Jehovah Ekpep Nnyịn Ndibat Usen Nnyịn
Jehovah Ekpep Nnyịn Ndibat Usen Nnyịn
“Nam nnyịn ifiọk ndibat usen nnyịn ntem, man nnyịn ida esịt ifiọk idi.”—PSALM 90:12.
1. Ntak emi odotde ndiben̄e Jehovah ekpep nnyịn “ndibat usen nnyịn”?
JEHOVAH ABASI edi Andibot ye Andinọ nnyịn uwem. (Psalm 36:9; Ediyarade 4:10b) Owo en̄wen ekededi ikemeke ndikpep nnyịn nte ikpadade mme isua uwem nnyịn inam n̄kpọ ke usụn̄ oro owụtde eti ibuot. Do, andiwet psalm nte odotde ama eben̄e Abasi ete: “Nam nnyịn ifiọk ndibat usen nnyịn ntem, man nnyịn ida esịt ifiọk idi.” (Psalm 90:12) Ọyọhọ Psalm 90, ebiet emi nnyịn ikụtde eben̄e oro, enen̄ede odot se ikpodụn̄ọrede ye ntịn̄enyịn. Nte ededi, akpa kan̄a, ẹyak nnyịn itịn̄ ibio ibio se isịnede ke ikwọ eke odudu spirit Abasi emi.
2. (a) Anie ke ẹsiak nte edide andiwet Psalm 90, ndien ekeme ndidi ẹkewet enye ini ewe? (b) Didie ke ọyọhọ Psalm 90 okpotụk usụn̄ nte nnyịn isede uwem?
2 Ikọ enyọn̄ ibuotn̄wed Psalm 90 okot enye “akam Moses owo Abasi.” Sia psalm emi ọsọn̄ọde etịn̄ nte uwem owo omụhọde, eyedi ẹkewet enye ke ẹma ẹkesion̄o nditọ Israel ke ufụn Egypt ye ke ini isan̄ isua 40 mmọ ke wilderness, ke ini emana unana mbuọtidem oro mîkodụhe aba ke ntak n̄kpan̄a ediwak tọsịn owo. (Numbers 32:9-13) Ke usụn̄ ekededi, Psalm 90 owụt nte ke uwem mme anana-mfọnmma owo edi ibio. Do, nte an̄wan̄ade, nnyịn ikpenyene ndida mme ọsọn̄urua usen nnyịn nnam n̄kpọ ye eti ibuot.
3. Mme akpan n̄kpọ ewe ẹdọn̄ọ ke Psalm 90?
3 Ke Psalm 90, ufan̄ikọ 1 esịm 6 ẹnam ẹdiọn̄ọ Jehovah nte nsinsi ebietidụn̄ nnyịn. Ps 90 Ufan̄ikọ 7 esịm 12 ẹwụt se nnyịn iyomde man ida ibio isua uwem nnyịn inam n̄kpọ ke usụn̄ oro enye enyịmede. Ndien nte ẹtịn̄de ke Ps 90 ufan̄ikọ 13 esịm 17, enen̄ede ọdọn̄ nnyịn ndibọ ima mfọnido ye edidiọn̄ Jehovah. Edi akpanikọ, psalm emi ibemke iso itịn̄ iban̄a mme n̄kpọntịbe ke uwem nnyịn nte mme asan̄autom Jehovah. Edi, nnyịn ikpenyene ndida mme ikọ akam esie ọkpọkpọ. Ke ntre ẹyak itịm ise Psalm 90 nte mbon oro ẹyakde idem ẹnọ Abasi ẹsede enye.
Jehovah—“Ebiet Idụn̄” Nnyịn
4-6. Didie ke Jehovah edi “ebiet idụn̄” nnyịn?
