“Uyom Mmọ Ọmọwọrọ ke Ofụri Isọn̄”

‘Ẹnam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit.’—MATTHEW 28:19.

1, 2. (a) Nso utom ke Jesus ọkọdọn̄ mme mbet esie? (b) Ntak emi mme Christian akpa isua ikie ẹkekemede ndinam ekese ntre?

 ESISỊT ini mbemiso enye ọkọdọkde heaven, Jesus ama ọdọn̄ mme mbet esie utom. Enye ọkọdọhọ mmọ ete: ‘Ẹnam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit.’ (Matthew 28:19) Nso akwa utom ke oro ekedi ntem!

² Kam kere! Ke Pentecost 33 E.N., n̄kpọ nte mbet 120 ẹkebọ edisana spirit oro ẹken̄wan̄ade ẹduọk ndien mmọ ẹma ẹtọn̄ọ ndinam utom oro ẹkedọn̄de mmọ ebe ke ndisian mbon en̄wen nte ke Jesus ekedi Messiah oro ẹkedoride enyịn ẹban̄a ke anyanini, emi editode enye mme owo ẹnyene edinyan̄a. (Utom 2:1-36) Didie ke utọ ekpri otu oro ekpekeme ndisịm mme owo ke “kpukpru mme idụt”? Mme owo ẹkese utom emi nte se owo mîkemeke ndinam, edi “Abasi emekeme ndinam kpukpru n̄kpọ.” (Matthew 19:26) Akpa mme Christian ẹma ẹnyene ibetedem edisana spirit Jehovah, ndien mmọ ẹma ẹnyene ke ekikere nte ini edide usọp usọp. (Zechariah 4:6; 2 Timothy 4:2) Ntem, ke ufan̄ iduọk isua ifan̄ kpọt, apostle Paul ama ekeme ndidọhọ ke ẹma ẹtan̄a eti mbụk “ẹnọ kpukpru owo ke idak ikpa-enyọn̄.”—Colossae 1:23.

3. Nso ikofụk “ibokpot” emi edide ata mme Christian?

³ Ke akamba ubak akpa isua ikie, utuakibuot akpanikọ ama aka iso nditara nsuana. Nte ededi, Jesus ama etịn̄ ntịn̄nnịm ikọ ete ke ini ke edi oro Satan edisuande “idiọk n̄kpasịp” ndien emi oyofụk “ibokpot” emi edide ata mme Christian ke ediwak isua ikie tutu esịm ini ukpen̄e. Emi ama etịbe ke mme apostle ẹma ẹkekpan̄a.—Matthew 13:24-39.

Usọp Usọp N̄kọri Mfịn

4, 5. Ọtọn̄ọde ke 1919, nso utom ke mme Christian oro ẹyetde aran ẹketọn̄ọ ndinam, ndien ntak oro emi akakamade n̄kpọ-ata?

⁴ Ke 1919, ini ama edikem ndibahade ibokpot emi edide ata mme Christian nsion̄o ke idiọk n̄kpasịp. Mme Christian oro ẹyetde aran ẹma ẹfiọk ẹte ke akana ẹka iso ẹnam akwa utom oro Jesus ọkọdọn̄de. Mmọ ẹma ẹnen̄ede ẹnịm ke mmimọ ikodu ke “ukperedem ini,” ẹma ẹnyụn̄ ẹfiọk ẹban̄a ntịn̄nnịm ikọ Jesus emi: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (2 Timothy 3:1; Matthew 24:14) Ih, mmọ ẹma ẹfiọk ke ekese utom ke okosụk ododu ndinam.

⁵ Nte ededi, ukem nte mme mbet eke 33 E.N., mme Christian oro ẹyetde aran do ẹma ẹsobo akwa n̄kpọ-ata. Sụk ekpri tọsịn ke otu mmọ ẹkedu ke ibat ibat idụt kpọt. Didie ke mmọ ẹkpekeme ndikwọrọ eti mbụk “ke ofụri ekondo”? Ti, ekeme ndidi ibat mme andidụn̄ isọn̄ ama ọdọk ebe miliọn 300 ke eyo mme Caesar ekpere ndisịm biliọn 2 ke akpa ekọn̄ ererimbot ama ekebe. Ndien ke ofụri ọyọhọ  isua ikie 20, ibat emi ayaka iso ndikọri usọp usọp.

