Ndọn̄esịt Oro Nnennen Ifiọk Abasi Ọnọde

SE BIBLE etịn̄de aban̄a ima ye mbọm Abasi edemede mme mbụme oro ẹtịmerede ndusụk owo esịt. Mmọ ẹbụp ẹte: Edieke Abasi oyomde ndisio idiọkn̄kpọ mfep, ọfiọkde nte akpanamde oro, onyụn̄ enyenede ukeme ndinam oro, ntak emi idiọkn̄kpọ akade iso nditara? Mfịna mmọ edi nte ẹkemede ndinam ekikere ita emi ẹdu ke n̄kemuyo: (1) Abasi enyene odudu akan; (2) Abasi edi ima onyụn̄ ọfọn; ndien (3) mme enyene-ndịk n̄kpọntịbe ke ẹka iso ẹtịbe. Mmọ ẹkere ẹte sia ọyọhọ ekikere ita emi edide ofụri akpanikọ, do ke nsụhọde n̄kaha, kiet ke otu iba eken ikemeke ndidi akpanikọ. Mmọ ẹkere ke anaedi Abasi ikemeke nditre idiọkn̄kpọ mîdịghe nte ke enye ikereke iban̄a nnyịn.

Ediwak usen ke ẹma ẹkebiat World Trade Center ke New York, ọwọrọiso adaiso ido ukpono kiet ke United States ama ọdọhọ ete: “Ẹbụp mi . . . ata ediwak ini ẹban̄a ntak emi Abasi esiyakde mme n̄kpọ mmọn̄eyet ye ndutụhọ ẹtịbe. Nnyene ndinen̄ede nnyịme ke ntịmke mfiọk ibọrọ, idem enye oro ekemede ndinọ mi uyụhọ.”

Ke anamde n̄kpọ aban̄a ikọ emi, prọfesọ ukpepn̄kpọ ido ukpono ama ewet ete ke “eti ukpepn̄kpọ ido ukpono” oro adaiso ido ukpono emi ọkọkwọrọde ama enen̄ede otụk imọ. Enye n̄ko ama enyịme ekikere eyen ukpepn̄kpọ kiet oro ekewetde ete: “Unana edifiọk ntak oro ndutụhọ odude edi ntak kiet oro anamde ọsọn̄ ndifiọk Abasi.” Edi nte enen̄ede ọsọn̄ ndifiọk ntak emi Abasi ayakde idiọkn̄kpọ odu?

Ntọn̄ọ Idiọkn̄kpọ

Ke edide isio ye se mme adaiso ido ukpono ẹtịn̄de, Bible iwụtke ke owo ikemeke ndifiọk ntak emi Abasi ayakde idiọkn̄kpọ odu. Akpan n̄kpọ oro ekemede ndin̄wam nnyịn ndifiọk ntak emi idiọkn̄kpọ odude edi ndifiọk nte ke Jehovah ikobotde mme idiọkowo. Enye okobot akpa eren ye n̄wan nte mme mfọnmma owo, oro ẹnanade idiọkn̄kpọ. Jehovah ama ese mme utom obot esie onyụn̄ okụt ke mmọ ẹma “ẹfọn eti eti.” (Genesis 1:26, 31) Uduak esie ekedi Adam ye Eve nditat Paradise Eden oro nsịm ofụri isọn̄ nnyụn̄ nnam enye ọyọhọ ye mbon idatesịt oro ẹdude ke idak ukpeme ima ima ukara esie.—Isaiah 45:18.