4 Andiwet psalm eberede ye mme ikọ emi: “O Ọbọn̄, afo edi ebiet idụn̄ nnyịn ke ofụri emana. Ke ini ikpọ obot mîka-imanake kan̄a, ke afo [“mûka-umanke kan̄a isọn̄ ye ererimbot ke ubiak uman,” NW], kpa ke nsinsi-nsinsi afo edi Abasi.”—Psalm 90:1, 2.
5 “Nsinsi Abasi,” Jehovah, edi “ebiet idụn̄”—ebiet ubọhọ eke spirit—nnyịn. (Rome 16:26) Nnyịn imesinyene ifụre, koro enye odude kpukpru ini ndin̄wam nnyịn nte ‘Andikop akam.’ (Psalm 65:2) Koro nnyịn itopde mme editịmede esịt nnyịn inọ Ete nnyịn eke heaven ebe ke edima Eyen esie, ‘emem Abasi, emi ayan̄ade ifiọk owo, ekpeme nnyịn esịt ye ekikere.’—Philippi 4:6, 7; Matthew 6:9; John 14:6, 14.
6 Nnyịn imenyene ifụre eke spirit koro, ke nditịn̄ ke ndamban̄a usụn̄, Jehovah edi “ebiet idụn̄” nnyịn. Enye n̄ko amanam “mme ubet” ẹdu—eyedi emi enyene n̄kpet n̄kpet ebuana ye mme esop ikọt esie—nte ebiet ubọhọ eke spirit, emi mme ima ima ekpemerọn̄ ẹtịpde akamba akamba ẹsịn ke ndinam nnyịn inyene ifụre. (Isaiah 26:20; 32:1, 2; Utom 20:28, 29) Akan oro, ndusụk nnyịn ito mme ubon oro ẹma ẹkebịghi ke utom Abasi ndien imedifiọk nte ke enye edi ‘ebiet idụn̄ ke ofụri emana.’
7. Ke nso usụn̄ifiọk ke ‘ẹkeman’ ikpọ obot ẹkenyụn̄ ẹman ererimbot ke “ubiak uman”?
7 Jehovah ama odu mbemiso ikpọ obot ‘ẹkemanade’ m̀mê mbemiso ẹkemande ererimbot ke “ubiak uman.” Ke idaha ekikere owo, ndibot ererimbot ye kpukpru se idọn̄ọde ke enye, mmọn̄ibọk, ye awak-n̄kukọhọ ndudiọn̄ esie, ama oyom akamba ukeme. Ndien ke ndidọhọ nte ke ‘ẹkemaman’ ikpọ obot ye nte ke ẹkeman ererimbot ke “ubiak uman,” andiwet psalm owụt akwa ukpono aban̄a udomo utom oro akabuanade ke ini Jehovah okobotde mme n̄kpọ emi. Nte nnyịn ikpowụtke ukem ukpono ye esịtekọm oro iban̄a utom Andibot?
Jehovah Eben̄e Idem Kpukpru Ini Ndin̄wam Nnyịn
8. Nso ke ndidọhọ ke Jehovah edi Abasi “ke nsinsi-nsinsi” ọwọrọ?
8 Andiwet psalm ọkọkwọ ete: “Kpa ke nsinsi-nsinsi afo edi Abasi.” Akpasarade ikọ usem oro ẹkabarede ‘nsinsi’ ekeme ndida nnọ mme n̄kpọ oro ẹnyenede utịt edi oro owo mînịmke udomo ini. (Exodus 31:16, 17; Mme Hebrew 9:15) Nte ededi, ke Psalm 90:2 ye ke mme itie en̄wen ke N̄wed Abasi Usem Hebrew, ẹtịn̄ ẹban̄a anana-utịt ini, nte usụn̄ oro ẹkabarede enye owụtde. (Ecclesiastes 1:4) Nnyịn ikemeke ndifiọk nte Abasi ekemede ndidu ke nsinsi nsinsi. Edi, Jehovah ikenyeneke ntọn̄ọ idinyụn̄ inyeneke utịt. (Habakkuk 1:12) Enye ododu uwem kpukpru ini onyụn̄ eben̄e idem ndin̄wam nnyịn.
