Ẹnọ Fi Ufiop Ufiop Ikot

UDIA Mbubịteyo Ọbọn̄, oro Jesus Christ ọkọtọn̄ọde ke n̄kpọ nte isua 2,000 ko, idịghe ikpîkpu mbụk eset. Enye enyene akamba odudu ke idem mme owo tọn̄ọ ẹketọn̄ọ enye. Sia se mme owo ẹkotde ke mbụk Gospel ẹban̄a se ikadade itie ke okoneyo oro enen̄erede otụk mmọ, ediwak owo ẹdomo ndinịm Udia Mbubịteyo Ọbọn̄ ke nsio nsio usụn̄.

Ẹnam kpukpru emi sia Jesus Christ ke idemesie okowụkde mme anditiene enye ete ẹnam emi. Enye ama asian mmọ nnennen nnennen ete: “Ẹnam emi nditi Mi.”—Luke 22:19; 1 Corinth 11:23-25.

Nte ededi, man edinam emi enen̄ede enyene ufọn, ana owo enyene nnennen ifiọk aban̄a se enye ọwọrọde, nte Ikọ Abasi, kpa Bible, etịn̄de. Ke adianade do, ọfọn owo ọfiọk se Bible etịn̄de aban̄a ini ye nte ẹkpenamde edinam emi.

Man ẹnam item Jesus, Mme Ntiense Jehovah ke ofụri ererimbot ẹyesop idem ke mbubịteyo Wednesday, April 16, 2003, nditi n̄kpa Jesus. Edidi ini ọnọ mmọ ndidụn̄ọde N̄wed Abasi nnyụn̄ mfiak nsọn̄ọ mbuọtidem ye ima oro mmọ ẹmade Ọbọn̄ Jesus Christ emi ọkọdọhọde ete: “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Ẹnọ fi ufiop ufiop ikot ndisop idem ye mmọ ke mbubịteyo oro man afo n̄ko etiene ọsọn̄ọ mbuọtidem fo ke Jesus Christ ye ima oro afo amade enye ye Ete esie eke heaven, Jehovah Abasi.