Idiọkn̄kpọ ọkọtọn̄ọ ye edibotn̄kpọ eke spirit kiet emi, okposụkedi akanamde akpanikọ ọnọ Abasi ke ntọn̄ọ, okoyomde ẹtuak ibuot ẹnọ imọ. (James 1:14, 15) Nsọn̄ibuot esie akayarade ke isọn̄ ke ini enye akanamde akpa eren ye n̄wan oro ẹda ye enye ẹbiọn̄ọ Abasi. Utu ke ndinam in̄wan̄-in̄wan̄ item oro Abasi ọkọnọde mmọ ete ẹkûdia m̀mê ẹkûtụk eto ifiọk eti ye idiọk, Adam ye Eve ẹma ẹtet mfri oro ẹdia. (Genesis 3:1-6) Ke ndinam ntre, mmọ ikọsọn̄ke ibuot kpọt ye Abasi edi  ẹkewụt ke mmimọ imoyom ndida ke idem n̄kpọn̄ enye.

Ẹma Ẹdemede Eneni Ido Uwem

Nsọn̄ibuot emi ke Eden ama edemede eneni ido uwem, eneni oro ebehede ofụri ererimbot. Mme ọsọn̄ibuot owo emi ẹma ẹdemede eyịghe m̀mê Jehovah akara mme edibotn̄kpọ esie ke eti usụn̄. Ndi Andibot ama enyene unen ndiyom ubonowo ẹsụk ibuot ẹnọ imọ ọyọhọ ọyọhọ? Nte ọkpọfọn ye mme owo akan edieke mmọ ẹkpedude uwem nda-ke-idem?

Jehovah ama ese aban̄a eneni itie edikara esie ke usụn̄ oro owụtde ima, unenikpe, ọniọn̄, ye odudu esie ke n̄kem-n̄kem mfọnmma idaha. Enye ekpekekeme ndida odudu esie nsọhi mbon nsọn̄ibuot oro mfep ke ndondo oro. Oro ekpeketie nte enen, sia enye ama enyene unen ndinam oro. Edi ndinam ntre ikpọkọbọrọke eneni ido uwem oro ẹkedemerede. Ke n̄kan̄ eken, Abasi ekpekekeme ndifre enyịn mban̄a idiọkn̄kpọ oro. Utọ edinam oro ekpetie ndusụk owo mfịn nte ima ima edinam. Edi, emi n̄ko ikpọbọrọke eneni Satan oro nte ke ọkpọfọn ye mme owo akan edieke mmọ ẹkpekarade idemmọ. N̄ko-n̄ko, nte utọ edinam oro ikpesịnke udọn̄ inọ mmọ en̄wen ndiwọn̄ọde n̄kpọn̄ usụn̄ Jehovah? Utịp ekpedi anana-utịt ndutụhọ.

Ke ọniọn̄ esie, Jehovah ama ayak mme owo ẹtiene usụn̄ idemmọ ke ndusụk ini. Okposụkedi emi ọwọrọde ediyak idiọkn̄kpọ aka iso ke ibio ini, mme owo ẹnyene ifet ndiwụt m̀mê mmimọ imekeme ndikara idem uforo uforo ke ẹsiode Abasi ẹfep, ndu uwem nte ekemde ye mme idaha eti ye idiọk oro mmimọ inịmde. Nso idi utịp? Mbụk owo ọyọhọ ye ekọn̄, ukwan̄ikpe, ufịk, ye ndutụhọ. Ata edikpu oro nsọn̄ibuot ye Jehovah edidade idi eyebiere eneni oro ẹkedemerede ke Eden ke nsinsi nsinsi.

Kan̄a ke emi, Abasi owụt ima esie ke ndinọ Eyen esie, Jesus Christ, emi ọkọnọde uwem esie eke owo nte uwa ufak. Emi anam mme okopitem ubonowo ẹkeme ndibọhọ ubiomikpe idiọkn̄kpọ ye n̄kpa oro okotode nsọn̄ibuot Adam. Ufak oro eberede usụn̄ nsinsi  uwem ọnọ kpukpru mbon oro ẹbuọtde idem ke Jesus.—John 3:16.