6. Nso n̄kọri ke ẹkenam ke edisuan eti mbụk etisịm iduọk isua 1930?

⁶ Nte ededi, mme asan̄autom Jehovah oro ẹyetde aran, ukem nte nditọete mmọ eke akpa isua ikie, ẹma ẹtọn̄ọ ndinam utom oro ẹkenọde mmọ ye ọyọhọ mbuọtidem ke Jehovah, ndien spirit esie ama odu ye mmọ. Etisịm ufọt ufọt iduọk isua 1930, n̄kpọ nte mme ọkwọrọ eti mbụk 56,000 ẹketan̄a akpanikọ Bible ke idụt 115. Ke emi, ẹma ẹnanam ekese utom, edi ata ekese ke okosụk ododu ndinam.

7. (a) Obufa n̄kpọ-ata ewe ke mme Christian oro ẹyetde aran ẹkesobo? (b) Ye un̄wam “mme erọn̄ en̄wen,” mfịn nso n̄kọri ke ẹnam ke utom editan̄ mbok?

⁷ Ekem, edinyene ntotụn̄ọ ifiọk mban̄a mbon oro ẹdide “akwa otuowo” emi ẹtịn̄de ẹban̄a ke Ediyarade 7:9 ama akama obufa n̄kpọ-ata onyụn̄ ọnọ n̄ko idotenyịn nte ke mme Christian oro ẹnamde utom ọkpọsọn̄ mi ẹyenyene un̄wam. Ẹkenyene nditan̄ anana-ibat otuowo ẹdide “mme erọn̄ en̄wen,” kpa mme andinịm ke akpanikọ oro ẹnyenede idotenyịn eke isọn̄ emi “ẹtode ke kpukpru obio ye esien ye idụt ye usem,” mbok. (John 10:16) Mmọ emi ‘ẹyenam edisana utom ẹnọ Jehovah uwemeyo ye okoneyo.’ (Ediyarade 7:15, NW) Oro ọwọrọ ke mmọ ẹyen̄wam ke utom edikwọrọ ikọ ye edinọ ukpep. (Isaiah 61:5) Nte utịp, mme Christian oro ẹyetde aran ẹma ẹkop nduaidem ndikụt ibat mme ọkwọrọ eti mbụk ọkọride esịm ediwak tọsịn ndien ekem esịm ediwak miliọn. Ke isua 2003, obufa n̄wakn̄kan ibat owo 6,429,351 ẹkebuana ke utom ukwọrọikọ—n̄wakn̄kan ibat ke otu mmọ ẹdide akwa otuowo. * Mme Christian oro ẹyetde aran ẹwụt esịtekọm ẹban̄a un̄wam emi, ndien mme erọn̄ en̄wen ẹwụt esịtekọm ẹban̄a ifet oro mmọ ẹnyenede ndin̄wam nditọete mmọ oro ẹyetde aran.—Matthew 25:34-40.

8. Didie ke Mme Ntiense Jehovah ẹkenam n̄kpọ ẹban̄a ọkpọsọn̄ mfịghe oro ọyọhọ ekọn̄ ererimbot iba akadade ọsọk mmọ?

⁸ Ke ini otu ibokpot akafiakde ọwọrọ ada, Satan ama an̄wana ọkpọsọn̄ ekọn̄ ye enye. (Ediyarade 12:17) Satan akanam n̄kpọ didie ke ini akwa otuowo ọkọtọn̄ọde ndiwọrọ ndi? Ye ọkpọsọn̄ afai! Ndi nnyịn inịmke ke enye ekedi ntak oro ẹken̄wanade ye utuakibuot akpanikọ ke ofụri ererimbot ke ini ọyọhọ ekọn̄ ererimbot iba? Ke edem mbiba ke ekọn̄ oro, mme Christian ẹkedu ke ọkpọsọn̄ mfịghe. Ediwak ndima nditọete nnyịn iren ye iban ẹma ẹsobo enyene-ndịk idomo, ndusụk ẹkpan̄ade ke ntak mbuọtidem mmọ. Kpa ye oro, mmọ ẹma ẹtiene andiwet psalm ẹtịn̄ mme ikọ emi: “Nyobụre ke Abasi, kpa ke uyo esie; mmọbuọt idem mi ye Abasi: ndịk idinamke mi: nso ke obụkidem ekeme ndinam mi?” (Psalm 56:4; Matthew 10:28) Mme Christian oro ẹyetde aran ye mme erọn̄ en̄wen ẹma ẹsọn̄ọ ẹda ọtọkiet, koro spirit Jehovah ọkọsọn̄ọde mmọ idem. (2 Corinth 4:7) Nte utịp, “ikọ Abasi [ama] ọdọdiọn̄ asuana.” (Utom 6:7) Ke 1939, ke ini ekọn̄ akasiahade, mme anam-akpanikọ Christian 72,475 ẹketọt nte ikabuanade ke utom ukwọrọikọ. Nte ededi, ke 1945, kpa isua oro ekọn̄ okokụrede, ibatutom oro mîdịghe kpukpru owo ẹketọt ama owụt nte ke ifịk ifịk Mme Ntiense 156,299 ke ẹkesuan eti mbụk. Nso edikpu ke Satan okokụt ntem!

