Ima-Mfọnido Edi Akpan N̄kpọ Adan̄a Didie?
Ima-Mfọnido Edi Akpan N̄kpọ Adan̄a Didie?
“EDI mfọnido [“ima-mfọnido,” NW] owo esịn ẹyom owo,” ntem ke Bible ọdọhọ. (Mme N̄ke 19:22) Ke akpanikọ, ẹsinen̄ede ẹma mme edinam mfọnido oro ima edemerede. Nte ededi, ke Bible, ikọ oro “ima-mfọnido” aban̄a mfọnido oro ọkọn̄ọde ke itie ebuana oro ama okododu, utọ nte enye oro ọkọn̄ọde ke itie ebuana oro osụn̄ọde oto mfọnido oro ẹkewụtde ke mbemiso. Ntem, enye esịne ekikere ima akpanikọ.
Edidem Jehoash eke Judah ama okpu ndinyene edu oro ẹmade mi. Enye ama okpu ndiwụt esịtekọm nnọ eyeneka ete esie an̄wan ye Jehoiada ebe esie. Ke ini Jehoash mîkọyọhọke kan̄a isua kiet, eka ete esie oro ekedide idiọkowo ama anam idemesie ọbọn̄ onyụn̄ owot kpukpru nditọeka Jehoash, oro ẹkenyenede unen ndidi ndidem. Edi, n̄wan emi ama okpu ndiwot ekpri Jehoash, koro eyeneka ete esie ye ebe eyeneka ete esie ẹma ẹtịm ẹdịp enye. Mmọ n̄ko ẹma ẹkpep enye Ibet Abasi. Ke ini Jehoash ekedide isua itiaba, ebe eyeneka ete esie ama ada odudu oro enye ekenyenede nte akwa oku anam ẹwot idiọk ọbọn̄an̄wan emi onyụn̄ anam ẹdori Jehoash ke ebekpo.—2 Chronicles 22:10–23:15.
Ekpri Jehoash ama akara nte edidem ke eti usụn̄ tutu ebe eyeneka ete esie akpa, edi ekem enye ama ọwọn̄ọde ebịne ukpono ndem. Abasi ama ọdọn̄ Zechariah, emi ekedide eyen Jehoiada, ete okodụri Jehoash utọn̄ aban̄a nsọn̄ibuot esie. Jehoash ama anam ẹtọn̄ọ Zechariah ke itiat ẹwot. Nso unana ima-mfọnido ke enye okowụt ubon oro ntem, emi enye okpokowụtde esịtekọm ọnọ!—2 Chronicles 24:17-21.
Bible ọdọhọ ete: “Joash edidem etre nditi mfọn [“ima-mfọnido,” NW] oro ete [Zechariah] akanamde ye enye, edi owot eyen esie.” Ke ekperede ndikpa, Zechariah ama ọdọhọ ete: “Yak Jehovah ese, onyụn̄ oyom.” Nte ekemde ye se Zechariah ọkọdọhọde, Jehoash ama ọduọ udọn̄ọ idiọk idiọk ndien ekem ikọt esie ẹma ẹwot enye.—2 Chronicles 24:17-25.
Utu ke ndikpa nte Edidem Jehoash, utịbe utịbe ini iso ke ana ebet kpukpru mbon oro ẹnamde item emi: “Kûyak mfọnido [“ima-mfọnido,” NW] ye akpanikọ ẹkpọn̄ fi: . . . Ndien afo oyokụt . . . mfọniso ke iso Abasi ye ke iso owo.”—Mme N̄ke 3:3, 4.