Mme Uyen Oro Ẹmade Akpanikọ

“ANDIWET psalm edide eyen Hebrew ama obụp ke ediwak tọsịn isua emi ẹkebede ete: “Eyenọwọn̄ ada nso anam usụn̄ esiemmọ asana?” (Psalm 119:9) Mbụme emi osụk enyenyene ufọn mfịn koro n̄kparawa owo ẹsobo ediwak mfịna ke ererimbot emi. Etịme etịme edinam idan̄ anam ediwak n̄kparawa owo ẹnyene AIDS, n̄kpọ nte mbahade iba ke otu mbon oro ẹnyenede idiọk udọn̄ọ emi ẹdu ke ufọt isua 15 ye 24. Edida ibọk ke idiọk usụn̄ ada ediwak mfịna edi n̄ko, anamde ndusụk uyen ẹkpa nsek. Ikwọ oro ẹsabarede owo; afai afai ye mme oburobụt ndise senima, ndise TV ye vidio; ye mme ndise idan̄ ke Intanet ẹnyene idiọk odudu ke idem mme uyen. Ke ntre, mbụme oro andiwet psalm okobụpde enen̄ede ebehe ediwak ete ye eka ye mme uyen mfịn.

Andiwet psalm oro ama ọbọrọ mbụme oro enye okobụpde ete: ‘Edi ke ndikpeme enye nte ikọ fo asan̄ade.’ Ke akpanikọ, Ikọ Abasi, kpa Bible, ọdọn̄ọ nti item ọnọ n̄kparawa owo, ndien ke ndida enye nsịn ke edinam, ediwak uyen ẹkụt unen ke uwem. (Psalm 119:105) Ẹyak nnyịn idụn̄ọde ndusụk uwụtn̄kpọ mme uyen oro ẹmade Abasi emi ẹnyụn̄ ẹdomode ndisọn̄ọ nda ke n̄kan̄ eke spirit ke ererimbot uyom inemesịt ye uma inyene emi.

Mmọ Ẹwụt Esịtekọm Ẹban̄a Ndausụn̄ Ete ye Eka

Jacob Emmanuel ekedi asan̄autom asiakusụn̄ uyọhọ ini ke ediwak isua mbemiso anamde utom ke ọfis n̄kọk itieutom Mme Ntiense Jehovah ke Mexico. Enye ada esịtekọm eti nte ẹken̄wamde imọ ikọri ima inọ utom Abasi ete: “Okposụkedi ndusụk nditọete eke spirit oro ẹnyenede mbufiọk oro n̄kanamde ufan ye mmọ ẹkenen̄erede ẹn̄wam, ete ye eka mi n̄ko ẹma ẹnen̄ede ẹn̄wam mi. Mmọ ẹma ẹsịn udọn̄ ẹnọ mi ndima utom ukwọrọikọ. Sụn̄sụn̄, mmọ ẹma ẹnọ mi ndausụn̄ ndisan̄a ke nnennen usụn̄; akanam n̄kereke ke mmọ ẹkenyenyịk mi.”

David, emi ama akanam utom ukwọrọikọ uyọhọ ini ke ediwak isua idahaemi eti nte okotụkde enye ke idem ke ini ete ye eka esie ẹketọn̄ọde ndinam utom nte mme akpan asiakusụn̄ ke ini enye ye eyeneka esie ẹkedide n̄kpri. Ke ini ete esie akakpade, eka esie ama aka iso ke utom akpan asiakusụn̄. Enye ama ese aban̄a mmọ ke adianade ye utom edikwọrọ eti mbụk. David ọdọhọ ete: “Akananam mmọ ikenyịkke mi ndidi asiakusụn̄, edi nnyịn ima ima utom usiakusụn̄ etieti nte ubon tutu ebuana ọtọkiet ye n̄kann̄kụk ama onụk mi nditiene ndụk.” Kaban̄a ufọn eti ndausụn̄ ye ntịn̄enyịn oro ete ye eka ẹkenọde enye, David ọdọhọ ete: “Kpukpru okoneyo, eka mi ama esikot mbụk ke n̄wed To Paradise Ekeduökde Sim Paradise Efiakde Enyene ọnọ nnyịn. * Nte enye ekesibụkde mbụk oro ọnọ nnyịn ama an̄wam nnyịn ndima ndidia udia eke spirit.”

Ndiwụt Esịtekọm Mban̄a Mme Mbono Esop

Ọsọn̄ ndusụk uyen ndiwụt esịtekọm mban̄a mme mbono esop Christian. Mmọ ẹsidụk koro ẹsisan̄ade ye mme ete ye eka mmọ ẹka. Nte ededi, edieke mmọ ẹkade iso ẹdụk mbono esop, nte ini akade, mmọ ẹyedi ẹdima mme mbono esop.  Kere ban̄a Alfredo, emi ọkọtọn̄ọde utom uyọhọ ini ke ini enye ekedide isua 11. Enye ọdọhọ ke ini imọ ikedide n̄kpọ nte isua ition, imọ ima idomo nditre ndidụk mme mbono esop koro idap ekesiyetde imọ edi ete ye eka imọ ikesiyakke imọ ide idap ke mme mbono esop. Enye eti ete: “Nte n̄kọkọride n̄kpon, mma ntọn̄ọ ndinyene udọn̄ ke mme mbono esop sụn̄sụn̄, akpan akpan ke mma n̄kekpep ndikot nnyụn̄ n̄wet n̄kpọ koro ini oro ke n̄kọtọn̄ọ ndinọ ibọrọ ke ikọ idem mi.”