9. Mbufa ufọkn̄wed ewe ke ẹketọt nte ẹsiakde ke ini Ekọn̄ Ererimbot II?

⁹ Nte an̄wan̄ade, ọkpọsọn̄ ndutịme eke ọyọhọ ekọn̄ ererimbot iba ikanamke mme asan̄autom Jehovah ẹyịk m̀mê ẹyekeme ndinam utom ukwọrọikọ. Ke akpanikọ, ke 1943, ke ini ekọn̄ oro ekenen̄erede ọsọn̄ ubọk, ẹma ẹtọt mbufa ufọkn̄wed iba oro ẹsiakde. Ẹkenyene  ndinịm kiet, oro idahaemi ẹkotde Ufọkn̄wed Utom Ukara Abasi, ke kpukpru esop man ẹda ẹnọ Mme Ntiense kiet kiet ukpep ke ndikwọrọ ikọ nnyụn̄ nnam mme mbet. Ẹkesiak enye eken, Ufọkn̄wed Enyọn̄-Ukpeme Ukpep Bible eke Gilead, man ẹda ẹnọ mme isụn̄utom emi ẹditọn̄ọde utom ukwọrọikọ ke esenidụt, ukpep. Ih, ke ekọn̄ ama okokụre, ata mme Christian ẹma ẹben̄e idem ẹnọ ntatara utom.

10. Didie ke ẹkekụt ifịk ikọt Jehovah ke isua 2003?

¹⁰ Ndien nso utịbe utịbe utịp ke mme ufọkn̄wed emi ẹnyene ntem! Kpukpru mbon oro ẹnọde ukpep ke Ufọkn̄wed Utom Ukara Abasi—n̄kpri ye ikpọ, mme ete ye eka ye nditọwọn̄, idem ye mbon n̄kpọnnam—ẹmebuana ke ẹnyụn̄ ẹka iso ẹbuana ke ndinam akwa utom oro Jesus ọkọdọn̄de. (Psalm 148:12, 13; Joel 2:28, 29) Ke isua 2003, owo 825,185 ke ẹbaharede ukem ukem kpukpru ọfiọn̄, ẹma ẹwụt ke mmimọ imenyene ke ekikere nte ini edide usọp usọp ebe ke ndibuana ke utom usiakusụn̄ unọ un̄wam m̀mê eke ofụri ini. Kpa ke isua oro, Mme Ntiense Jehovah ẹma ẹbiat hour 1,234,796,477 ke ndikwọrọ eti mbụk Obio Ubọn̄ nnọ mbon en̄wen. Ke akpanikọ Jehovah okop inemesịt aban̄a ifịk oro ikọt esie ẹsịnde!

Ke Mme An̄wautom Esenidụt

11, 12. Mme uwụtn̄kpọ ewe ẹwụt nti utom oro mme isụn̄utom ẹnamde?

¹¹ Ke ediwak isua emi ẹbede, mme andikụre ukpep ke Gilead ndien, ke ata ndondo emi, mme andikụre ukpep ke Ufọkn̄wed Unọ Mme Asan̄autom Ukpep ẹmenam n̄wọrọnda utom. Ke uwụtn̄kpọ, ke Brazil, mme asuanetop ikọyọhọke 400 ke ini akpa mme isụn̄utom ẹkedide ẹdibehe ke 1945. Mme isụn̄utom emi ye mme isụn̄utom oro ẹketienede mmọ ke edem ọkọrọ ye ifịk ifịk nditọete ke Brazil ẹmenam utom ọkpọsọn̄, ndien Jehovah enen̄ede ọdiọn̄ ukeme mmọ. Edi n̄kpọ nduaidem didie ntem ọnọ owo ekededi oro etide ntọn̄ọ ntọn̄ọ ini oro ndikụt nte ke Brazil ama ọtọt obufa n̄wakn̄kan ibat owo 607,362 ke 2003!

