JESUS ọkọdọhọ ke Luke 10:2 ete: “Idọk okpon, edi mme anamutom iwakke. Mmọdo, ẹben̄e Enyene-idọk ẹte enye osio mme anamutom ọnọ ẹdi ke idọk esie.” Se Jesus eketịn̄de emi ke n̄kpọ nte isua 2,000 emi ekebede etịbe mfịn ke Myanmar. Ndi ama ọfiọk ke n̄kpọ nte nditọete 4,200 kpọt ẹkwọrọ ikọ ẹnọ owo miliọn 55 oro ẹdude ke Myanmar?

Jehovah edi “Enyene-idọk.” Enye anam ediwak nditọete ẹto nsio nsio idụt ẹka Myanmar ẹkekwọrọ ikọ. Myanmar odu ke Southeast Asia. Nso ikanam nditọete ẹnyịme ndikpọn̄ idụt mmọ n̄ka do? Nso ikan̄wam mmọ ẹkeme ndiwọrọ n̄ka do? Didie ke Jehovah ọdiọn̄ mmọ? Ẹyak ise.

Kazuhiro edi asiakusụn̄ onyụn̄ oto Japan. Isua ifan̄ ko, enye ama ọduọ ndisi inyụn̄ idiọn̄ọke idem. Ẹma ẹmen enye ẹfehe ẹka ufọkibọk. Dọkta ama ọdọhọ enye okûwat moto ke ufan̄ isua iba. N̄kpọ oro ama afịna Kazuhiro tutu sia enye ama enen̄ede ama utom usiakusụn̄. Enye ama ekere nte imọ idinamde utọ n̄kpọ oro. Enye ama enen̄ede ọbọn̄ akam ọdọhọ Jehovah an̄wam imọ ikeme ndika iso nsiak usụn̄.

Kazuhiro ọdọhọ ete: “Ke ọfiọn̄ kiet ebede, ufan mi kiet oro okodude ke Myanmar ama okot mi sia enye ama okop se ikọwọrọde mi. Enye ama ọdọhọ mi ete: ‘Ediwak owo mi ẹsidụk bọs ẹka n̄kpọ. Ọkpọwọrọ edi mi, eyekeme ndika iso n̄kwọrọ ikọ uyomke moto idemfo!’ Mma mbụp dọkta mi m̀mê mmekeme ndika Myanmar nte idem mi etiede emi. Enye ama ọdọhọ mi ete: ‘Dọkta oro esisọbọde owo udọn̄ọ mfre ke oto Myanmar edi Japan idahaemi. Nyanam enye okụt fi. Edieke idem afiakde afịna fi do, enye ọyọsọbọ fi.’ N̄kpọ oro ama akpa mi idem. N̄kada ke Jehovah ọbọrọ akam mi oro.”

Kazuhiro ama ọnọ e-mail ẹsọk n̄kọk itieutom ke Myanmar nte n̄kpọn̄ nte n̄kpọn̄ ọdọhọ ke imọ ye n̄wan imọ ikpama ndidi do ndisiak usụn̄. Ke ufan̄ usen ition kpọt, n̄kọk itieutom ẹma ẹdọhọ mmọ ẹte: “Ẹdi, ikam iyoyom mme asiakusụn̄!” Kazuhiro ye Mari an̄wan esie ẹma ẹnyam moto iba oro mmọ ẹkenyenede, ẹda okụk oro ẹkebọ n̄wedisan̄, ẹnyụn̄ ẹda ẹkpe tiket ubomofụm. Mmọ ẹdu idahaemi ye otu usem idiọn̄ọ ke Mandalay. Kazuhiro ọdọhọ ete: “Emi anam inen̄ede inịm se Psalm 37:5 ọdọhọde  ete: ‘Kpat usụn̄ fo nọ Jehovah, nyụn̄ beri edem ke enye, ndien enye eyese aban̄a fi.’”

Ke 2014, Mme Ntiense Jehovah ke Myanmar ẹma ẹnịm akpan mbono. Nditọete ẹma ẹto nsio nsio idụt ẹkedụk mbono oro. Monique emi edide isua 34 ama oto United States okodụk mbono oro. Enye ọdọhọ ete: “Ke mma n̄kọnyọn̄ mbono oro ndi, mma ndọhọ Jehovah an̄wam mi mfiọk se n̄kpanamde. Mma nneme n̄ko ye ete ye eka mi se nduakde ndinam nnọ Abasi. Ima ikere ke akpana n̄ka n̄kọkwọrọ ikọ ke Myanmar. Edi mma mbọn̄ akam ediwak ini kan̄a. Ama ada ini mbemiso n̄kebierede ndika do.” Enye etịn̄ se ikanamde etie etre.