Cintia, n̄kaiferi isua 17 oro anamde utom nte asiakusụn̄ ofụri ini, etịn̄ nte eti nsan̄a ekenen̄ede an̄wam imọ ndikọri ima nnọ utom Abasi. Enye ọdọhọ ete: “Edinyene eti itie ebuana ye nditọete ye edidụk mme mbono esop kpukpru ini an̄wam mi ntre ndikop mfụhọ editaba mme ufan ererimbot mi ye mme edinam oro mme uyen ẹmade, utọ nte edika unek. Ndikpan̄ utọn̄ nnọ mme ibọrọ oro ẹnọde ye mme ifiọkutom oro ẹbụkde ke mme mbono esop ama edemede mi udọn̄ ndinọ Jehovah ofụri se nnyenede, ndien ami n̄kere ke mfọnn̄kan n̄kpọ oro nnyenede edi uyen mi. Ntre mma mbiere ndida ini uyen emi nnam utom esie.”

Nte ededi, enye ama enyịme ete: “Mbemiso n̄kanade baptism, ini ama odu oro n̄kesiwakke nditaba mme mbono esop, ndade utomufọk m̀mê mme utom ufọkn̄wed eken nte ntak. Mma nsitaba ediwak mbono esop, ndien emi ama ọtọn̄ọ nditụk mi ke n̄kan̄ eke spirit. Mma ntọn̄ọ ndidụk nsan̄a ye eyeneren oro mîkekpepke Bible. Ye un̄wam Jehovah, mma nnam edinen̄ede ke ini.”

Ọkpọkpọ Ubiere

Ke ini ẹkebụpde Pablo, uyen efen oro anamde n̄kpọ Jehovah nte anamutom uyọhọ ini, se enye ekerede nte edide ata akpan n̄kpọ oro an̄wamde enye ndikọri ima nnọ akpanikọ Ikọ Abasi, enye ọkọdọhọ ete: “N̄kere ke edi n̄kpọ iba: ọkpọkpọ ukpepn̄kpọ ofụri ini ye edisịn ifịk ke utom ukwọrọikọ. Mmọkọm ete ye eka mi ke ndikekpep mi akpanikọ mban̄a Jehovah, ndien n̄kere ke emi edi mfọnn̄kan n̄kpọ oro mmọ ẹnọde mi. Nte ededi, ami ke idem mi n̄kenyene nditịm mfiọk ntak emi mmade Jehovah. Man nnam oro, ama oyom mi mfiọk se idide ‘ubom ye utụn̄ọ’ akpanikọ Bible. Edi n̄kukụre ke usụn̄ emi ke nnyịn ikeme ndinyene ọkpọsọn̄ udọn̄ nnọ Ikọ Jehovah, emi etiede nte ‘ikan̄ eke asakde’ nnyịn ke esịtidem onyụn̄ onụkde nnyịn nditịn̄ nnọ mbon en̄wen. Ifịk oro inyenede ke utom ukwọrọikọ ayanam esịtekọm oro inyenede inọ akpanikọ otụn̄ọ.”—Ephesus 3:18; Jeremiah 20:9.

Jacob Emmanuel, oro ẹketịn̄de ẹban̄a ke mbemiso, eti n̄ko ufọn edinam ọkpọkpọ ubiere ndinam n̄kpọ Jehovah. Enye ọdọhọ ke ete ye eka imọ akanam inyịkke imọ ndina baptism. “Mmenịm ke akpanikọ ke emi edi mfọnn̄kan usụn̄ uwem koro mmokụt nti utịp oro ẹsụn̄ọde. Ke uwụtn̄kpọ, ndusụk uyen oro n̄kesiwakde ndisan̄a kiet ẹma ẹnam ubiere ndina baptism ke ukem ini. Okposụkedi oro ọkọfọnde, mmekeme ndikụt ke ndusụk owo ikanamke emi ito esịt, koro ikebịghike ifịk mmọ ke utom Obio Ubọn̄ ama osụhọde. Amaedi okịm, ete ye eka mi ikenyịkke-nyịk mi ndinam ubiere ndiyak  idem mi nnọ Jehovah. Enye ekedi ọkpọkpọ ubiere.”

Udeme Oro Esop Enyenede

Ndusụk n̄kparawa owo ẹkpep akpanikọ Ikọ Abasi ke idemmọ, ye unana un̄wam ete ye eka mmọ. Enen̄ede edi ọkpọsọn̄ n̄kpọ ke mme utọ idaha oro ndikpep ndinam se inende nnyụn̄ nsọn̄ọ nda ke enye.

