“Ẹkûyak usụn̄ uwem mbufo asan̄a ye ima okụk . . . Koro [Abasi] ọdọhọde ete: ‘Ndidehedei n̄kpọn̄ fi, ndinyụn̄ nsịnke fi.’”—Mme Hebrew 13:5.

NTE ABASI OWỤTDE KE IMEKERE IBAN̄A MME UBUENE

Ke ini n̄kpọ ọsọn̄de ye owo emi anamde n̄kpọ Abasi, Jehovah Abasi ekeme ndida nsio nsio usụn̄ n̄wụt ke imekere iban̄a enye. Usụn̄ kiet edi enye ndida mme Christian nnam emi. * N̄wed James 1:27 ọdọhọ ete: “Orụk utuakibuot oro asanade mînyụn̄ ideheke ke enyịn Abasi Ete nnyịn edi: ndise mban̄a nditọakpa ye mme ebeakpa ke ukụt mmọ.”

Mme Christian eyo mme apostle ẹma ẹsin̄wam mme Christian nte mmọ. Ke uwụtn̄kpọ, ke ini ẹkediọn̄ọde ke akan̄ ọmọn̄ ọsọn̄ ubọk etieti ke Judea, mme Christian ke Antioch ke Syria ẹma ẹbiere “ndinọ n̄kpọ un̄wam ẹsọk nditọete emi ẹdụn̄de ke Judea.” (Utom 11:28-30) Ntem, mme Christian oro ẹkedude ke unana do ẹma ẹnyene se ẹdade ẹdu uwem. Utọ enọ emi ama enen̄ede owụt nte mme Christian oro ẹkemade kiet eken.—1 John 3:18.

“Ami Jehovah, ndi Abasi fo, Enye emi ekpepde fi man afo ọbọ ufọn.”—Isaiah 48:17, 18.

IKỌ ABASI OWỤT NTE IKPAN̄WAMDE IDEM NNYỊN

Ata ediwak owo ẹkụt ke idụhe se in̄wamde owo nte ọniọn̄ emi ẹdude ke Bible. Mme N̄ke 2:6, 7 ọdọhọ ete: “Koro Jehovah ọnọde ọniọn̄; ifiọk ye mbufiọk ẹnyụn̄ ẹto enye ke inua. Ndien enye eyenịm ata ọniọn̄ ọnọ ndinen owo.” Mbon oro ẹkpepde Bible ẹnyụn̄ ẹnamde se enye etịn̄de ẹsinen̄ede ẹbọ ufọn.

Ke uwụtn̄kpọ, mmọ isidụhe etịme-etịme uwem emi ekemede nditahade owo, utọ nte ndin̄wọn̄ sika, ndisịn un̄wọn̄, ndida n̄kpọsọn̄ ibọk ke idiọk usụn̄ m̀mê ndin̄wọn̄ mmịn mbe ubọk. (2 Corinth 7:1) Mmọ n̄ko ẹsinam akpanikọ ẹnyụn̄ ẹnen̄ede ẹsịn ifịk ẹnam utom ndien emi esinam mme owo ẹma ndida mmọ ke utom. Ephesus 4:28 ọdọhọ ete: “Yak owo emi esiyịpde inọ okûyịp aba, edi yak enye anam ọkpọsọn̄ utom, . . . man enye ekpenyene n̄kpọ ndideme nnọ owo eke odude ke unana.”

“Mme utom ọniọn̄ ẹwụt ke ọniọn̄ enen.”—Matthew 11:19.

SE UWỤTN̄KPỌ IFAN̄ MI

Wilson oto Ghana. Ẹkeda enye ke utom ke ọfiọn̄ ifan̄. Ke akpatre usen emi enye akanamde utom do, enye ama okụt okụk ke edem moto eteutom esie ke ini enye okosụk eyetde moto oro. Akamba owo kiet ama ọdọhọ enye ada okụk oro. Edi Wilson ikenyịmeke, sia enye edide Ntiense Jehovah. Utu ke ndida, enye ama emen okụk oro ọsọk eteutom esie. Owo ikayakke enye ọnyọn̄ aba, edi ẹma ẹdọhọ enye ọtọn̄ọ utom do ọyọhọ ọyọhọ. Ekem, ẹma ẹmek enye akwaowo ke itieutom oro.

Ke Europe, ekaufọk Géraldine ikamaha Mme Ntiense Jehovah, ntre enye ama osio enye ke utom sia enye edide Ntiense. Eka mma emi ama ọdọhọ ke enye anam ata akamba ndudue ke ndikosio Géraldine ke utom, onyụn̄ adian do ete: “Edieke oyomde owoutom emi anamde akpanikọ onyụn̄ esịnde ifịk anam utom, da Ntiense Jehovah.” Mma emi ama anam ndụn̄ọde aban̄a Mme Ntiense, onyụn̄ afiak ada Géraldine ke utom.

Ke ini uwem ọkọsọn̄de ye Sarah emi ọbọkde nditọ ikpọn̄ ke South Africa, Mme Ntiense Jehovah eken ẹma ẹsin̄wam enye, ẹnọ enye udia ye okụk. Nte ini akade, nditọ esie ẹma ẹdọhọ ẹte: “Imenyene ediwak ete ye eka ke otu Mme Ntiense Jehovah.”

Utọ n̄kpọ emi ẹsitịbe ọnọ ediwak Mme Ntiense Jehovah ke nsio nsio idụt. Emi anam iti se idude ke Mme N̄ke 1:33, emi ọdọhọde ete: “Owo eke okopde uyo mi oyodụn̄ ke ifụre inyụn̄ ikopke ndịk afanikọn̄.” Emi edi ata akpanikọ!