9. Andiwet psalm emen tọsịn isua uwem owo odomo ye nso?
9 Ẹma ẹnọ andiwet psalm odudu spirit ndimen tọsịn isua uwem owo ndomo ye ata ekpri ibio ini ke enyịn nsinsi Andibot. Ke etịn̄de aban̄a Abasi, enye ekewet ete: “Afo anam owo afiak ke ntan; onyụn̄ ọdọhọ ete, Mbufo, nditọ owo, ẹfiak (ke ntan). Koro afo abatde tọsịn isua nte n̄kpọn̄ ke ini enye ebede, ye nte efen [“ini ukpeme,” NW] ke okoneyo.”—Psalm 90:3, 4.
10. Didie ke Abasi anam owo “afiak ke ntan”?
10 Owo ekeme ndikpa, ndien Abasi anam enye “afiak ke ntan.” Oro edi, owo akabade “ntan” isọn̄. Ke nditịm ntịn̄, Jehovah ọdọhọ ete: ‘Fiak ke ntan isọn̄ emi ẹkedade ẹbot fi.’ (Genesis 2:7; 3:19) Emi abuana kpukpru owo—mbon oro ẹkopde odudu ye mbon oro mîkopke, mme imọ ye ubuene—koro baba anana-mfọnmma owo kiet ‘ikemeke ndifak eyen-ete, inyụn̄ ikemeke ndinọ Abasi n̄kpọ usio-isop, man enye osụk odu uwem ke nsinsi.’ (Psalm 49:6-9) Edi nnyịn ikop inemesịt didie ntem nte ke ‘Abasi ama ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye Enye ekpenyene nsinsi uwem’!—John 3:16; Rome 6:23.
11. Ntak emi nnyịn ikemede ndidọhọ ke se nnyịn idade ke anyan ini enen̄ede omụhọ ke enyịn Abasi?
11 Ke idaha ekikere Jehovah, idem Methuselah oro ekedide isua 969 ikodụhe uwem isịm usen kiet. (Genesis 5:27) Ke enyịn Abasi tọsịn isua etie nte n̄kpọn̄—ini edide n̄kpasịp hour 24—ke ini enye ebede. Andiwet psalm ama ọdọhọ n̄ko ete ke enyịn Abasi tọsịn isua etie nte hour inan̄ emi owo ukpeme ekpemede itienna ke okoneyo. (Judges 7:19) Do, nte an̄wan̄ade, se nnyịn idade ke anyan ini enen̄ede omụhọ ke enyịn nsinsi Abasi, Jehovah.
12. Didie ke Abasi ‘emen mme owo efep’?
12 Ke okpụhọrede ye Abasi oro odude uwem ke nsinsi, uwem oro owo odude idahaemi enen̄ede edi ibio. Andiwet psalm ọdọhọ ete: “Afo ada ukwọ emen mmọ efep; mmọ ẹtie nte idap. Ọkọri ke usenubọk nte mbiet; ke usenubọk ke enye etịbe, ndien ọkọri; ke mbubịteyo ke ẹsịbe enye ẹfep, ndien enye akpa.” (Psalm 90:5, 6) Moses ama okụt nte ediwak tọsịn nditọ Israel ẹkekpan̄ade ke wilderness, Abasi ‘ekemen mmọ efep’ nte ke ukwọ. Ẹkabade ikpehe psalm emi nte: “Afo ada idap n̄kpa emen mme owo efep.” (New International Version) Ke n̄kan̄ eken, ini uwem mme anana-mfọnmma owo etie nte “idap” ibio ini—oro ebietde idap okoneyo kiet kpọt.
