SE BIBLE ETỊN̄DE ABAN̄A
N̄kpa
Mme akpan̄kpa ẹdu m̀mọ̀n̄?
‘Afo edi ntan, oyonyụn̄ afiak ke ntan.’ —Genesis 3:19.
SE MME OWO ẸTỊN̄DE
Ndusụk owo ẹnịm ke owo ama akpa ke esika heaven, hell, purgatory, m̀mê Limbo. Mbon en̄wen ẹnịm ke owo ama akpa, ke enye esifiak amana. Edi mbon oro mîsikaha ufọkabasi ẹdọhọ ke owo ama akpa ke esie okụre.
SE BIBLE ỌDỌHỌDE
Ecclesiastes 9:10 ọdọhọ ke ‘baba utom, baba uduak, baba ifiọk, baba ọniọn̄ idụhe ke Udi, kpa ebiet emi afo akade.’ Bible etịn̄ se isitịbede ke ini owo m̀mê unam akpade. Enye ọdọhọ ete: “Kpukpru mmọ ẹka itie kiet. Kpukpru mmọ ẹto ke ntan, kpukpru mmọ ẹnyụn̄ ẹfiak ke ntan.”—Ecclesiastes 3:20.
Nso isitịbe inọ mme akpan̄kpa?
“Ibifịk esie ọwọrọ, enye afiak ke ntan; kpa ke usen oro mme ekikere esie ẹtak.”—Psalm 146:4.
SE MME OWO ẸTỊN̄DE
Ediwak owo ẹdọhọ ke se owo anamde ke ini odude uwem esibiere se iditịbede inọ enye ke enye ama akpa. Ke edieke enye ekedide eti owo, ke enye ayaka okokop inem uwem ke nsinsi; edi edieke enye ekedide idiọkowo, ke enye edika ikọbọ ufen ke nsinsi. Ẹdọhọ ke owo ama akpa, ke ana ẹnam enye asana kan̄a mbemiso ẹyakde enye odụk heaven. Ke owo isiyakke owo emi mîsanake odụk.
SE BIBLE ỌDỌHỌDE
Mme akpan̄kpa ikopke inem uwem inyụn̄ ibọhọ ufen. Sia mmọ mîfiọkke n̄kpọ ndomokiet, mmọ ikemeke ndinam n̄kpọ ndomokiet; mmọ inyụn̄ ikemeke ndin̄wam nnyịn m̀mê ndinam nnyịn n̄kpọ. Ecclesiastes 9:5, 6 ọdọhọ ete: “Koro mme odu-uwem ẹfiọkde ẹte ke mmimọ iyakpa; edi amaedi mme akpan̄kpa, mmọ ifiọkke baba n̄kpọ kiet. . . . N̄ko, ima mmọ ye usua mmọ ye ufụp mmọ ẹmetak, mmọ inyụn̄ inyeneke aba udeme ke nsinsi ke n̄kpọ ekededi emi ẹnamde ke idak utịn.”
Ndi mme akpan̄kpa ẹyeset?
“Edieke owo akpade nte enye ekeme ndifiak ndu uwem? Ami nyebet ke ofụri usen ọkpọsọn̄ utom mi, tutu ubọhọ mi edi.”—Job 14:14.
SE MME OWO ẸTỊN̄DE
Ediwak owo ẹdọhọ ke owo ama akaka hell, ke enye editak do. Ke ẹditụhọde enye do ke nsinsi. Edi ke owo emi akade purgatory edika heaven ke ẹma ẹketụhọde enye kan̄a ke purgatory tutu idiọkn̄kpọ ọwọrọ enye ke idem.
SE BIBLE ỌDỌHỌDE
Bible ọdọhọ ke Eyen Abasi ayanam mbon emi ẹkpade ẹset ẹdidu uwem ke isọn̄. Enye ọdọhọ ete: “Ẹkûyak idem akpa mbufo, koro ini ke edi eke kpukpru mme andidu ke udi editi ẹdikopde enye uyo ẹwọn̄ọ ẹdi.” (John 5:26, 28, 29) Se owo edinamde ke enye ama eset edibiere m̀mê Abasi ayayak enye odu ke nsinsi. *
^ ikp. eki. 14 Edieke oyomde ndifiọk n̄kpọ efen mban̄a emi, mbọk kot ibuot 7 ke n̄wed Mme Ntiense Jehovah emi, Nso ke Bible Enen̄ede Ekpep? N̄wed emi odu n̄ko ke www.isa4310.com/efi.
Ekeme Ndidi Ayama Mmọ Emi N̄ko
BIBLE EKEME NDIBỌRỌ MBỤME FO
Ndi Hell Odu? Nso ke Bible Etịn̄ Aban̄a Hell?
Ediwak owo ẹnịm ke hell edi ebiet emi ẹdidade imia mme idiọkowo ufen ke nsinsi. Edi, ndi se Bible ekpepde edi oro?
