Mme Mbụme Ẹtode Mme Andikot

Ke ẹkerede ẹban̄a mme ewụhọ Bible kaban̄a nnennen usụn̄ ndida iyịp nnam n̄kpọ, didie ke Mme Ntiense Jehovah ẹse mme usụn̄ usọbọidem oro ẹdade iyịp enyene-idem ẹnam?

Utu ke ndibiere ofụri ofụri ntiene se owo amade ọkpọkpọ m̀mê ndusụk ibọkusọbọ oro ẹtorode, Christian kiet kiet ekpenyene ndinen̄ede n̄kere se Bible ọdọhọde. Enye edi mbubehe esie ye Jehovah.

Jehovah, emi ọkọnọde nnyịn uwem, ama owụk ete ke owo ikpenyeneke ndidia iyịp. (Genesis 9:3, 4) Ke Ibet ọkọnọde Israel eset, Abasi ama enịm adan̄a ke edida iyịp nnam n̄kpọ koro iyịp adade ọnọ uwem. Enye ama owụk ete: ‘Uwem unam odu ke iyịp; ami mmonyụn̄ nda enye, ndori ke itie uwa nnọ mbufo, ndisio isop nnọ ukpọn̄ mbufo.’ Nso edieke owo okowotde unam ndida nnam udia? Abasi ọkọdọhọ ete: “Yak enye ọduọk iyịp esie, ndien ada ntan ofụk enye.” * (Leviticus 17:11, 13) Jehovah ama etịn̄ afiak etịn̄ ewụhọ emi. (Deuteronomy 12:16, 24; 15:23) Soncino Chumash eke mme Jew ọdọhọ ete: “Owo inyeneke ndisio iyịp nnịm edi ẹnyene ndinam enye okûdot se ẹdiade ebe ke ndiduọk enye ke isọn̄.” Eyen Israel ndomokiet ikenyeneke ndida, ndibọ nnịm, ndinyụn̄ nda iyịp edibotn̄kpọ efen, emi Abasi ekedide andinyene uwem esie, nnam n̄kpọ.

Mbiomo edinịm Ibet Moses ama etre ke ini Messiah ama akakpa. Edi, ekikere Abasi kaban̄a edisana idaha eke iyịp osụk ododu. Ke edide se edisana spirit Abasi onụkde, mme apostle ẹma ẹteme mme Christian ẹte ‘ẹbet iyịp.’ Owo ikenyeneke ndida ewụhọ oro mfefere mfefere. Enye ekedi akpan n̄kpọ ke n̄kan̄ ido uwem ukem nte edibet oburobụt ido idan̄ m̀mê ukpono ndem. (Utom 15:28, 29; 21:25) Ke ini edinọ ye edikịm iyịp nsịn ke idem akakabarede edi ọsọ n̄kpọ ke ọyọhọ isua ikie 20, Mme Ntiense Jehovah ẹma ẹfiọk ẹte ke edinam emi ama atuaha ye Ikọ Abasi. *

Ke ini ke ini, abiaibọk ọyọdọhọ owo udọn̄ọ ete osio iyịp esie enịm ediwak urua mbemiso usiakidem (edisio iyịp enyene-idem nnịm mbemiso usiakidem, m̀mê PAD) man otodo edieke edide se ẹyomde, enye ekeme ndida ọkpọkpọ iyịp owo udọn̄ọ oro ẹkesiode ẹnịm n̄kịm nsịn enye ke idem. Nte ededi, utọ edibọ, edinịm, ye edikịm iyịp nsịn ke idem oro atuaha nnennen nnennen ye se ẹtịn̄de ke Leviticus ye Deuteronomy. Owo inyeneke ndibọ iyịp nnịm; ẹnyene ndiduọk enye ke isọn̄—ẹfiakde ẹnọ ẹsọk Abasi,  yak idọhọ ntre. Edi akpanikọ, Ibet Moses inyeneke odudu idahaemi. Kpa ye oro, Mme Ntiense Jehovah ẹkpono mme edumbet Abasi oro ẹsịnede ke enye, ndien mmọ ẹbiere ‘ndibet iyịp.’ Ntem, nnyịn isinọhọ iyịp, m̀mê nnyịn ndinịm iyịp nnyịn oro ‘ikpọduọkde’ nnọ edikịm nsịn ke idem. Edinam oro atuaha ye ibet Abasi.

Mme usụn̄ usọbọidem m̀mê ndomonse eken oro ẹbuanade iyịp enyene-idem inen̄ekede ituaha ye mme edumbet oro Abasi ọkọnọde. Ke uwụtn̄kpọ, ediwak Christian ẹnyịme ẹsio ndusụk iyịp mmọ ẹnam ndomonse m̀mê ndụn̄ọde, ke oro ebede ẹduọkde iyịp ndomonse oro. Ẹkeme n̄ko nditoro mme usụn̄ usọbọidem en̄wen oro ẹnen̄erede ẹwak n̄kukọhọ emi ẹbuanade iyịp enyene-idem.

