Didie ke Ata Ndisana Owo Ẹkeme Ndin̄wam Fi?

KE N̄wed Abasi, mmanie ke ikọ Greek oro ẹkabarede “edisana owo” ada aban̄a? An Expository Dictionary of New Testament Words ọdọhọ ete: “Ke ẹtịn̄de ẹban̄a ediwak owo, nte emi ẹdade ẹtịn̄ ẹban̄a mme andinịm ke akpanikọ, enye ada aban̄a kpukpru utọ mme andinịm ke akpanikọ oro inyụn̄ inyeneke n̄kpọ ndinam ye mme owo oro ẹnyenede n̄wọrọnda edisana idaha m̀mê mbon emi ẹkedide ẹdidiọn̄ọ nte ndisana owo ke mmọ ẹma ẹkekpan̄a oto ke n̄wọrọnda nti edinam mmọ.”

Ke ntre, apostle Paul okokot kpukpru akpa mme Christian ata ndisana owo. Ke uwụtn̄kpọ, enye ama ọnọ leta oro enye ekewetde ke akpa isua ikie E.N. ẹsọk “esop Abasi oro odude ke Corinth, ye kpukpru ndisana owo emi ẹdude ke ofụri [ikpehe obio ukara Rome eke] Achaia.” (2 Corinth 1:1, NW) Ke ukperedem, Paul ama ewet leta “ọnọ ẹsọk kpukpru mmọ emi ẹdude ke Rome, emi Abasi amade, onyụn̄ okotde ete ẹdidi ndisana ikọt Esie.” (Rome 1:7) Ana in̄wan̄-in̄wan̄ nte ke ndisana owo emi ikakpaha kan̄a, owo ikonyụn̄ idaha mmọ nte mme ọwọrọiso owo ke ntak n̄wọrọnda eti ido mmọ, anamde mmọ ẹfọn ẹkan mme andinịm ke akpanikọ eken. Ke nso ntak ke ẹkenam mmọ ẹdi ndisana owo?

Abasi Anam Mmọ Ẹsana

Ikọ Abasi owụt ete ke owo m̀mê esop ikemeke ndinam owo edi edisana owo. N̄wed Abasi ọdọhọ ete: “[Abasi] ama anyan̄a nnyịn, onyụn̄ okot nnyịn edisana ikot; itoho ke se nnyịn inamde, edi oto ke uduak ye mfọn Esiemmọ.” (2 Timothy 1:9) Owo asana oto ke ikot oro Jehovah okotde enye, nte ekemde ye mfọnido Abasi oro owo mîdotke ye ke n̄kemuyo ye uduak Esie.

Ndisana owo eke esop Christian ẹdi mme andibuana ke “obufa ediomi.” Iyịp Jesus Christ oro ẹkeduọkde ọsọn̄ọ ediomi emi onyụn̄ anam mme andibuana ẹsana. (Mme Hebrew 9:15; 10:29; 13:20, 24) Sia ẹsanade ke enyịn Abasi, mmọ ẹdi ‘ndisana oku ẹnyụn̄ ẹwa uwa spirit, eke Abasi adarade ndibọ oto ke Jesus Christ.’—1 Peter 2:5, 9.

Ndibọn̄ Akam nnọ Ndisana Owo Nnyụn̄ Mben̄e Mmọ Ẹnam N̄kpeubọk ẹnọ Nnyịn

Sia ẹnịmde ke “ndisana owo” ẹkeme ndinọ mme andinịm ke akpanikọ san̄asan̄a odudu, ediwak miliọn owo ẹkpono mbiet mmọ m̀mê ẹbọn̄ akam ẹnọ mmọ nte mme esịne-ufọt. Nte emi edi ukpepn̄kpọ Bible? Ke Ukwọrọikọ Oro ke Obot, Jesus ama ekpep mme anditiene enye nte  ẹkpesan̄ade ẹkpere Abasi, ọdọhọde ete: “Ẹbọn̄ akam ntem ndien, ẹte, Ete nnyịn emi odude ke heaven: Yak ikpono enyịn̄ Fo.” (Matthew 6:9) Ẹsibọn̄ akam nte enende ẹnọ Jehovah Abasi kpọt.

