SE BIBLE ETỊN̄DE ABAN̄A
Ndọ
Ndi ndọ edi mbubehe owo iba kpọt?
“Se Abasi ama akadian yak baba owo kiet okûdian̄ade.” —Matthew 19:6.
SE BIBLE ỌDỌHỌDE
Abasi idaha ndọ nte mbubehe owo iba kpọt. Abasi ọkọtọn̄ọ ndọ. Bible ọdọhọ ete: “Toto ke editọn̄ọ emi ẹkebotde mme n̄kpọ ‘[Abasi] okobot mmọ eren ye n̄wan. Ke ntak emi erenowo ọyọkpọn̄ ete ye eka esie, ndien mmọ mbiba ẹyekabade ẹdi obụk kiet’ . . . Mmọdo, se Abasi ama akadian yak baba owo kiet okûdian̄ade.” *—Mark 10:6-9; Genesis 2:24.
Bible ndidọhọ “se Abasi ama akadian” iwọrọke ke Abasi esimek ebe m̀mê n̄wan ọnọ owo. Ikọ oro akam owụt ke Abasi ọkọtọn̄ọ ndọ ye nte ke ndọ idịghe n̄kpọ mbubru. Ebe ye n̄wan emi ẹfiọkde emi ẹda ndọ nte enọ Abasi. Mmọ ẹsisịn idem ẹnam ndọ mmọ ọfọn inyụn̄ ikpọn̄ke kiet eken tutu amama. Ebe ama anam se Bible ọdọhọde enye anam, n̄wan onyụn̄ anam kpa ntre, ndọ mmọ ọyọfọn.
Nso idi utom ebe?
“Ebe [edi] ibuot ọnọ n̄wan esie.”—Ephesus 5:23.
SE BIBLE ỌDỌHỌDE
Ana ufọk kiet kiet ẹnyene owo emi esibierede se anade ẹnam man n̄kpọ asan̄a ọfọn. Bible ọnọ ebe utom enye oro, edi emi iwọrọke ke ana enye akakara ikọtufọk esie. Enye n̄ko ikpayakke n̄wan emen utom esie anam. Edieke enye anamde oro, n̄wan esie ayakpa utom, inyụn̄ inen̄ekede ikpono enye aba. Abasi oyom ebe etịm akama n̄wan esie onyụn̄ okpono enye, ada enye nte ata akpan ufan esie. (1 Timothy 5:8; 1 Peter 3:7) Ephesus 5:28 ọdọhọ ke “mme ebe ẹkpema iban mmọ nte idem mmọ.”
Ebe emi enen̄erede ama n̄wan esie isinamke nte imọ ikwe se n̄wan imọ anamde. Ke ini enye oyomde ndibiere se ẹkpenamde ke ufọk, enye esidọhọ n̄wan esie etiene esịn uyo. Enye ididọhọke ke imọ idi ibuot ufọk, ntre ke ana kpukpru n̄kpọ osụk edi ke uyo imọ. Kop se Abasi ọkọdọhọde Abraham ke ini enye mîkamaha ndinam se n̄wan esie ọkọdọhọde. Abasi ọkọdọhọ enye ete: “Kop uyo esie.” (Genesis 21:9-12) Abraham ama osụhọde idem anam emi. Emem ama odu ke ufọk mmọ, Abasi ama onyụn̄ ọdiọn̄ mmọ.
Nso idi utom n̄wan?
“Iban, ẹsụk ibuot ẹnọ mme ebe mbufo.” —1 Peter 3:1.
SE BIBLE ỌDỌHỌDE
Abasi ọkọdọhọ mbemiso obotde n̄wan ọnọ Adam ete: “Ifọnke owo ndidu ikpọn̄. Nyanam andin̄wam nnọ enye, nte nsan̄a eke ekemde ye enye.” (Genesis 2:18) Owo emi asan̄ade ye owo esin̄wan̄wam owo emi enye asan̄ade kiet. Ntre, Abasi ikobotke n̄wan nte erenowo, ikonyụn̄ iyomke enye odomo idem ye erenowo, edi okoyom enye an̄wan̄wam erenowo. Akana mmọ ẹnyene nditọ ẹyọhọ ererimbot kpa nte Abasi ọkọdọhọde.—Genesis 1:28.
Abasi okobot n̄wan ke usụn̄ emi enye edikemede ndinam se imọ iyomde enye anam. Edieke enye enyenede ima adian do onyụn̄ adade ifiọk anam n̄kpọ, ndọ esie ọyọfọn, esịt oyonyụn̄ enem ebe esie. Ikọ Abasi ọdọhọ ke n̄wan eke eyede ido ntre odot se ẹtorode. *—Mme N̄ke 31:28, 31.
^ ikp. eki. 5 Bible ọdọhọ ke efịbe kpọt akpanam ẹsio owo ndọ.—Matthew 19:9.
^ ikp. eki. 14 Ebe ye n̄wan ẹkeme ndikụt nti item emi ẹdinamde ndọ mmọ ọfọn ke ibuotikọ emi, “Se Idin̄wamde Mme Ubon” ke Ẹdemede!
Ekeme Ndidi Ayama Mmọ Emi N̄ko
EMEKEME NDINAM UBON FO ẸKOP INEMESỊT
Nam Se Abasi Ọdọhọde Man Ndọ Mbufo Enem
Afo ndibụp idemfo mbụme iba ekeme ndinam ndọ mbufo enem.
BIBLE EKEME NDIBỌRỌ MBỤME FO
Nso ke Bible Etịn̄ Aban̄a Mbon Emi Mîdọhọ Ndọ Ndidụn̄ Kiet?
Ndausụn̄ emi Abasi ọnode nnyịn esinam idiọn̄ọ nte ikpanamde ubon nnyịn enem, ndien nte Abasi ọdọhọde idu uwem esifọn ye mbon oro ẹmade.
BIBLE EKEME NDIBỌRỌ MBỤME FO
Nso ke Bible Etịn̄ Aban̄a Owo Ndidọ Owo Emi Otode Ebiet En̄wen?
Kot mme edumbet Bible emi ẹwụtde ke Abasi ada kpukpru owo ukem ukem, ye mbon emi ẹban̄ade ndọ ye asari.
BIBLE EKEME NDIBỌRỌ MBỤME FO
Ndi Bible Etịn̄ N̄kpọ Ndomokiet Aban̄a Ndọ Erenowo ye Erenowo m̀mê eke N̄wan ye N̄wan?
Anditọn̄ọ ndọ etịm ọfiọk se ikpanamde ndọ enem onyụn̄ ebịghi.
BIBLE EKEME NDIBỌRỌ MBỤME FO
Ndi Ẹnyịme Ẹdọ Uwak Iban?
Ndi Abasi ọkọdọhọ ẹsidọ uwak iban? Se se Bible etịn̄de aban̄a udọ uwak iban.