13. Didie ke nnyịn itie “nte mbiet,” ndien didie ke emi okpotụk usụn̄ ukere n̄kpọ nnyịn?
13 Nnyịn itie ‘nte mbiet oro ọkọride ke usenubọk’ edi eyemerede ke mbubịteyo ke ọkpọsọn̄ ufiop utịn. Ih, uwem nnyịn edi ibio nte mbiet oro eyemerede ke usen kiet kpọt. Ke ntre, ẹyak nnyịn ikûbiat ọsọn̄urua inyene emi. Utu ke oro, nnyịn ikpenyene ndiyom ndausụn̄ Abasi ke nte ikpadade mme isua uwem nnyịn oro ẹsụhọde ke editịm n̄kpọ emi inam n̄kpọ.
Jehovah An̄wam Nnyịn “Ndibat Usen Nnyịn”
14, 15. Psalm 90:7-9 ekenyene nso edisu ke idem nditọ Israel?
14 Ke etịn̄de aban̄a Abasi, andiwet psalm adian do ete: “Koro iyatesịt fo esịnde nnyịn itak; ifụtesịt fo onyụn̄ esịn nsia oyomo nnyịn. Afo emenịm mme idiọk ido nnyịn ke iso fo; enịm ndịbe-ndịbe n̄kpọ nnyịn ke un̄wana iso fo. Koro kpukpru mme usen nnyịn ẹkabarede ẹdaha ke iyatesịt fo: nnyịn ima isua nnyịn nte ekikere kiet [nte ibifịk inua, NW].”—Psalm 90:7-9.
15 Nditọ Israel oro ẹkenanade mbuọtidem ẹma ‘ẹtak ke iyatesịt Abasi.’ ‘Ifụtesịt esie ama esịn nsia oyomo mmọ.’ Ẹma ‘ẹsuan mme okpo ndusụk mmọ ẹduọn̄ọ ke desert’ nte utịp ubiereikpe Abasi. (1 Corinth 10:5) Jehovah ama ‘enịm mme idiọk ido mmọ ke iso esie.’ Enye ama okot mmọ ẹdinam ibat kaban̄a an̄wan̄wa idiọk edinam mmọ, edi idem “ndịbe-ndịbe n̄kpọ,” m̀mê ndedịbe idiọkn̄kpọ mmọ, ẹkedu ‘ke un̄wana iso esie.’ (Mme N̄ke 15:3) Nte mme andisobo iyatesịt Abasi, nditọ Israel oro mîkakabakede esịt ‘ẹkema isua mmọ nte ibifịk inua.’ Ke ntak oro, ibio ibio isua uwem nnyịn ebiet ibifịk oro ọwọrọde nnyịn ke inua ke ini itịn̄de ikọ.
16. Edieke edide ndusụk owo ẹdịbe ẹnam idiọkn̄kpọ, nso ke mmọ ẹkpenam?
16 Edieke owo nnyịn ekededi edịbede anam idiọkn̄kpọ, nnyịn imekeme ndidịp mme ekemmọ owo utọ edinam oro ke ekpri ibio ini. Edi ndedịbe idiọkn̄kpọ nnyịn ‘ana ke un̄wana iso Jehovah,’ ndien mme edinam nnyịn ẹyebiat itie ebuana nnyịn ye enye. Man ifiak inyene n̄kpet n̄kpet itie ebuana ye Jehovah, oyoyom nnyịn ibọn̄ akam iben̄e enye efen ọnọ nnyịn, ikpọn̄ idiọkn̄kpọ nnyịn, inyụn̄ inyịme un̄wam eke spirit otode mbiowo Christian ye esịtekọm. (Mme N̄ke 28:13; James 5:14, 15) Oro ọkpọfọn didie ntem akan ‘ndima isua nnyịn nte ibifịk inua,’ isịnde idotenyịn nsinsi uwem nnyịn ke itiendịk!
