N̄kamana ke Mulhouse ke France. Mme owo ke edem nnyịn ẹkesinam n̄kpọ afai afai. Ke nteti nte ẹkesitọhọde ẹnyụn̄ ẹn̄wanade ke edem nnyịn. Owo ikesidaha iban ke n̄kpọ ke ubon nnyịn, irenowo ikesinyụn̄ iwakke ndiyom ekikere mmọ ke ini ẹyomde ndinam n̄kpọ. Ẹkedọhọ mi ke iban ẹkpesidu ke esa ẹtem udia ẹnyụn̄ ẹse ẹban̄a irenowo ye nditọwọn̄.

Ediwak n̄kpọ ama etịbe ọnọ mi ke ini eyenọwọn̄. Ete mi ekedi n̄wọn̄kpa. Ke ini n̄kedide isua duop, mmịn ama owot enye. Isua ition ke oro ebede, eyeneka mi kiet ama owot idem. Kpa isua oro, utọk ama asiaha ke ubon nnyịn tutu ẹwot owo. Idem ama enyek mi tutu. Mbonubon nnyịn ẹma ẹkpep mi ndisikama ikwa ye ikan̄ n̄n̄wana en̄wan. Kpukpru emi ama afịna mi tutu ntọn̄ọ ndin̄wọn̄ mmịn mbe ubọk nnyụn̄ n̄wet n̄kpọ nyọhọ idem.

Ke ini n̄kedide isua 16, mma nsin̄wọn̄ ekpeme mmịn 10 esịm 15 ke usen, ndien ikebịghike mma ntọn̄ọ ndida n̄kpọsọn̄ ibọk. Mma nsinyam ntaha tian ye ukwak nnyụn̄ nyịp inọ man nnyene okụk nda n̄n̄wọn̄ n̄kpọ. Mma n̄ka n̄kpọkọbi mbemiso nsịmde isua 17. Ẹma ẹbiere n̄kpọkọbi utịm ike-18 ẹnọ mi ke ntak inọ ye afai.

Ke ini n̄kedide n̄kpọ nte isua 22, mma nsin̄wọn̄ ikọn̄ekpo nsịm 20 ke usen nnyụn̄ nda n̄kpọsọn̄ ibọk eken, utọ nte heroin. Ndusụk ini, mma n̄kpere ndikpa ke ntak emi n̄kesidade n̄kpọsọn̄ ibọk awak akaha. Mma ntọn̄ọ ndisinyam n̄kpọsọn̄ ibọk, ntre n̄kesikakama ikwa ye ikan̄ nsan̄a. Ini kiet ntem, mma ntop ete kiet, edi ke mfọniso esie, itiat ikan̄ ikodụkke enye idem. Eka mi ama akpa ke ini n̄kedide isua 24, ndien mma ndọdiọn̄ nnam n̄kpọ afai afai. Ekesidi mme owo ẹma ẹkụt nte nsan̄ade ndi, ndịk anam mmọ ẹwọrọ ẹkpọn̄ usụn̄. En̄wan ama esinam ẹmen mi eka bodisi mîdịghe ẹmen mi ẹka ufọkibọk man n̄kọsọbọ unan.

Mma ndọ n̄wan ke ini n̄kedide isua 28. Ndien sia owo mîkadaha iban ke n̄kpọ ke edem nnyịn, n̄kokponoke n̄wan mi. Mma nsisụn̄i enye nnyụn̄ mmia enye. Nnyịn ikesidianake kiet inam n̄kpọ. N̄kekere ke ofụri se anade nnam edi ndisiyịp ediwak n̄kpọmbana nnọ enye. Ekem n̄wan mi ama ọtọn̄ọ ndikpep Bible ye Mme Ntiense Jehovah. Ke enye ama ekekpep n̄kpọ ye mmọ usen kiet kpọt, enye  ama etre ndin̄wọn̄ sika, imaha aba ndibọ mi okụk oro n̄keyịpde, onyụn̄ ọkpọn̄ mme n̄kpọmbana esie ọnọ mi. N̄kpọ emi ama enen̄ede ayat mi. Mma nnam se n̄kekeme man enye etre ndikpep Bible. Mma nsifri nsụn̄ikan̄ sika nduọk enye ke iso. Mma nsinyụn̄ nsuene enye ke ofụri mbọhọ nnyịn.

Okoneyo usen kiet, mmịn ama anam mi tutu nsịn ikan̄ ke ufọk nnyịn. N̄wan mi ama anyan̄a mi ye adiaha nnyịn oro ekedide isua ition osio ke ikan̄ oro. Ke enyịn ama akatara mi, esịt ama enen̄ede obiom mi. N̄kekere ke Abasi idifenke inọ utọ owo nte ami. Mma nti ini kiet emi oku ufọkabasi ọkọdọhọde ke ndiọi owo ẹdika hell. Dọkta mi ọkọdọhọ ke idụhe owo emi edikemede ndinam mi n̄kpụhọde.