¹² Da Japan ke uwụtn̄kpọ. Mbemiso ọyọhọ ekọn̄ ererimbot iba, n̄kpọ nte mme ọkwọrọ Obio Ubọn̄ ikie ẹkedu ke idụt oro. Ke ini ekọn̄ oro, ibak ibak ukọbọ ama anam ibat mme asuanetop osụhọde, ndien etisịm ini oro ekọn̄ okokụrede, ibat ibat Mme Ntiense ẹkesụk ẹdu ke uwem ẹnyụn̄ ẹsọn̄ idem ke n̄kan̄ eke spirit. (Mme N̄ke 2:7) Ke akpanikọ, ke 1949, ibat ibat n̄wọrọnda mbon nsọn̄ọnda oro ẹma ẹkop idatesịt ndidara edidi akpa isụn̄utom 13 oro ẹkenọde ukpep ke Gilead, ndien mme isụn̄utom emi ẹma ẹsọsọp ẹdima nditọete Japan oro ẹnyenede ifiopesịt mi ẹnyụn̄ ẹfọnde ido. Ke se iwakde ibe isua 50 ke ukperedem, ke isua 2003, Japan ama ọtọt n̄wakn̄kan ibat mme asuanetop 217,508! Ke akpanikọ, Jehovah enen̄ede ọdiọn̄ ikọt esie ke idụt oro. Ẹnyene mme utọ ntọt emi ẹto ediwak idụt en̄wen. Mbon oro ẹkemede ndikwọrọ ikọ ke mme efakutom esenidụt ẹnen̄ede ẹtịp ẹsịn ke ndisuan eti mbụk, ntre ke 2003 ẹma ẹkop eti mbụk emi ke mme idụt, isuo, ye mme efakutom 235 ke ofụri ererimbot. Ke akpanikọ, akwa otuowo ke ẹto “kpukpru mme idụt” ẹwọn̄ọ ẹdi.

‘Ẹto Kpukpru Esien ye Idụt ye Usem’

13, 14. Didie ke Jehovah okowụt ufọn edida ‘kpukpru usem’ n̄kwọrọ eti mbụk?

¹³ Akpa utịben̄kpọ oro ẹtọtde ke ẹma ẹkeda edisana spirit ẹyet mme mbet aran ke Pentecost 33 E.N. ekedi mmọ nditịn̄ ikọ ke usem nnọ otuowo oro ẹkesopde idem. Etie nte kpukpru mbon oro ẹkekpan̄de utọn̄ ẹnọ mmọ ẹma ẹkeme ndisem usem kiet oro ẹkesemde ke ediwak idụt, iso-ọfọn Greek. Sia mmọ ẹkedide mbon “eke ẹkponode Abasi,” eyedi mme edinam ido  ukpono oro ẹkesinịmde ke temple ke usem Hebrew ẹma ẹn̄wan̄a mmọ n̄ko. Edi ama enen̄ede onụk mmọ ndikpan̄ utọn̄ ke ini mmọ ẹkekopde eti mbụk ke usem emana mmọ.—Utom 2:5, 7-12.

¹⁴ Mfịn, n̄ko, ke ẹda ediwak usem ẹkwọrọ ikọ. Ẹma ẹtịn̄ ke ntịn̄nnịm ikọ nte ke akwa otuowo iditoho ke mme idụt kpọt, edi ẹyeto ke ‘esien ye usem’ n̄ko. Ke n̄kemuyo ye emi, Jehovah ama ada Zechariah etịn̄ ntịn̄nnịm ikọ ete: ‘Owo duop eke ẹtode ke kpukpru usem mme idụt ẹyemụm, kpa mmọ ẹyemụm eyen Judah kiet utọn̄ ọfọn̄idem, ẹte, Ẹyak nnyịn ika ye mbufo: koro nnyịn imokop ite ke Abasi odu ye mbufo.’ (Zechariah 8:23) Okposụkedi Mme Ntiense Jehovah mînyeneke aba enọ editịn̄ ikọ ke usem, mmọ ẹfiọk ufọn edikpep mme owo n̄kpọ ke usem emana mmọ.

15, 16. Didie ke mme isụn̄utom ye mbon en̄wen ẹnam n̄kpọ ẹban̄a n̄kpọ-ata eke edida mme usem n̄kann̄kụk n̄kwọrọ ikọ?