Ke ukeme ndisọn̄ọ nte ke “ndisana owo” ẹkeme ndikpe Abasi ubọk, ndusụk mme ekpep ukpepn̄kpọ ido ukpono ẹsiak Rome 15:30, emi nnyịn ikotde ite: “Mmekpe mbufo ubọk, nditọ-ete, ke enyịn̄ Ọbọn̄ nnyịn Jesus Christ ye ke ima emi spirit esịnde nnyịn ke esịt, nte mbufo ẹtiene mi ẹn̄wana ẹbọn̄ akam ẹnọ Abasi ẹban̄a mi.” Nte Paul ekesịn udọn̄ ọnọ mme andinịm ke akpanikọ oro ndibọn̄ akam nnọ enye m̀mê ndikot enyịn̄ esie ke ini ẹsan̄ade ẹkpere Abasi? Baba. Okposụkedi Bible esịnde udọn̄ ọnọ edibọn̄ akam ke ibuot ata ndisana owo, idụhe ebiet ndomokiet ke Bible emi Abasi ọdọhọde nnyịn ibọn̄ akam inọ m̀mê ebe ke utọ ndisana owo emi.—Philippi 1:1, 3, 4.

Nte ededi, Abasi emek Andinam N̄kpeubọk kaban̄a mme akam nnyịn. Jesus Christ ọkọdọhọ ete: “Ami ndi usụn̄ ye akpanikọ ye uwem: owo baba kiet itieneke Ete, ibọhọke ebe ke Ami.” Jesus ama ọdọhọ n̄ko ete: “Nyonyụn̄ nnam n̄kpọ ekededi eke mbufo ẹdiben̄ede ke enyịn̄ Mi, man Ete enyene ubọn̄ ke Eyen. Edieke mbufo ẹben̄ede n̄kpọ ke enyịn̄ Mi, nyanam.” (John 14:6, 13, 14) Nnyịn imekeme ndinyene mbuọtidem nte ke Jehovah eyenyịme ndikop mme akam oro ẹbọn̄de ke enyịn̄ Jesus. Bible etịn̄ aban̄a Jesus ete: “Enye onyụn̄ ekeme ndinyan̄a mmọ emi ẹsan̄ade ke Enye ẹkpere Abasi ọyọhọ-ọyọhọ, sia Enye odude ke nsinsi ndinam n̄kpe-ubọk nnọ mmọ.”—Mme Hebrew 7:25.

Edieke Jesus enyịmede ndinam n̄kpeubọk ke ibuot nnyịn, ntak emi mme andituak ibuot ke Christendom ẹsiwakde ndibọn̄ akam nnọ “ndisana owo”? Ewetmbụk oro Will Durant odụn̄ọde ntọn̄ọ edinam emi ke n̄wed esie oro, The Age of Faith. Okposụkedi ọdọhọde ke ẹma ẹnyene ukpono ukpono uten̄e ẹnọ Ata Ọkpọsọn̄ Abasi onyụn̄ etiede nte ke ẹma ẹsinen̄ede ẹsan̄a ẹkpere Jesus, Durant ọdọhọ ete: “Ọkpọsọsọn̄ owo nditịn̄ ikọ ye [Jesus] iso ye iso ke enye ama okofụmi ndinam mme ikọ oro Enye eketịn̄de ke Ukwọrọikọ Esie Oro ke Obot ofụri ofụri. Etie nte ama owụt eti ibuot ndibọn̄ akam nnọ edisana owo oro ẹkedọhọde ke odu ke heaven sia ẹma ẹkemek enye edisana owo ke enye ama akakpa,  ndinyụn̄ mben̄e enye ekpe Christ ubọk.” Nte mme ekikere emi ẹnen?