Ima iwọrọ ikodụn̄ ye ete an̄wan mi sia ikan̄ ama akata ufọk nnyịn. Ke ini Mme Ntiense Jehovah ẹkedide ndikpep n̄wan mi n̄kpọ, mma mbụp mmọ m̀mê Abasi ekeme ndifen nnọ mi ke ofụri idiọkn̄kpọ oro nnamde. Mmọ ẹma ẹkot 1 Corinth 6:9-11 ẹnọ mi. Itien̄wed oro asiak mme n̄kpọ oro Abasi asuade, onyụn̄ ọdọhọ ete: “Ndusụk mbufo ẹketie ntem.” Ikọ emi ama anam mfiọk ke mmekeme ndikpụhọde. Ekem mmọ ẹma ẹdọhọ mi ke Abasi ama mi, ẹnyụn̄ ẹkot 1 John 4:8 ẹnọ mi. Se mmọ ẹketịn̄de emi ama ọsọn̄ọ mi idem, ntre mma ndọhọ mmọ ẹsidikpep mi Bible ikaba ke urua. Mma nnyụn̄ ntọn̄ọ ndisidụk mbono esop. Mma nsibọn̄ akam nnọ Jehovah kpukpru ini.

Ke ufan̄ ọfiọn̄ kiet, mma mbiere nditre mmịn ye n̄kpọsọn̄ ibọk. Edi emi ikememke utom. Mma ntọn̄ọ ndisidaba ndiọi ndap, ibuot ọkọn̄ mi, ofụri idem abiak mi, nnyụn̄ ndọn̄ọ nsio nsio udọn̄ọ ke nsonso oro. Kpa ye oro, mma n̄kụt nte Jehovah an̄wamde mi onyụn̄ ọsọn̄ọde mi idem ukem nte akan̄wamde apostle Paul. Paul ọkọdọhọ ete: “Mmenyene ukeme ndinam kpukpru n̄kpọ ebe ke enye emi ọnọde mi odudu.” (Philippi 4:13) Nte ini akakade, mma nnyụn̄ ntre ndin̄wọn̄ sika.—2 Corinth 7:1.

Ndikpep Bible anam ndu eti uwem onyụn̄ anam ubon mi ẹkop inemesịt. Mma n̄kpep ndikama n̄wan mi ọfọn. Mma ntọn̄ọ ndikpono enye nnyụn̄ nsidọhọ enye “mbọk” ye “sọsọn̄ọ.” Mma nnyụn̄ ntọn̄ọ ndidu uwem ye adiaha mi nte ete okpodude ye eyen. Ke mma n̄kekpep Bible isua kiet, mma nyak idem nnọ Jehovah nnyụn̄ nna baptism, kpa nte n̄wan mi akanamde.

Mmenen̄ede nnịm ke Bible anam ndu uwem tutu esịm emi. Idem mbonubon nnyịn oro mîdịghe Mme Ntiense Jehovah ẹkụt ke ekeme ndidi n̄kpọsọn̄ ibọk m̀mê en̄wan okpokowot mi.

Bible ama anam mfiọk nte n̄kpanamde n̄kpọ ye n̄wan ye eyen mi, ndien emi anam ubon nnyịn enen̄ede enem. (Ephesus 5:25; 6:4) Ima itọn̄ọ ndidiana kiet nnam n̄kpọ nte ubon. Idahaemi, esinem mi ndin̄wam n̄wan mi aka iso ọkwọrọ ikọ kpukpru ini, utu ke ndidọhọ enye ke iban ẹsidu ke esa ẹtem udia. Esinyụn̄ enem enye ndin̄wam mi man n̄keme ndinam utom mi nte ebiowo ke esop.

Enen̄ede enem mi ndikụt nte Jehovah Abasi amade mi onyụn̄ atuade mi mbọm. Mme owo ẹkekere ke n̄kemeke ndikpụhọde. Ndien emi anam nnen̄ede nyom ndin̄wam mme owo ẹfiọk nti edu Abasi, akpan akpan mbon oro ẹkerede ke mmọ ikemeke ndikpụhọde. Mmenịm ke Bible ekeme ndinam owo ekededi etre ndiọi edu onyụn̄ odu eti uwem. Bible ekpep mi ndima nnyụn̄ n̄kpono mme owo, edide irenowo m̀mê iban. Bible onyụn̄ anam n̄kpono idemmi n̄ko.