SE ITỊBEDE KE ERERIMBOT
Africa
Ediwak owo ye nsio nsio n̄ka ke ẹsịn ukeme ndinam n̄kpọ ọfọn ke Africa. Kpa ye ofụri emi, ata ikpọ mfịna ẹsụk ẹdodu ke Africa.
Se Ẹnamde Isantịm
Okposụkedi emi ukara mînyịmeke ẹwot isantịm ke South Africa, ẹma ẹwot isantịm 13 ke 2007. Edi ke 2013, ẹkewot isantịm 1,004. Kpa ye ata ediwak nnụk isantịm emi ẹkenyamde isua oro, mme owo ke ẹsụk ẹyoyom, ndien oro anam enye ọsọn̄ urua akan gold. Nnụk kiet kpọt ekeme ndibe miliọn naira 80.
KERE ISE: Ndi ukara ẹyekeme nditre ubiatibet?—Jeremiah 10:23.
UBỌKEDEM ORO OWO MÎTỊN̄KE
Itieutom emi ẹsinamde ẹdiọn̄ọ idụt oro ẹdiade inọ ẹkan ke ofụri ererimbot ẹdọhọ ke mme idụt oro ẹdude ke Edem Usiahautịn Africa ẹbọ ubọkedem ẹkan ke ofụri ererimbot. Ekpere ndidi kpukpru owo emi ẹsikụtde nte ẹbọde ubọkedem isitịn̄ke. Akwaowo itieutom oro ke Kenya ọdọhọ ete: “Mme owo isitịn̄ke sia mmọ ẹdiọn̄ọ ke ukara idinamke n̄kpọ ndomokiet ọkpọkọm itetịn̄.”
SE BIBLE ỌDỌHỌDE: “Kûbọ owo ubọkedem, koro ubọkedem ekịmde mme okụt-usụn̄ enyịn.” —Exodus 23:8.
MBON AFRICA EMI ẸSIDỤKDE INTANET
N̄ka oro ẹsede n̄kpọ ẹban̄a nte mme owo ke ofụri ererimbot ẹnemede nneme ke fon ye Intanet ẹdọhọ ke ẹkekere ke owo 20 ke otu kpukpru owo 100 ke Africa ẹdisidụk Intanet etisịm utịt isua 2014. Edi ibat mbon oro ẹdụkde Intanet ke Africa awak utịm ikaba akan nte ẹkekerede.
