Ini ekededi oro ẹnyenede mfịna, afo ye n̄wan fo ẹyesụn̄i kiet eken tutu ikọ okụre mbufo ke inua. Idahaemi, idụhe nneme oro ẹnemede emi mbufo mîsụn̄ike kiet eken.

Edieke utọ n̄kpọ emi esitịbede ke ndọ mbufo, mbufo ẹmekeme ndinam ukpụhọde. Akpa kan̄a, ana ẹbem iso ẹfiọk se isidade emi idi ye ntak emi ọfọnde ẹtre ndisitịn̄ ikọ ntre.

Ufọk emi owo otode. Ediwak owo ẹto ufọk emi ete ye eka mmọ ẹkesisụn̄ide kiet eken. Ntre, ekeme ndidi n̄wan m̀mê ebe anam se enye ekesikopde ke ufọk.

Fim ye TV. Mme osio ndyọ ke fim ye TV ẹsida idiọk ikọ inua ẹnam n̄kpọ usak imam. Emi esinam mme andise ẹkere ke idiọkke ndisio inua nnọ owo, ke onyụn̄ edi ndinam mme owo ẹsak.

Ebiet emi owo otode. Ke ndusụk idụt, ẹdọhọ ke erenowo emi mîtiehe ukara ukara idịghe “erenowo itiaba,” ye nte ke irenowo ẹkeme ndida iban emi mîtiehe ukpọtiọ ukpọtiọ mbọp ekpan̄. Emi esinam ebe ye n̄wan oro ẹnyenede mfịna ẹda kiet eken nte asua utu ke ufan, ẹnyụn̄ ẹtịn̄ ikọ emi ayatde kiet eken, utu ke ikọ emi anamde esịt osụhọ owo.

Se ededi oro ekpedide ntak, idiọk ikọ inua ekeme ndisuan ndọ onyụn̄ anam owo enen̄ede ọdọn̄ọ. Ndusụk owo ẹdọhọ ke ikọ esibiak mmimọ akan umia. Ke uwụtn̄kpọ, mma kiet emi ebe ekesisụn̄ide onyụn̄ etịm ọdọhọ ete: “Akpakam ọfọn enye nditịm mi akan ndisụn̄i mi. Enye ama etịm mi, mmekeme ndisọp mfre, edi n̄kemeke ndifre se enye esitịn̄de ye ami.”

Nso ke akpanam edieke edide mbufo ẹmeyak idiọk ikọ inua abiat ndọ mbufo?

Kere ban̄a enye. Afo nyụn̄ kere nte ikọ fo esitiede ebe m̀mê n̄wan fo ke idem. Edieke ekemede, domo nditi se eketịn̄de emi akabiakde enye. Emekeme ndikere ke se eketịn̄de ikenen̄ekede idiọk, edi eketie enye didie ke idem? Ndi odu usụn̄ en̄wen emi ekpeketịn̄de ikọ oro man ọfọn akan oro? Bible ọdọhọ ete: “Sụn̄sụn̄ ibọrọ osụk ifụtesịt, edi uyat uyat ikọ edemede iyatesịt.”—Mme N̄ke 15:1.

Se nte ebe ye n̄wan emi ẹkponode kiet eken ẹsitịn̄de ikọ. Edieke ekesikopde idiọk ikọ inua ke ufọk mbufo, mbọk se nte ebe ye n̄wan emi ẹkponode kiet eken ẹsitịn̄de ikọ. Kpan̄ utọn̄ kop nte mmọ ẹtịn̄de ikọ ye kiet eken.—Se Bible etịn̄de: Philippi 3:17.

Ti nte ẹkesidude uwem. Idiọk ikọ inua esito esịt. Ntem, kere nti n̄kpọ ban̄a ebe m̀mê n̄wan fo. Ti mme n̄kpọ emi ẹkesinamde ntre ẹkop inemesịt. Se n̄kani ndise mbufo. Nso ikesinem mbufo imam? Nso ikonyụn̄ inam mbufo ẹma kiet eken?—Se Bible etịn̄de: Luke 6:45.

Tịn̄ nte n̄kpọ etiede fi ke idem. Utu ke ndisụn̄i enye, tịn̄ nte etiede fi ke idem. Ke uwụtn̄kpọ, emekeme ndidọhọ, “Ikenemke mi nte mûkudọhọke mi mbemiso anamde n̄kpọ oro.” Emi ọfọn akan ndidọhọ, “Ido fo edi oro, akananam utịn̄ke unọ mi se oyomde ndinam.”—Se Bible etịn̄de: Colossae 4:6.

Diọn̄ọ ini emi okpodopde uyo. Edieke etiede nte ke esịt ọmọn̄ ayat owo, ọyọfọn ẹtre nneme oro kan̄a. Esifọn nditre nneme ke ini n̄kpọ etiede ntem tutu esịt osụhọ kpukpru owo.—Se Bible etịn̄de: Mme N̄ke 17:14.