17. Ini uwem owo edi isua ifan̄ ke ofụri ofụri, ndien mme isua uwem nnyịn ẹyọhọ ye nso?
17 Kaban̄a ini uwem mme anana-mfọnmma owo, andiwet psalm ọdọhọ ete: “Isua ata ye duop ẹdu ke eyo uwem nnyịn, ye isua anan̄, edieke nsọn̄idem odude; ndien iseri mmọ ẹdi ọkpọsọn̄ utom ye ukụt: koro enye (isua) awarade ndibe, ndien nnyịn idan̄a.” (Psalm 90:10) Ini uwem owo ke ofụri ofụri edi isua 70, ndien ke edide isua 85, Caleb ama etịn̄ aban̄a n̄wọrọnda odudu esie. Mme owo ẹma ẹdu oro ẹkedude awak akan oro, utọ nte Aaron (123), Moses (120), ye Joshua (110). (Numbers 33:39; Deuteronomy 34:7; Joshua 14:6, 10, 11; 24:29) Edi ke otu anana-mbuọtidem emana oro ọkọwọrọde ke Egypt, mbon emi ẹkebatde ọtọn̄ọde ke owo isua 20 ye mmọ emi ẹkebede oro ẹma ẹkpan̄a ke ufan̄ isua 40. (Numbers 14:29-34) Mfịn, ke ediwak idụt ini uwem owo ke ofụri ofụri odu ke udomo ini oro andiwet psalm etịn̄de aban̄a. Mme isua uwem nnyịn ẹyọhọ ye “ọkpọsọn̄ utom ye ukụt.” Mmọ ẹwara ndibe, “ndien nnyịn idan̄a.”—Job 14:1, 2.
18, 19. (a) Nso ke “ndibat usen nnyịn ntem, man nnyịn ida esịt ifiọk idi” ọwọrọ? (b) Nnyịn ndida eti ibuot nnam n̄kpọ edinụk nnyịn ndinam nso?
18 Ekem andiwet psalm ọkwọ ete: “Anie owo ọfiọk odudu iyatesịt fo, ye ifụtesịt fo, nte ekemde ke uten̄e fo? Nam nnyịn ifiọk ndibat usen nnyịn ntem, man nnyịn ida esịt ifiọk idi.” (Psalm 90:11, 12) Baba owo nnyịn kiet itịmke ifiọk odudu iyatesịt Abasi m̀mê udomo ifụtesịt esie, ndien emi ekpenyene ndinam nnyịn inen̄ede iten̄e Jehovah. Ke akpanikọ, emi ekpenyene ndinụk nnyịn ndibụp enye ‘nte nnyịn ikemede ndibat usen nnyịn man nnyịn ida esịt ifiọk idi.’
19 Mme ikọ andiwet psalm ẹdi akam oro enye ọbọn̄de ọnọ Jehovah ete ekpep ikọt esie ndiwụt eti ibuot ke ndida mme usen mmọ emi ẹsụhọde ke ọsọn̄urua nnyụn̄ nda mmọ nnam n̄kpọ ke usụn̄ oro Abasi enyịmede. Idotenyịn uwem isua 70 edi idotenyịn ndidu uwem ke n̄kpọ nte usen 25,500. Nte ededi, inamke n̄kpọ m̀mê nnyịn idi isua ifan̄, ‘nnyịn ifiọkke se iditịbede n̄kpọn̄, koro nnyịn idi ntụhube, emi ọwọrọde ke ekpri ini, ndien ebe efep.’ (James 4:13-15) Sia ‘ini ye unọmọ ẹtịbede ẹnọ nnyịn kpukpru,’ nnyịn ikemeke nditịn̄ m̀mê nnyịn ididu uwem ebịghi adan̄a didie. Ke ntre ẹyak nnyịn ibọn̄ akam iben̄e eti ibuot ndiyọ mme idomo, ndinam n̄kpọ nte enende ye mbon en̄wen, ndinyụn̄ nnam ofụri ukeme nnyịn ke utom Jehovah idahaemi—mfịn! (Ecclesiastes 9:11; James 1:5-8) Jehovah ada nnyịn usụn̄ ebe ke Ikọ esie, spirit esie, ye esop esie. (Matthew 24:45-47; 1 Corinth 2:10; 2 Timothy 3:16, 17) Ndida eti ibuot nnam n̄kpọ oyonụk nnyịn ‘ndibem iso nyom Obio Ubọn̄ Abasi’ ndinyụn̄ nda mme usen nnyịn nnam n̄kpọ ke usụn̄ oro ọnọde Jehovah ubọn̄ onyụn̄ adatde enye esịt. (Matthew 6:25-33; Mme N̄ke 27:11) Nte ededi, ndituak ibuot nnọ enye ke ofụri esịt idinamke nnyịn ibọhọ kpukpru mfịna nnyịn, edi oro ke akpanikọ oyosụn̄ọ ke akwa idatesịt.