Enye ọdọhọ ke imọ ima iti ke Jesus ọkọdọhọ mme mbet esie ‘ẹbat se iditakde,’ ke oro ama anam ibụp idem imọ ite: ‘Ndi mmenyene okụk n̄kem ndiwọrọ n̄ka do? Ndi edidi se n̄kan̄wanade okụk uwemeyo ye okoneyo man nda nse mban̄a idemmi?’ Enye ọdọhọ ke ima idikụt ke okụk oro imọ inyenede idikemke se idade idu uwem ke obio owo. Enye akanam didie aka ndien?​—Luke 14:28.

Enye ọdọhọ ete: “Usen kiet, akamba owo itieutom nnyịn ama ọdọhọ ndikụt imọ. Idem ama enyek mi sia n̄kekere ke ẹmọn̄ ẹsio mi ke utom. Edi enye akakam ọkọkọm mi nte nsinamde utom ọfọn. Enye ama ọdọhọ ke imọdọhọ ẹsịn okụk ẹnọ mi. Okụk oro ama ekem se ndade n̄kpe kpukpru isọn oro n̄kakamade.”

Monique odu ke Myanmar ọkwọrọ ikọ toto ke December 2014. Etie enye didie ndika Myanmar n̄kọkwọrọ ikọ? Enye ọdọhọ ete: “Enen̄ede enem mi ndidu mi. Mmenyene owo ita oro nsikpepde Bible. Kiet edi akani an̄wan isua 67. Enye esituak inua imam kpukpru ini oro enye ọkọmde mi onyụn̄ afatde mi. Mmọneyet ama asiaha enye ke enyịn ini enye ọkọfiọkde ke Abasi ekere Jehovah. Enye ọkọdọhọ ete: ‘Akpa ini n̄kopde ke Abasi ekere Jehovah edi emi. Afo edi ata eyenọwọn̄ ọnọ mi, edi emekpep mi ata akpan n̄kpọ.’ Mmọn̄eyet ama etiene asiaha mi. Utọ n̄kpọ ntem esinam enem nnyịn ndikwọrọ ikọ ke ebiet oro ẹyomde-yom mme ọkwọrọikọ.” Monique ama etiene odụk Ufọkn̄wed Mme Ọkwọrọ Obio Ubọn̄ ndondo emi.

Mbụk Myanmar oro ẹkewetde ke N̄wedisua Mme Ntiense Jehovah Eke 2013 ama anam ọdọn̄ ndusụk owo ndika do n̄kọkwọrọ ikọ. Sista Li edi n̄kpọ nte isua 32. Enye okodụn̄ ke Southeast Asia. Enye ama enyene utom emi enye ekesinamde adia n̄kpọ. Edi se N̄wedisua oro okobụkde aban̄a Myanmar ama anam enye ekere ndiwọrọ n̄ka do. Enye ọdọhọ ete: “Ke ini n̄kodụkde akpan mbono ke Yangon ke 2014, mma n̄kụt ebe ye n̄wan oro ẹdude ke esop usem Chinese ke Myanmar. Sia nsisemde Chinese, mma mbiere ndikan̄wam otu emi ẹsemde Chinese do. Ami ye Monique ima isan̄a ntre ika Mandalay. Jehovah ama osio utom ibio ini ọnọ nnyịn ke ufọkn̄wed kiet do; ima inyụn̄ ibọ ufọk ikpere ufọkn̄wed oro. Ukwọrọikọ enem mi tutu kpa ye oro eyo ofiopde, ndusụk n̄kpọ mîsinyụn̄ iyakke uwem enen̄ede enem. Mbon Myanmar ẹnyụn̄ ẹda uwem nte mmọ ẹkụtde, edi mmọ ẹye ido ẹnyụn̄ ẹma ndikop eti mbụk Obio Ubọn̄. Enem nnyịn ndikụt nte Jehovah anamde utom ukwọrọikọ asan̄a ọfọn. Mmenen̄ede nnịm ke Jehovah enyịme ndu mi ke Mandalay.”

