntịn̄nnịm ikọ Bible ẹsiwakde nditịm n̄n̄wan̄a ke mmọ ẹma ẹkesu mîdịghe ke ini mmọ ẹsụk ẹsude, nnyịn inyene ndibet nse. Nte ededi, edemede nnyịn udọn̄ ndikụt nte ke Paul ekemen mbabuat nsobo oro editienede mfiori “emem ye ifụre” odomo ye ubiak uman oro n̄wan idịbi esikopde. Ke n̄kpọ nte ufan̄ ọfiọn̄ usụkkiet, n̄wan idịbi esidọdiọn̄ okop ke eyen ke ọkọri imọ ke idịbi. Enye ekeme ndikop nte oti atuakde eyen esie m̀mê ndikop nte enye ọwọn̄ọrede idem ke idịbi imọ. Eyen oro akam ekeme ndituak enye. Mme idiọn̄ọ emi ẹsitetịm ẹwụt idem tutu usen kiet n̄wan emi okop ata ọkpọsọn̄ ubiak, owụtde ke n̄kpọ oro ẹkedoride enyịn edisịm—emana eyen. Ntem, inamke n̄kpọ m̀mê mfiori “emem ye ifụre” edisan̄a didie osu, mfiori emi ayada esịm mbabuat ubiak ubiak n̄kpọntịbe oro edikamade inemesịt ke akpatre—kpa edisio idiọkido mfep ye ntọn̄ọ obufa editịm n̄kpọ.

14. Didie ke mme n̄kpọntịbe ini iso ẹdida itie, ẹsụn̄ọde ke nso?

¹⁴ Nsobo oro edide ke iso ayanam mme anam-akpanikọ Christian emi ẹdide mme andida nse, ẹkop ndịk. Akpa kan̄a, ndidem isọn̄ (ukara emi edide ubak esop Satan) ayadaha an̄wana ye mbon oro ẹnọde Akwa Babylon (ido ukpono emi n̄ko edide ubak esop Satan) ibetedem ẹnyụn̄ ẹsobo mmọ. (Ediyarade 17:1, 15-18) Ntem, ke mbuari, obio ubọn̄ Satan ayabahade ada an̄wana ye idemesie, ndien Satan idikemeke ndikpan emi nditịbe. (Matthew 12:25, 26) Jehovah eyesịn ke esịt ndidem isọn̄ ete ‘ẹnam uduak Imọ,’ oro edi, ndisobo mme asua esie oro ẹdide mbon ido ukpono mfep ke isọn̄. Ke ẹma ẹkesobo nsu nsu ido ukpono ẹfep, Jesus Christ ayada udịmekọn̄ esie eke heaven ọsọhi nyọhọ nsụhọ esop Satan—kpa ndutịm unyamurua ye ndutịm ukaraidem. Ke akpatre, ẹyemụm Satan ke idemesie ẹkọbi. Adan̄aoro, ikpehe ọyọduọ ndien edinam oro akakade iso ke anyan ini mi eyesịm utịt.—Ediyarade 16:14-16; 19:11-21; 20:1-3.

15, 16. Didie ke nditi nte ke “ẹsịbe ini omụhọ” okpotụk uwem nnyịn?

¹⁵ Ini ewe ke kpukpru n̄kpọ emi ẹditịbe? Nnyịn ifiọkke usen m̀mê hour. (Matthew 24:36) Edi, nnyịn imọfiọk ite ke “ẹsịbe ini omụhọ.” (1 Corinth 7:29) Do, edi akpan n̄kpọ ete nnyịn ida ini oro osụhọde inam n̄kpọ nte ọfọnde. Didie? Nte apostle Paul  anamde an̄wan̄a, ana nnyịn ‘idep ifet’ ito mme n̄kpọ oro mîdịghe ata akpan n̄kpọ ida inam mme n̄kpọ oro ẹnen̄erede ẹdi akpan n̄kpọ inyụn̄ inam usen kiet kiet enyene se ọwọrọde. Ntak-a? “Koro mme usen ẹdiọkde.” Ndien sia ‘ifiọkde se idide uduak Jehovah’ inọ nnyịn, nnyịn idibiatke ọsọn̄urua ekpri ini oro osụhọde.—Ephesus 5:15-17; 1 Peter 4:1-4.

¹⁶ Sia idiọn̄ọde ke nsobo ke ana ebet ofụri editịm n̄kpọ emi, didie ke emi okpotụk nnyịn ọkpọkpọ? Apostle Peter ekewet ke ufọn nnyịn ete: “Sia kpukpru n̄kpọ emi ẹdibiarade ntem, nso orụk owo ke mbufo ẹkpedi ke edisana ido ye ke uten̄e Abasi?” (2 Peter 3:11) Emi enen̄ede owụt orụk owo emi nnyịn ikpedide. Ke n̄kemuyo ye ọniọn̄ ọniọn̄ item Peter, oyom nnyịn (1) itịm ikpeme se inamde man ikụt ke edu uwem nnyịn asana ndien (2) man ikụt ite ke ifịk ifịk utom oro inamde inọ Jehovah kpukpru ini owụt ke nnyịn imenen̄ede ima enye.