Edidiọn̄ Jehovah Ada Idatesịt Ọsọk Nnyịn
20. (a) Ke nso usụn̄ ke Abasi ‘esitua n̄kpọfiọk’? (b) Didie ke Jehovah edinam n̄kpọ ye nnyịn edieke nnyịn inamde akwa idiọkn̄kpọ edi ituade n̄kpọfiọk ofụri esịt?
20 Ekpenem didie ntem edieke nnyịn ikpekemede ndidat esịt ke ofụri ini uwem nnyịn oro ẹsụhọde! Ke afan̄ emi, Moses ekpe ubọk ete: “Fiak di, O Jehovah, adan̄a didie! Nyụn̄ tua n̄kpọfiọk ban̄a ikọt fo. Nọ nnyịn ima [m̀mê, “ima akpanikọ”] fo ke usenubọk yụhọ; ndien esịt ayadat onyụn̄ enem nnyịn ke ofụri uwem nnyịn.” (Psalm 90:13, 14; ikọ idakisọn̄ NW) Abasi isinamke ndudue. Nte ededi, enye ‘esitua n̄kpọfiọk’ onyụn̄ ‘afiak edem’ ke iyatesịt esie ye ke ndinọ ufen ke ini ntọt emi enye ọnọde kaban̄a utọ edinam oro onụkde mme anamidiọk oro ẹkabarede esịt ndikpụhọde edu mmọ. (Deuteronomy 13:17) Ntre idem ọkpọkọm nnyịn ima inam akwa idiọkn̄kpọ edi iwụt ata editua n̄kpọfiọk, Jehovah ‘ọyọnọ nnyịn ima esie oyụhọ,’ ndien nnyịn iyenyene ntak ‘ndikwọ ke idatesịt.’ (Psalm 32:1-5) Ndien ke nditiene nnennen usụn̄ uwem, nnyịn iyokụt nte ke Abasi enyene ima akpanikọ ọnọ nnyịn iyonyụn̄ ikeme ‘ndinem esịt ke ofụri uwem nnyịn’—ih, ke ofụri ini uwem nnyịn oro ẹsụhọde.
21. Ke mme ikọ oro ẹwetde ke Psalm 90:15, 16, ekeme ndidi nso ke Moses ekeben̄e?
21 Andiwet psalm eben̄e ke ofụri esịt ete: “Dat nnyịn esịt nte mme usen emi afo otụhọde nnyịn ẹsan̄ade, ye mme isua emi nnyịn ikụtde idiọk. Da se afo anamde wụt ikọt fo; nyụn̄ wụt nditọ mmọ uyai fo.” (Psalm 90:15, 16) Ekeme ndidi Moses ekeben̄e Abasi ete anam idatesịt Israel okpon, m̀mê ebịghi, nte mme usen ukụt mmọ ye mme isua emi mmọ ẹkebọde ufen. Enye ama eben̄e ete Abasi ada se enye “anamde” ndidiọn̄ nditọ Israel owụt mme asan̄autom Esie onyụn̄ owụt nditọ mmimọ uyai Esie. Nte odotde, nnyịn imekeme ndibọn̄ akam ite ẹdiọn̄ okopitem ubonowo ke obufa ererimbot oro Abasi ọn̄wọn̄ọde.—2 Peter 3:13.