Ke uwụtn̄kpọ, ke ini ndusụk edinam usiakidem, ẹkeme ndiwọn̄ọde ndusụk iyịp ke idemowo ke ndutịm oro ẹkotde edibuak mmọn̄ibọk ke iyịp. Ẹbuak mmọn̄ibọk ke iyịp oro osụhọde owo udọn̄ọ ke idem. Ekem, ẹwọn̄ọde iyịp esie oro odude ke n̄kpọ usan̄a iyịp oro ọwọrọde ọkpọn̄ idem esie ẹfiak ẹdisịn enye ke idem, ke ntem anamde udomo iyịp esie ekpere ndidọk nsịm nnennen idaha. Ukem ntre, ẹkeme ndikot iyịp oro asan̄ade odụk enyịn unan ẹnyụn̄ ẹdụhọde man ẹkeme ndinam mme ndatndat nsen iyịp oro ẹfiak ẹkedụk owo udọn̄ọ oro idem; ẹkot emi edidụhọde nsen iyịp. Ke isio isio ndutịm, ẹkeme ndiwọn̄ọde iyịp nsịn ke ukwakutom oro ke ibio ini anamde utom oro mme ndido idemowo ẹsinamde (ke uwụtn̄kpọ, esịt, obufre, m̀mê ekpụt). Ekem ẹnam iyịp oro odude ke ukwakutom oro afiak okodụk owo udọn̄ọ oro idem. Ke mme ndutịm en̄wen, ẹsiwọn̄ọde iyịp ẹsịn ke ukwak udụhọde-iyịp man odụhọde mme ikpehe esie oro ẹbiarade. Mîdịghe utịtmbuba ekeme ndidi man ẹsion̄o ndusụk ikpehe iyịp ẹnyụn̄ ẹda ẹsịn ke itie en̄wen ke idemowo. Mme ndomonse ẹdu n̄ko oro ẹsiode ndusụk udomo iyịp man ẹda ẹbuak ye ibọkusọbọ, ekem ẹfiak ẹsịn owo udọn̄ọ oro ke idem.

Mme ntọt ẹkeme ndikpụhọde, ndien ẹyesio mbufa ndutịm, usọbọ, ye mme ndomonse ẹdi. Idịghe mbubehe nnyịn ndidụn̄ọde ukpụhọde kiet kiet nnyụn̄ nnọ ubiere. Ana Christian ebiere ọnọ idemesie nte ẹdidade iyịp esie ẹnam n̄kpọ ke ini usiakidem, ndomonse ibọkusọbọ, m̀mê usọbọ idahaemi. Anyan ini mbemiso ini oro, enye ekpenyene ndibọ ọyọhọ ntọt nto abiaibọk m̀mê abiausọbọ kaban̄a se ẹdidade iyịp esie inam ke ini usiakidem oro. Ndien enye enyene ndibiere nte ekemde ye se ubieresịt esie enyịmede. (Se ekebe.)

Ana mme Christian ẹkere ẹban̄a uyakidem mmọ nnọ Abasi ye mbiomo ‘edima enye ke ofụri esịt, ofụri ukpọn̄, ofụri odudu, ye ofụri ekikere mmọ.’ (Luke 10:27) Ke mîbietke ediwak owo ke ererimbot, Mme Ntiense Jehovah ẹnen̄ede ẹda itie ebuana mmọ ye Abasi ke ọsọn̄urua n̄kpọ. Andinọ Uwem eteme kpukpru owo ete ẹbuọt idem ke iyịp Jesus oro ẹkeduọkde. Nnyịn ikot ite: “Nnyịn inyụn̄ inyene ubọhọ-ufụn nnyịn ke Enye [Jesus Christ] oto ke iyịp Esie, kpa edifen mme idiọk-n̄kpọ nnyịn.”—Ephesus 1:7.

[Mme Ikọ idakisọn̄]

[Ekebe/Mme ndise ke page 31]

MME MBỤME NDIBỤP IDEMFO

Edieke ẹdisiode ndusụk iyịp mi ẹkpọn̄ idemmi ẹnyụn̄ ẹkam ẹnamde enye etre ndisan̄a ke ibio ibio ini, nte ubieresịt mi eyenyịme ami nsụk nse iyịp emi nte ubak idemmi, ke ntem mîyomke ‘ẹduọk ke isọn̄’?

Ndi ayafịna ubieresịt mi oro Bible ọnọde ukpep edieke edide ke ini edinam udiọn̄ọ uduot udọn̄ọ m̀mê ndutịm usọbọidem ẹsio ndusụk iyịp mi, ẹbuak ibọk, ndien ẹfiak ẹsịn mi ke idem?