17. Mme n̄kpọ etabi Satan ewe ke ana mme anam-akpanikọ Christian ẹka iso ẹkpeme ẹbiọn̄ọ?

¹⁷ Ima oro imade Abasi idiyakke nnyịn idian idem ye ererimbot ke ntak mme n̄kpọ etabi esie. Ke ikerede iban̄a se inade ibet editịm n̄kpọ emi, edi n̄kpọndịk nnyịn ndiyak etabi etabi usụn̄ uwem uyom inemesịt eke ererimbot emi odụri nnyịn ada. Okposụkedi nnyịn idude uwem inyụn̄ inamde utom ke ererimbot, nnyịn ikpenyene ndinam ọniọn̄ ọniọn̄ item oro ọdọhọde ikûda ererimbot inam n̄kpọ ọyọhọ ọyọhọ. (1 Corinth 7:31, NW) Ke akpanikọ, ana nnyịn inam ofụri ukeme nnyịn man ikpeme ibiọn̄ọ edidi se nsunsu ekikere ererimbot emi otụnde usụn̄. Ererimbot emi idikemeke ndikọk mme mfịna esie. Enye idikaha iso ntem ke nsinsi. Ntak ikemede nditịm nnịm emi? Koro Ikọ Abasi eke odudu spirit ọdọhọ ntem ete: “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:17.

Mfọnn̄kan Idaha ke Edi!

18, 19. Mme ukpụhọde ewe ke afo odori enyịn ndikụt ke obufa ererimbot, ndien ntak emi mme ukpụhọde emi ẹdidotde ye edibet oro ikebetde?

¹⁸ Ke mîbịghike, Jehovah oyosobo Satan ye mbon oro ẹnọde Satan ibetedem. Ke oro ebede, ye un̄wam Abasi, mme anam-akpanikọ andibọhọ utịt editịm n̄kpọ emi ẹyetọn̄ọ ndinam mme ukpụhọde oro ẹdibịghide ke nsinsi. Ekọn̄ idibiatke aba ererimbot emi; Abasi ayanam “ekọn̄ etre tutu esịm ke utịt ekondo.” (Psalm 46:9) Udia idinanake aba koro “uwak ibokpot ẹyedu ke isọn̄.” (Psalm 72:16) Ufọk-n̄kpọkọbi, itieutom mme bodisi, mme udọn̄ọ ẹmende ẹto idan̄, mme adaiso ke unyam n̄kpọsọn̄ ibọk, mme esop usiondọ, mme ikpe isọn, ye mme edinam oyomonsia ididụhe aba.—Psalm 37:29; Isaiah 33:24; Ediyarade 21:3-5.

¹⁹ Ediwak biliọn owo ẹyeset ẹwọn̄ọ ke udi—kpa mbon edinam efen efen—ẹdi ẹdidu ke isọn̄. Nso idara ididu ntem nte emana kiet edifiakde edidiana ye emana efen ndien mbonima emi ẹma ẹkedian̄ade ke anyan ini ẹfatde kiet eken ẹkama! Ke akpatre, kpukpru owo ẹdituak ibuot ẹnọ Jehovah. (Ediyarade 5:13) Ke ẹma ẹkenam kpukpru ukpụhọde emi ẹma, obufa edinam ọyọtọn̄ọ ke paradise emi editarade esịm ofụri isọn̄. Editie fi ke idem didie nte esede akanade paradise oro? Nte eyịghe mîdụhe, oyonụk fi ndidọhọ, ‘Mma ntie mbet emi ke anyan ini, ndien se n̄kụtde emi omodot ye edibet oro!’

[Mme Ikọ idakisọn̄]

Didie ke Afo Ọkpọbọrọ?

• Didie ke ikọ apostle Paul oro nte ke “edinam ererimbot emi ke okpụhọrede” osu ke eyo nnyịn?

• Didie ke ubatini Bible owụt ini emi “ini mme Gentile” ẹkesịmde utịt?

• Didie ke mme idaha ererimbot oro ẹkade-ka iso ndikpụhọde ẹsọn̄ọ nte ke 1914 ekedi ntọn̄ọ “utịt ini”?

• Didie ke ọkpọikọ oro nte ke “ẹsịbe ini omụhọ” okpotụk nnyịn?

[Mme Mbụme Ukpepn̄kpọ]

[Ndise ke page 20]

Ke akpatre—ẹyarade ndịben̄kpọ!