¹⁵ Edi akpanikọ, ibat ibat usem kpọt ke ẹsem ntatara ntatara mfịn, utọ nte Ikọmbakara, French, ye Spanish. Nte ededi, mbon oro ẹkpọn̄de obio emana mmọ ndikanam utom ke mme idụt en̄wen ẹdomo ndikpep mme usem n̄kann̄kụk man otodo “mmọ emi ẹkenịmde ẹnọ nsinsi uwem” ẹkeme ndikop eti mbụk. (Utom 13:48) Oro ekeme ndidi ọkpọsọn̄ n̄kpọ. Ke ini nditọete nnyịn ke idụt Tuvalu ke Edem Usụk Pacific ẹkeyomde mme n̄wed ke usem emana mmọ, kiet ke otu mme isụn̄utom ama enyịme ndinam ọkpọsọn̄ utom emi. Sia n̄wed ukabadeikọ ndomokiet mîkodụhe, enye ama ọtọn̄ọ ndiwet mme ikọ Tuvalu mbon. Nte ini akakade, ẹma ẹsio n̄wed Afo Emekeme Ndidu Uwem ke Nsinsi ke Paradise ke Isọn̄ * ke usem Tuvalu. Ke ini mme isụn̄utom ẹkedide ẹdibehe ke Curaçao, n̄wed Bible ye n̄wed ukabadeikọ ndomokiet ikodụhe ke Papiamento emi edide usem n̄kann̄kụk oro. Akwa eneni ama odu n̄ko ke nte ẹkpewetde usem emi. Kpa ye oro, ke ufan̄ isua iba ke akpa mme isụn̄utom ẹma ẹkedi ẹdibehe, ẹma ẹsio akpa tract Christian oro ọkọn̄ọde ke Bible ke usem oro. Mfịn, Papiamento edi kiet ke otu usem 133 oro ẹmịn̄de Enyọn̄-Ukpeme ke ukem ini ye Ikọmbakara.

¹⁶ Ke Namibia akpa mme isụn̄utom ikekwe Ntiense ndomokiet ke n̄kann̄kụk oro ndin̄wam mmọ ke ukabade n̄wed. Akan oro, Nama, usem kiet ke n̄kann̄kụk oro ikenyeneke mme ikọ inọ ọsọ ukpepn̄kpọ nnyịn, utọ nte “mfọnmma.” Isụn̄utom kiet ọtọt ete: “N̄kesinen̄ede nda mme andikpep ke ufọkn̄wed oro ẹkedide nditọ ukpepn̄kpọ Bible mi ndikabade n̄wed. Sia mmọ ẹkenyenede esisịt ifiọk akpanikọ, n̄kesinyene nditie ye mmọ man n̄kụt nte ke udịmikọ kiet kiet ama enen.” Edi, ke akpatre ẹma ẹkabade tract oro Life in a New World (Uwem ke Obufa Ererimbot) ẹsịn ke usem mbon Namibia inan̄. Mfịn, ke ẹmịn̄ Enyọn̄-Ukpeme ke usem Kwanyama ye Ndonga kpukpru ini.

17, 18. Mme n̄kpọ-ata ewe ke ẹkenam n̄kpọ ẹban̄a ke Mexico ye ke mme idụt en̄wen?

 ¹⁷ Ke Mexico, akpan usem edi Spanish. Edi, mbemiso mbon Spain ẹkedide ẹdibehe, ẹma ẹsisem ediwak usem do, ndien ke ẹsụk ẹsesem ediwak ke otu emi. Ntem, ẹmịn̄ mme n̄wed Mme Ntiense Jehovah idahaemi ke usem Mexico itiaba ọkọrọ ye ke Usem Idiọn̄ọ Mbon Mexico. Utom Obio Ubọn̄ eke Maya ekedi akpa n̄wed oro enyenede usenọfiọn̄ emi ẹmịn̄de ke usem mbon India emi ẹdụn̄de ke America. Ke akpanikọ, ediwak tọsịn mbon Maya, Aztec, ye mbon en̄wen ẹdu ke otu mme asuanetop Obio Ubọn̄ 572,530 emi ẹdude ke Mexico.