22. Nte Psalm 90:17 ọdọhọde, nso ke nnyịn nte odotde ikeme ndibọn̄ akam mben̄e?
22 Psalm 90 eberi ye eben̄e emi: “Nam uyai Jehovah Abasi nnyịn odoro nnyịn ke idem: nyụn̄ nam se ubọk nnyịn ẹnamde ọsọn̄ọ ada ye nnyịn: nyụn̄ nam se ubọk nnyịn ẹnamde ọsọn̄ọ ada.” (Psalm 90:17) Mme ikọ emi ẹwụt ẹte ke nnyịn nte enende imekeme ndibọn̄ akam ite Abasi ọdiọn̄ mme ukeme nnyịn ke utom esie. Nte mme Christian oro ẹyetde aran m̀mê mme nsan̄a mmọ, “mme erọn̄ en̄wen,” nnyịn imokop idatesịt nte ke “uyai Jehovah” odoro nnyịn ke idem. (John 10:16) Nnyịn ikop inemesịt didie ntem nte ke Abasi ‘anam se ubọk nnyịn ẹnamde ọsọn̄ọ ada’ nte mme anditan̄a Obio Ubọn̄ ye ke mme usụn̄ en̄wen!
Ẹyak Nnyịn Ika Iso Ndibat Usen Nnyịn
23, 24. Didie ke nnyịn ikeme ndibọ ufọn nto editie n̄kere ọyọhọ Psalm 90?
23 Editie n̄kere ọyọhọ Psalm 90 ekpenyene ndinam nnyịn idọdiọn̄ iberi edem ke Jehovah, kpa “ebiet idụn̄” nnyịn. Ebede ke nditie n̄kere mme ikọ esie ẹban̄ade nte uwem omụhọde, nnyịn ikpenyene nditetịm n̄kụt nte ke imoyom ndausụn̄ Abasi ke ndibat usen nnyịn. Ndien edieke nnyịn ikade iso ndiyom ndinyụn̄ nda ọniọn̄ Abasi nnam n̄kpọ, ke akpanikọ nnyịn iyọbọ ima-mfọnido ye edidiọn̄ Jehovah.
24 Jehovah ayaka iso ndikpep nnyịn ndibat usen nnyịn. Ndien edieke nnyịn inamde item esie, nnyịn iyekeme ndika iso ndibat usen nnyịn ke nsinsi nsinsi. (John 17:3) Nte ededi, edieke nnyịn idoride enyịn ndinyene nsinsi uwem, ana Jehovah edi ebiet ubọhọ nnyịn. (Jude 20, 21) Nte nnyịn idikụtde ke ibuotikọ oro etienede, ẹnam akpan n̄kpọ emi enen̄ede an̄wan̄a ke mme ọnọ-nsịnudọn̄ ikọ eke ọyọhọ Psalm 91.
Didie ke Afo Ọkpọbọrọ?
• Didie ke Jehovah edi “ebiet idụn̄” nnyịn?
• Ntak emi nnyịn ikemede ndidọhọ ke Jehovah eben̄e idem kpukpru ini ndin̄wam nnyịn?
• Didie ke Jehovah an̄wam nnyịn “ndibat usen nnyịn”?
• Nso inam nnyịn ‘inem esịt ke ofụri uwem nnyịn’?
[Mme Mbụme Ukpepn̄kpọ]
[Ndise ke page 11]
Jehovah ama ededi Abasi “ke ini ikpọ obot mîka-imanake kan̄a”
[Ndise ke page 12]
Ke idaha ekikere Jehovah, Methuselah oro ekedide isua 969 ikodụhe uwem isịm usen kiet
[Mme ndise ke page 14]
Jehovah ‘anam se ubọk nnyịn ẹnamde ọsọn̄ọ ada’