Noé eti adan̄a nte akpanikọ enyenede ufọn ọnọ imọ. Enye ekesidi owo iyatesịt ye owo afai toto ke ini enye ekedide ekpri. Ke ini enye ọkọtọn̄ọde ndikpep Bible ke edide isua 14, edu esie ama ọtọn̄ọ ndikpụhọde, anamde ete ye eka esie, emi mîkenyeneke udọn̄ ke Bible ke ini oro, ẹkop inemesịt. Nte Noé akakade iso ndinam n̄kọri ke n̄kan̄ eke spirit, enye okoyom ndisịn uwem esie ofụri ofụri ke utom Abasi. Enye odu ke utom uyọhọ ini idahaemi.

Kpasụk ntre, Alejandro ọkọtọn̄ọ ndinyene udọn̄ ke akpanikọ Christian ke ini enye ekedide ata ekpri, idem okposụkedi ete ye eka esie mîkenyeneke udọn̄. Ke owụtde esịtekọm aban̄a akpanikọ, enye ọdọhọ ete: “N̄kamana ndụk ubon Catholic. Edi mma ntọn̄ọ ndinyene ekikere mbon Communist oro owo mînịmke ke Abasi odu, sia ufọkabasi mîkọbọrọke mme mbụme oro ẹkefịnade mi toto ke ini n̄kedide eyenọwọn̄. Esop Jehovah ama an̄wam mi ndinyene ifiọk Abasi. Ifiọk emi anyan̄a uwem mi ke ata ata usụn̄ koro edieke mmen̄kpekekpepke Bible, eyedi n̄kpakabuana ke oburobụt ido, nnyene mbumehe un̄wọn̄ ọkpọsọn̄ mmịn, m̀mê uda n̄kpọsọn̄ ibọk. Eyedi n̄kpakakam n̄kabade ndi ubak otu oro ẹyomde ukpụhọde ke obio, nnyụn̄ mbọ ndiọi utịp oro ẹsitienede.”

Didie ke uyen ekeme ndisọn̄ọ nyom akpanikọ nnyụn̄ nsọn̄ọ mmụm enye n̄kama ye unana un̄wam ete ye eka esie? Nte an̄wan̄ade, mbiowo ye mbon eken ke esop ẹnen̄ede ẹnyene n̄kpọ ndinam ke afan̄ emi. Noé eti ete: “Akananam iketiehe mi ke idem nte ke ndu ikpọn̄ sia Jehovah etịmde ekpere mi kpukpru ini. N̄ko, ima ima nditọete mi iren ye iban oro ẹkabarede ẹdi mme ete, mme eka, ye nditọeka mi eke spirit ẹma ẹnọ mi ibetedem.” Idahaemi enye anam utom ke Bethel onyụn̄ ada ini esie anam utom Abasi. Kpasụk ntre, Alejandro obụk ete: “N̄kpọ oro ndiwụtde esịtekọm kpukpru ini mban̄a edi ufọn oro mbọde nto ndikodu ke esop oro otu mbiowo ẹkewụtde ima ima udọn̄ ke idem mi. Mmenen̄ede n̄wụt esịtekọm mban̄a emi koro ke ini n̄kọtọn̄ọde ndikpep Bible ke n̄kedide isua 16, editịmede esịt oro edide ọsọ n̄kpọ ọnọ mme uyen ama omụm mi n̄ko. Mme ubon oro ikodude esop kiet ikọkpọn̄ke mi. Mme owo ẹma ẹsiwụt mi mfọnido kpukpru ini ẹnyụn̄ ẹbuana ufọk ye udia mmọ ye ami, ẹma ẹnyụn̄ ẹnọ mi esịt mmọ n̄ko.” Alejandro omodu ke utom uyọhọ ini ke se iwakde ibe isua 13 idahaemi.

Ndusụk owo ẹkere ke ido ukpono edi n̄kpọ ikpọ owo kpọt. Nte ededi, ediwak n̄kparawa owo ẹmekpep akpanikọ Bible toto ke uyen ẹnyụn̄ ẹdi ẹdima Jehovah, ẹnyụn̄ ẹka iso ndinam akpanikọ nnọ enye. Ẹkeme ndida mme ikọ David oro ẹwetde ke Psalm 110:3 ntịn̄ mban̄a mme uyen emi: “Ikọt fo ẹdi enọ ima-esịt [“ẹyenọ idem mmọ unyịme unyịme,” NW] ke usen odudu fo, ke edisana mbana—oto ke idịbi usiere—afo emenyene mbara uyen fo.”

Edi n̄kpọ-ata ọnọ n̄kparawa owo ndikpep akpanikọ nnyụn̄ nsọn̄ọ nyịre ke enye. Nso n̄kpọ idatesịt ke edi ntem ndikụt ke ediwak owo ke ẹtịm ẹsịk ẹkpere esop Jehovah, ẹdụkde mme mbono esop kpukpru ini, ẹnyụn̄ ẹkpepde Bible ifịk ifịk. Ndinam ntem an̄wam mmọ ndikọri ntotụn̄ọ ima nnọ Ikọ Abasi ye utom esie!—Psalm 119:15, 16.

[Ikọ idakisọn̄]