¹⁸ Ke ndondo emi, ediwak miliọn owo ẹmefen̄e ẹka esenidụt nte mbon itọkekọn̄, mîdịghe ẹwọrọ idụn̄ ke ntak nsọn̄ọn̄kpọ. Nte utịp, ke akpa ini, ediwak idụt idahaemi ẹnyene uke-uke an̄wautom oro ẹsemde usem esenidụt. Mme Ntiense Jehovah ẹnyịme ndinam n̄kpọ mban̄a n̄kpọ-ata emi. Ke uwụtn̄kpọ, ke Italy, mme esop ye mme otu ẹdu ke usem 22 ke ẹsiode usem Italian ẹfep. Man ẹn̄wam nditọete ẹkwọrọ ikọ ẹnọ mme owo oro ẹsemde mme usem en̄wen, ẹma ẹtịm mme ukpepn̄kpọ ke ndondo emi man ẹkpep usem 16, esịnede Usem Idiọn̄ọ Mbon Italy. Ke mme ediwak idụt eken, Mme Ntiense Jehovah ke ẹsịn ukeme kpa ntre ndisịm ediwak owo oro ẹwọrọde idụn̄. Ih, ye un̄wam Jehovah, eyịghe idụhe nte ke akwa otuowo ke ẹto ediwak usem ẹwọn̄ọ ẹdi.

“Ke Ofụri Isọn̄”

19, 20. Mme ikọ Paul ewe ẹsu mfịn ke n̄wọrọnda usụn̄? Nam an̄wan̄a.

¹⁹ Apostle Paul ama ewet ke akpa isua ikie ete: “Nte mmọ ikokopke? Ke akpanikọ mmọ ẹma ẹkop. Uyom mmọ ọmọwọrọ ke ofụri isọn̄, Ikọ mmọ ẹnyụn̄ ẹsịm utịt ererimbot.” (Rome 10:18) Edieke oro ekedide ntre ke akpa isua ikie, n̄wan̄waediso mfịn! Ediwak miliọn owo—iso-ọfọn ẹwakde ẹkan ini ekededi ke mbụk—ke ẹdọhọ: “Nyọkọm Jehovah kpukpru ini: itoro esie oyosụk atak mi ke inua.”—Psalm 34:1.

²⁰ Akan oro, utom emi ituakke ida. Ibat mme asuanetop Obio Ubọn̄ ke aka iso ndikọri. Ke ẹsịn ediwak ini efen efen ke utom ukwọrọikọ. Ke ẹnam ediwak miliọn mfiakn̄ka, ke ẹnyụn̄ ẹnịm ediwak tọsịn ukpepn̄kpọ Bible. Ndien mme owo ke ẹka iso ndiwụt udọn̄. Isua oko, obufa n̄wakn̄kan ibat owo 16,097,622 ẹkedụk usọrọ Editi n̄kpa Jesus. Nte an̄wan̄ade, ekese ke osụk ododu ndinam. Nnyịn ikpakam ika iso ndikpebe nsọn̄ọnda nditọete nnyịn emi ẹyọde ọkpọsọn̄ ukọbọ. Ndien nnyịn ikpakam inyene ifịk oro kpukpru nditọete nnyịn ẹnyenede, emi ẹsịnde idem ke utom Jehovah toto ke 1919. Yak kpukpru nnyịn ika iso nditịn̄ mme ikọ ikwọ andiwet psalm emi: “Yak kpukpru n̄kpọ eke ẹduọkde ibifịk ẹtoro Jehovah. Mbufo ẹtoro Jehovah.”—Psalm 150:6.

[Mme Ikọ idakisọn̄]

Nte Afo Emekeme Ndinam An̄wan̄a?

• Nso utom ke nditọete ẹketọn̄ọ ndinam ke 1919, ndien ntak emi enye akakamade n̄kpọ-ata?

• Mmanie ke ẹketan̄ ẹbok man ẹnọ utom ukwọrọikọ ibetedem?

• Nso utom ke mme isụn̄utom ye mbon oro ẹnamde utom ke esenidụt ẹnam?

• Ewe uyarade ke afo akpada owụt nte ke Jehovah ke ọdiọn̄ utom ikọt esie mfịn?

[Mme Mbụme Ukpepn̄kpọ]

 [Chart ke page 18-21]

2003 SERVICE YEAR REPORT OF JEHOVAH’S WITNESSES WORLDWIDE

 (Se magazine)

[Mme ndise ke page 14, 15]

Ọkpọsọn̄ ndutịme eke ọyọhọ ekọn̄ ererimbot iba ikanamke mme Christian ẹyịk m̀mê ẹyekeme ndikwọrọ eti mbụk

[Ebiet Ẹdade N̄kpọ Ẹto]

Bọmb emi otopde obomo: Foto U.S. Navy; mbon eken: Foto U.S. Coast Guard

[Mme ndise ke page 16, 17]

Akwa otuowo ẹdito kpukpru esien ye usem