Ediwak nditọete oro ẹkade ebiet oro ẹyomde-yom mme ọkwọrọikọ ẹkụt ke Jehovah esikop akam. Da Jumpei ye Nao an̄wan esie ke uwụtn̄kpọ. Jumpei edi isua 37, n̄wan esie edi 35. Mmọ ẹkedu ke esop usem idiọn̄ọ ke Japan. Nso ikanam mmọ ẹwọrọ  ẹka Myanmar? Jumpei ọdọhọ ete: “Ebịghi ọkọdọn̄ mi ye n̄wan mi ndika idụt oro ẹyomde-yom mme ọkwọrọikọ. Eyenete kiet emi okodude ke esop nnyịn ama ọwọrọ aka Myanmar. Kpa ye oro ikenyenede ekpri okụk, nnyịn n̄ko ima iwọrọ ika do ke May 2010. Nditọete ẹma ẹdara nnyịn etieti!” Etie Jumpei didie ke idem ndikwọrọ ikọ nnọ mme inan ke Myanmar? Enye ọdọhọ ete: “Mme inan ẹma Ikọ Abasi etieti mi. Idem esikpa mmọ ke ini iwụtde mmọ vidio usem idiọn̄ọ. Enen̄ede enem nnyịn nte ikọwọrọde idinam n̄kpọ Jehovah mi!”

Mmọ ẹda m̀mọ̀n̄ okụk ẹdu do? Jumpei ọdọhọ ete: “Okụk nnyịn ama ekpere ndikụre ke isua ita ama ekebe, okụk oro okosụhọde ikekemke se idade ikpe okụk ufọk isua oro eketienede. Ami ye n̄wan mi ima ikọbọ ke akam. Itise, n̄kọk itieutom ẹma ẹwet nnyịn leta ẹdọhọ ke ẹmek nnyịn akpan asiakusụn̄ ibio ini! Ikọbuọt idem ye Jehovah, enye ikonyụn̄ ikpọn̄ke nnyịn. Jehovah ọnọ nnyịn kpukpru se iyomde.” Jumpei ye Nao an̄wan esie ẹma ẹtiene ẹdụk Ufọkn̄wed Mme Ọkwọrọ Obio Ubọn̄ ndondo emi.

Simone edi isua 43, Anna an̄wan esie edi 37. Enye oto Italy, n̄wan esie oto New Zealand. Nso ikanam mmọ ẹwọrọ ẹka Myanmar? N̄wan esie ọdọhọ ke mbụk Myanmar oro ẹkewetde ke N̄wedisua 2013 akanam. Simone ọdọhọ esie ete: “Enem mi tutu ndidu mi. Uwem inen̄ekede isọn̄ mi, mmonyụn̄ n̄keme ndinen̄ede nsịn idem n̄kwọrọ ikọ. Esinem tutu ndikụt nte Jehovah esede aban̄a ikọt esie ke ini mmọ ẹwọrọde ẹka ebiet emi ẹyomde-yom mme ọkwọrọikọ.” (Ps. 121:5) Anna an̄wan esie ọdọhọ ete: “Akanam esịt inemke mi ntem. Nnyịn iyomke ikpọ n̄kpọ. Ami ye ebe mi imesidiana kiet inam ediwak n̄kpọ, imonyụn̄ inen̄ede ikpere kiet eken. Imenyene nti ufan mi. Mbon Myanmar ẹma Mme Ntiense Jehovah, ẹnyụn̄ ẹma ukwọrọikọ etieti!” Nso inam idọhọ ke mmọ ẹma ukwọrọikọ?

Anna ọdọhọ ete: “Usen kiet, mma n̄kwọrọ ikọ nnọ eyen ufọkn̄wed ntaifiọk kiet ke urua nnyụn̄ ndọhọ ke iyafiak isobo. Ke ini ikafiakde isobo, enye ama okot ufan esie editiene okop. Ini n̄kafiakde n̄ka, enye ama okot ufan esie ifan̄ edi. Ekem, enye ama okot ediwak ufan esie ẹtiene ẹdi. Idahaemi ke n̄kpep Bible ye owo ition ke otu mmọ.” Simone ebe esie ọdọhọ ete: “Mme owo ẹtie ufan ufan ẹnyụn̄ ẹyom ndifiọk ediwak n̄kpọ. Ediwak owo ẹma ndikpep Bible tutu nnyịn ikam inyeneke ini ikpep kpukpru mmọ.”

