Mme Mbụme Ẹtode Mme Andikot

Nte odu n̄kpọ ekededi oro ẹkemede ndinam edieke Christian oro ẹyetde aran emi edide owo n̄kpọnnam mîkemeke ndidụk editi Udia Mbubịteyo Ọbọn̄ emi esop enịmde?

Ih. Ẹkeme, ẹkpenyụn̄ ẹnyene ndinam n̄kpọ ndikere mban̄a Christian oro ẹyetde aran emi edide owo n̄kpọnnam, ndusụk anade ke nna udọn̄ọ ndien ke ntre mîkemeke ndidụk ke ini esop enịmde Editi N̄kpa Christ. Ke utọ idaha oro, otu mbiowo ẹkeme ndinam ndutịm man ebiowo kiet m̀mê Christian eren oro ọkọride esịm ọyọhọ idaha ada ubak uyo ye wine emi ẹdide mme n̄kpọ idiọn̄ọ aka ebịne ekemmọ andinịm ke akpanikọ oro kpa ke okoneyo oro mbemiso usiere.

Ọkọn̄ọde ke nte mme idaha ẹdide, ebiowo m̀mê eyenete efen emi akade edem eyenete oro ẹyetde aran mi ekeme ndinọ ibio ibio utịn̄ikọ nnyụn̄ n̄kot mme itie N̄wed Abasi oro ẹdotde. Enye ekeme nditiene uwụtn̄kpọ oro Jesus ekenịmde ke ini Enye ọkọtọn̄ọde Udia Mbubịteyo Ọbọn̄. Ke uwụtn̄kpọ, enye ekeme ndikot Matthew 26:26, nnyụn̄ mbọn̄ akam mbemiso ọnọde uyo eke leaven mîdụhe. Ekem, eyenete oro akade edem enye oro ẹyetde aran mi ekeme ndikot Matthew ibuot 26, ufan̄ikọ 27 ye 28, ndien afiak ọbọn̄ akam mbemiso ọnọde wine. Enye ekeme nditịn̄ ikọ ifan̄ mban̄a se n̄kpọ idiọn̄ọ oro kiet kiet adade aban̄a, ndien ekpenyene ndiberi ke akam.

Nte ededi, ẹkpenyene ndisịn ofụri ukeme ndidụk Udia Mbubịteyo Ọbọn̄ emi esop enịmde. Edi nso ke ẹkeme ndinam ke ini Christian oro ẹyetde aran ọdọn̄ọde n̄kpa n̄kpa, anade ke ufọkibọk, mîdịghe oro n̄kpọ efen ọbiọn̄ọde enye ndidụk Editi ke utịn ama okosụhọde ke Nisan 14? Owo oro ẹyetde aran do ekeme nditiene uwụtn̄kpọ Ibet Moses nnyụn̄ nnịm editi ke idemesie ke usen 30 ama ekebe.—Numbers 9:9-14.