Bible ekpep nnyịn ete ke ebede ke Jesus, nnyịn imekeme ndinyene “esịt ndisan̄a n̄kpere Abasi ye uko” ke ini ibọn̄de akam inọ Abasi. (Ephesus 3:11, 12) Ata Ọkpọsọn̄ Abasi iyomke usụn̄ ikpọn̄ ubonowo tutu etre ndikop mme akam nnyịn. David andiwet psalm ama ọbọn̄ akam ye mbuọtidem ete: “Afo emi okopde akam, kpukpru obụkidem ẹyetiene fi.” (Psalm 65:2) Utu ke ndinọ odudu ebe ke mbak idem “ndisana owo” oro ẹma ẹkekpan̄a, Jehovah esin̄wan̄a edisana spirit esie ọduọk mbon oro ẹben̄ede enye ke mbuọtidem. Jesus ama ọkọk ibuot ete: “Edieke mbufo emi ẹdiọkde ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak Edisana Spirit ọnọ mmọ eke ẹben̄ede Enye?”—Luke 11:13.

Utom Ndisana Owo

Ndisana owo emi Paul ekewetde leta ọnọ ẹsọk ẹma ẹkpan̄a ke ediwak isua ikie emi ẹkebede ndien nte ini akakade, mmọ ẹkenyene ndibọ “anyanya uwem,” kpa ediset ke n̄kpa ndụk heaven. (Ediyarade 2:10) Mme andituak ibuot nnọ Jehovah Abasi ẹfiọk ẹte ke ndikpono ata ndisana owo emi ikemke ye N̄wed Abasi inyụn̄ ikemeke ndikpeme owo nsio ke udọn̄ọ, mme oto-obot afanikọn̄, unana iwụk ke ndutịm uforo, usọn̄, m̀mê n̄kpa. Ntem, afo emekeme ndibụp, ‘Nte ndisana ikọt Abasi ẹnen̄ede ẹkere ẹban̄a nnyịn? Nte nnyịn ikpodori enyịn mmọ ndinam n̄kpọ ke ibuot nnyịn?’

Ntịn̄nnịm ikọ oro Daniel ekewetde etịn̄ akpan akpan aban̄a ndisana owo. Ke ọyọhọ isua 600 M.E.N., enye ama okụt aduai-owo-idem n̄kukụt emi edisu esie esịmde eyo nnyịn. Enyene-ndịk unam inan̄ emi ẹdade ẹban̄a ukara owo, emi mîkemeke ndiyụhọ mme ata udọn̄ ubonowo ẹma ẹto ke inyan̄ ẹwọn̄ọ ẹdi. Ekem, Daniel ama etịn̄ ntịn̄nnịm ikọ ete: “Ndien ndisana ikọt Ata Edikon̄ ẹyeda ubọn̄, ẹnyụn̄ ẹnyene ubọn̄ ke nsinsi ye ke nsinsi-nsinsi.”—Daniel 7:17, 18.

Paul ama ọsọn̄ọ ‘n̄kpọ akpa oro ndisana owo ẹnyenede,’ (NW) eke edidi nsan̄a mme ada udeme nnyene ye Christ ke heaven. (Ephesus 1:18-21) Iyịp Jesus ama eberede usụn̄ ọnọ edinam ndisana owo 144,000 ẹset ẹdụk ubọn̄ eke heaven. Apostle John ọkọdọhọ ete: “Ọfọfọn ọnọ owo emi enyenede udeme ke akpa ediset: enye edi edisana; udiana akpa n̄kpa inyeneke odudu ke idem mmọ emi: edi mmọ ẹyedi mme oku Abasi ye Christ, mmọ ẹyenyụn̄ ẹda ubọn̄ ye Enye ke tọsịn isua.” (Ediyarade 20:4, 6; 14:1, 3) Ke n̄kukụt, John ama okop ata ediwak edibotn̄kpọ eke heaven ẹkwọde ikwọ ke iso Jesus oro ẹnọde ubọn̄ ẹte: “Afo ama onyụn̄ ada iyịp Fo osio owo ke kpukpru esien, ye usem, ye obio, ye idụt, afak mmọ ọnọ Abasi; omonyụn̄ anam mmọ ẹdi Obio Ubọn̄ ye mme oku ẹnọ Abasi: mmọ ẹyenyụn̄ ẹda ubọn̄ ke isọn̄.” (Ediyarade 5:9, 10) Emi ọnọ ndọn̄esịt didie ntem! Jehovah Abasi ke idemesie emetịm emek iren ye iban emi. Akan oro, mmọ ẹnam utom ke edinam akpanikọ ke isọn̄, ẹkperede ndisobo kpukpru mfịna emi ubonowo osobode. (1 Corinth 10:13) Ke ntre, nnyịn imekeme ndinyene mbuọtidem nte ke ndisana owo emi ẹnamde ẹset ke n̄kpa mi ẹdidi mme andikara emi ẹtuade owo mbọm, ẹkerede ẹban̄a mme mmeme ye unana ukeme nnyịn.

