Ntọt Mme Anditan̄a Obio Ubọn̄

Un̄wam ke Ndisọn̄ọ Mmụm Edisana Idaha eke Iyịp N̄kama

MME asan̄autom Jehovah ke ẹwụt edinam akpanikọ mmọ nnọ Abasi ke ofụri ererimbot ke se iban̄ade edisana idaha eke iyịp. (Utom 15:28, 29) Otu asan̄autom emi anamde akpanikọ onyụn̄ enyenede ọniọn̄ ọnọ nditọete Christian un̄wam emi. (Matthew 24:45-47) Ẹyak ise mme utịp oro ẹkenyenede ke Philippines.

N̄kọk itieutom Philippines ọtọt ete: “Ke 1990, ẹma ẹdọhọ nnyịn ẹte ke mme andida ke ibuot Bethel Brooklyn ẹyenịm mbono mi ke Philippines. Ẹma ẹkot nditọete ẹtode nsio nsio n̄kọk itieutom ke Asia, esịnede Korea, Taiwan, ye Hong Kong. Uduak mbono oro ekedi nditọn̄ọ Itieutom Utịm Ntọt Ufọkibọk ke mme n̄kọk itieutom mmọ nnyụn̄ nnam ndutịm n̄ko nnọ Mme Kọmiti Unyene Nneme ye Mbon Ufọkibọk. Ke akpa, ẹketọn̄ọ mme kọmiti emi ke ikpọ obio inan̄ ke Philippines.” Kọmiti emi oyodomo ndiyom mbiaibọk oro ẹnyịmede ndibere ye nnyịn ke se iban̄ade idaha Christian kaban̄a iyịp. Mmọ n̄ko ẹyen̄wam nditọete ke ini mme mfịna ẹban̄ade edida iyịp ẹdemerede.

Ẹma ẹmek Remegio ndinam utom ye Kọmiti Unyene Nneme ye Mbon Ufọkibọk ke Baguio. Nte ini akakade, mbiaibọk ẹma ẹtọn̄ọ ndikụt ufọn kọmiti emi. Remegio eti ini kiet emi ediwak mbiausọbọ oro ẹkesopde idem ye Kọmiti Unyene Nneme ye Mbon Ufọkibọk ẹkeyomde ndifiọk nte ẹkpesọbọde mbon udọn̄ọ emi ẹdide Mme Ntiense oro mîyomke iyịp. Remegio ọkọdọhọ ete: “Mbiaibọk ẹma ẹtọn̄ọ ndibụp mme mbụme, edi ama ọsọn̄ mi ndibọrọ koro mme mbụme emi ẹkewakde n̄kukọhọ etieti.” Enye ama ọbọn̄ akam eben̄e Jehovah un̄wam ndise mban̄a mfịna emi. Remegio ama aka iso ete: “Ke kpukpru mbụme oro ẹkebụpde, mbiaibọk eken ẹma ẹmenede ubọk ẹtịn̄ nte mmọ ẹkesede ẹban̄a ukem idaha oro.” Remegio ama okop idatesịt aban̄a un̄wam oro enye ekenyenede akpan akpan sia ikpehe mbụme ye ibọrọ oro ekebịghide hour iba.

Kọmiti 21 ẹdu idahaemi ke ofụri idụt oro, emi nditọete 77 ẹnamde utom. Danilo, Ntiense emi edide abiaibọk, ọdọhọ ete: “Mbiaibọk ẹfiọk ẹte ke esop odu emi esede ke ima ima usụn̄ aban̄a mbon udọn̄ọ mmimọ emi ẹdide Mme Ntiense.” Abiausọbọ kiet ke akpa ikenyịmeke ndisiak eyenete kiet idem ye unana edisịn iyịp. Nte ededi, eyenete emi ama ọsọn̄ọ omụm idaha esie akama. Ẹma ẹnam usiakidem oro uforo uforo. Itieutom Utịm Ntọt Ufọkibọk ọtọt ete: “Abiaibọk emi ama akam okop n̄kpaidem aban̄a nsọn̄idem eyenete emi. Enye ọkọdọhọ ete: ‘Ọkọn̄ọde ke se iketịbede mi, edieke owo mbufo ekededi oyomde ndinam utọ usiakidem oro ye unana iyịp, nyokop inemesịt ndinam emi.’”