Nnyịn imenyene un̄wọn̄ọ Jehovah oro ọnọde ndọn̄esịt nte ke ndutụhọ oro esịmde owo edi ke ibio ini. Andiwet psalm ekewet ete: “Osụk esisịt idiọk owo ididụhe: ndien ke afo etịn̄de enyịn ke ebiet esie, enye ididụhe. Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”—Psalm 37:10, 11.

Ini Iso Ifụre ye Inemesịt

Mme ntịn̄nnịm ikọ Bible ndisu owụt nte ke ini Abasi ndida utịt nsọk udọn̄ọ, mfụhọ, ye n̄kpa emekpere. Tịm fiọk utịbe utịbe n̄kukụt aban̄ade se idide ke ini iso oro ẹkewụtde apostle John ke n̄kukụt. Enye ekewet ete: “Ekem n̄kụt obufa enyọn̄ ye obufa isọn̄; koro akpa enyọn̄ ye akpa isọn̄ ẹma ẹbe ẹfep, inyan̄ ibom inyụn̄ idụhe aba. . . . Abasi ke Idem Esie oyonyụn̄ odu ye [ubonowo], onyụn̄ edi Abasi mmọ. Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” Ẹma ẹsọn̄ọ ẹtịn̄ ẹnọ John nte mme un̄wọn̄ọ emi ẹdide se ẹkpeberide edem, ẹte: “Wet: koro mme ikọ emi ẹdi akpanikọ ye se owo ekpenịmde.”—Ediyarade 21:1-5.

Nso kaban̄a ediwak biliọn mbon oro mîduehe oro ẹkpan̄ade tọn̄ọ nte nsọn̄ibuot oro ọkọtọn̄ọ ke Eden? Jehovah ọn̄wọn̄ọ ete ke imọ iyanam mbon oro ẹkpan̄ade idahaemi ẹfiak ẹdidu uwem. Apostle Paul ọkọdọhọ ete: “Mmonyụn̄ ndori enyịn ke Abasi . . . nte, nti owo ye mme idiọk owo ẹyeset ke n̄kpa.” (Utom 24:15) Mbon emi ẹyenyene idotenyịn edidu uwem ke ererimbot oro “edinen ido [edidụn̄de].”—2 Peter 3:13.

Ukem nte edima ete akpayakde ẹnam eyen esie ubiak ubiak usiakidem edieke enye ọfiọkde ete ke oro ayada ufọn oro ebịghide edi, ntre ke Jehovah ayak mme owo ẹsobo idiọkn̄kpọ ke isọn̄ ke ibio ini. Edi, nsinsi edidiọn̄ ana ebet kpukpru mbon oro ẹdomode ndinam uduak Abasi. Paul ama anam an̄wan̄a ete: “Ẹkenam ofụri ekondo osụk idem ọnọ ikpîkpu n̄kpọ, itoho ke edinyịme esịt, edi oto ke Enye emi akanamde enye osụk ntre, ye idotenyịn, ẹte ke ẹyenyan̄a ekondo ke idemesie nde ẹsio ke itie ufụn mbiara, ẹsịn ke itie eyen-isọn̄ emi enyenede ubọn̄ eke nditọ Abasi.”—Rome 8:20, 21.

Ke akpanikọ emi idịghe utọ mbụk oro nnyịn isikopde ke ekebe ndise m̀mê isikotde ke n̄wedmbụk n̄kpọntịbe, emi edi eti mbụk. Enye edi mfọnn̄kan mbụk otode “Abasi kpukpru ndọn̄esịt,” emi enen̄erede ekere aban̄a nnyịn.—2 Corinth 1:3.

[Mme ndise ke page 6]

Ini oro ebede owụt ke ubonowo ikemeke ndikara idemmọ uforo uforo ke ẹsiode Abasi ẹfep

[Mme Ebiet Ẹdade N̄kpọ Ẹto]

Ubon Somalia: UN PHOTO 159849/M. GRANT; bọmb atọm. USAF photo; itienna ekikere: U.S. National Archives photo