Mme Edidiọn̄ ke Idak Ukara Obio Ubọn̄

Ke mîbịghike, ukara Obio Ubọn̄ ayanam n̄kpọ man osio kpukpru idiọkido ye ndutụhọ efep ke isọn̄. Ke ini oro, mme owo ẹyetịm ẹsan̄a ẹkpere Abasi ẹkan nte akanam edide. John ekewet ete: “Ndien n̄kop ọkpọsọn̄ uyo nte otode ke ebekpo ọwọrọ ete, Sese, ebiet idụn̄ Abasi omodu ye owo. Enye oyonyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie oyonyụn̄ odu ye mmọ, onyụn̄ edi Abasi mmọ.”  Emi ayada akpakịp edidiọn̄ ọsọk ubonowo, koro ntịn̄nnịm ikọ oro aka iso ete: “Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:3, 4.

Nso ini idatesịt ke oro edidi ntem! Ẹka iso ẹtịn̄ ẹban̄a mme utịp mfọnmma ukara Christ Jesus ye ndisana owo 144,000 ke mme ikọ emi ẹwetde ke Micah 4:3, 4: “[Jehovah] eyekpe ikpe ke otu ediwak mme idụt, onyụn̄ asua ọnọ n̄kpọsọn̄ mme idụt tutu esịm anyan ebiet; ndien mmọ ẹyeda ofụt mmọ ẹdom n̄kpọ ufụn̄isọn̄, ẹnyụn̄ ẹda eduat mmọ ẹdom ikwa udiọn̄-eto: ndien idụt idimenke ofụt itiene idụt, idinyụn̄ ikpepke aba ekọn̄. Ndien kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe: koro edi inua Jehovah mme udịm ọdọhọ.”

Ndisana owo ẹnọ mme owo ikot ndidi ndibuana ke mme utọ edidiọn̄ oro. Ata ndisana owo emi ẹdade ẹban̄a n̄wanndọ, ẹka iso ẹdọhọ ẹte: “Di.” Itien̄wed oro ọdọhọ n̄ko ete: “Owo eke onyụn̄ okopde, yak enye ọdọhọ ete, Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 22:17) Nso ke “mmọn̄ uwem” emi esịne? Ke adianade ye mme n̄kpọ eken, enye esịne nnennen ifiọk aban̄ade mme uduak Abasi. Jesus ọkọdọhọ ke akam oro ọkọbọn̄de ọnọ Abasi ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Ẹnyene ifiọk emi ẹbe ke ukpepn̄kpọ Bible ofụri ini. Nnyịn ikeme ndikop inemesịt didie ntem nte ke Ikọ Abasi anam nnyịn ikeme ndifiọk mbon emi ndisana owo ẹnen̄erede ẹdi inyụn̄ ifiọk nte Abasi edidade mmọ anam n̄kpọ ke nsinsi ufọn ubonowo!

[Ndise ke page 4]

Paul ama ewet leta eke odudu spirit ọnọ ẹsọk ata ndisana owo

[Ndise ke page 4, 5]

Mme anam-akpanikọ apostle Jesus ẹma ẹkabade ẹdi ata ndisana owo

[Ndise ke page 6]

Nnyịn imekeme ndibọn̄ akam ke mbuọtidem nnọ Abasi ebe ke Jesus Christ

[Ndise ke page 7]

Ndisana owo oro ẹnamde ẹset ẹdidi mme andikara isọn̄ oro ẹtuade owo mbọm