Nso ke ndusụk owo ẹkenam man ẹkeme ndiwọrọ n̄ka Myanmar? Mizuho emi otode Japan ọdọhọ ete: “Ama esidọn̄ mi ye Sachio ebe mi ndika idụt emi ẹyomde-yom mme ọkwọrọikọ. Edi nnyịn ikọdiọn̄ọke m̀mê m̀mọ̀n̄ ke ikpaka? Se ẹkewetde ẹban̄a Myanmar ke N̄wedisua 2013 ama anam ikere m̀mê ekpedi se iwọrọde ika do.” Sachio ebe esie  ọdọhọ ete: “Ima ika Yangon urua kiet kan̄a idọhọ ikese nte isọn̄ etiede. Yangon edi akpan obio ke Myanmar. Se ikokụtde urua kiet oro ama anam ibiere ke edi se iwọrọde ika do.”

Rodney ye Jane an̄wan esie eto Australia. Mmọ ẹbe isua 50. Akpan mmọ ekere Jordan, adiaha ekere Danica. Kpukpru mmọ ẹdu ke Myanmar ẹkwọrọ ikọ tọn̄ọ ke 2010. Rodney ọdọhọ ete: “Ama enen̄ede enem nnyịn ndikụt nte mme owo ẹmade Ikọ Abasi mi. N̄kpọdọhọ mme ubon ẹtiene ẹtabi ẹse nte etiede ndiwọrọ n̄ka idụt emi ẹyomde-yom mme ọkwọrọikọ nte Myanmar.” Nso inam enye ọdọhọ ntre? Enye ọdọhọ ete: “Inua ikemeke nditịn̄ ufọn oro ubon nnyịn ẹbọde! Ediwak uyen ẹkere nte ikpenyenede fon, moto, eti utom, ye mme n̄kpọ ntre. Edi nditọ nnyịn ẹsịn idem ẹkpep usem oro ẹsemde mi man ẹfiọk mbufa ikọ emi ẹkpedade ẹkwọrọ ikọ. Mmọ ẹkpep nte ẹkpekwọrọde ikọ ẹnọ mbon oro mînen̄ekede imehe ye Bible, ye nte ẹkpedade obufa usem oro mmọ ẹkpepde ẹbọrọ mbụme ke mbono esop. Mmọ ẹnyụn̄ ẹsịn idem ẹnam ediwak n̄kpọ en̄wen ke esop Abasi.”

Oliver oto United States. Enye edi isua 37. Enye etịn̄ se inamde imọ idọhọ ke ọkpọfọn nditọete ẹtiene ẹka ebiet emi ẹyomde-yom mme ọkwọrọikọ. Enye ọdọhọ ete: “Mmenen̄ede ndia ufọn ke ndikpọn̄ idụt nnyịn n̄kọkwọrọ ikọ ke idụt en̄wen. Emi anam nnen̄ede mbuọt idem ye Jehovah inamke n̄kpọ m̀mê nso itịbe. Ndidiana ye nditọete oro mmendiọn̄ọke akpa nnam n̄kpọ Abasi enen̄ede anam n̄kụt ke idụhe esop en̄wen ndomokiet emi ebietde esop Abasi.” Oliver ye Anna an̄wan esie ke ẹsịn idem ẹkwọrọ ikọ ẹnọ mbon oro ẹsemde Chinese.

Sista Trazel oto Australia. Enye edi isua 52. Enye odu ke Myanmar ọkwọrọ ikọ tọn̄ọ ke 2004. Enye ọdọhọ ete: “N̄kpọdọhọ mbon oro ẹkemede ndika ebiet oro ẹyomde-yom mme ọkwọrọikọ, ẹka. Mmokụt ke edieke inyịmede ndika, ke Jehovah iditreke ndidiọn̄ nnyịn. N̄kpenịmke ke ukwọrọikọ ekpenem mi ntem. Idụhe n̄kpọ ekededi oro akpanamde esịt adat mi ntem.”

Imenịm ke se nditọete emi ẹkewọrọde ẹka Myanmar ẹkekwọrọ ikọ ẹtịn̄de emi ayan̄wam fi ekere nte akpan̄wamde mbon oro ẹmade Ikọ Abasi ke mme ebiet oro akanam owo mîkwọrọke ikọ. Nditọete oro ẹwọrọde ẹkekwọrọ ikọ ke Myanmar ẹdọhọ ẹte: “Mbọk ẹbe ẹdi Myanmar ẹdin̄wam nnyịn!”