NSIO NSIO ufọkabasi ke ofụri ererimbot, utọ nte Catholic ye Buddha, ẹdọhọ ke inaha mme ọkwọrọikọ mmimọ ẹdọ ndọ. Edi ndusụk owo ẹdọhọ ke emi anam ediwak ikpọ owo ufọkabasi ẹsisabade nditọwọn̄ ẹnyụn̄ ẹdu oburobụt uwem.

Ntak edi oro ọfọnde ẹbụp m̀mê Abasi ọdọhọ mme ọkwọrọikọ ẹkûdọ ndọ. Man ifiọk ibọrọ mbụme emi, yak ineme nte n̄kpọ emi ọkọtọn̄ọde ye nte Abasi esede enye.

Ke 2006, Pope Benedict XVI ama ọdọhọ ikpọ owo Ufọkabasi Catholic ke mme ọkwọrọikọ oro ẹkedude ẹkpere eyo mme apostle ikọdọhọ ndọ, ntak edi oro Ufọkabasi Catholic ẹdọhọde ikpọ owo mmọ ẹkûdọ ndọ.

Edi mme Christian eyo mme apostle ikọdọhọke mme ọkwọrọikọ ẹkûdọ ndọ. Apostle Paul emi okodude ini oro ọkọdọhọ mme Christian ẹkpeme idem ye mbon emi ẹtịn̄de “ikọ ndiọi spirit emi ẹtụnde owo usụn̄” ẹnyụn̄ “[ẹkpande] owo ndidọ ndọ.”​—⁠1 Timothy 4:​1-3.

Isua ifan̄ ke mme apostle ẹma ẹkekpan̄a ke mme ufọkabasi emi ẹkekabarede ẹdi Ufọkabasi Catholic nte ini akade ẹketọn̄ọ ndikere ke ikpanaha ikpọ owo mmimọ ẹdọ ndọ. N̄wed kiet emi ẹkotde Celibacy and Religious Traditions ọdọhọ ke se ikanamde ẹnam emi edi sia owo ikoyomke ẹnam idan̄ ntịme ntịme ke mme obio emi Rome ẹkarade.

Ke mme isua emi ẹketienede, ẹma ẹsitịn̄ ke mme mbono emi ikpọ owo Catholic ẹkenịmde ẹte ke ifọnke mme ọkwọrọikọ ẹdọ ndọ, ndien ikpọ owo ufọkabasi ẹma ẹnyịme n̄ko. Mmọ ẹkekere ke ndinam idan̄ anam owo edehe ke enyịn Abasi,  ntre ke idotke ọkwọrọikọ anam idan̄. Edi n̄wed emi ẹkotde Encyclopædia Britannica ọdọhọ ke tutu esịm n̄kpọ nte isua 900 ke mme apostle ẹma ẹkekpan̄a, ke ediwak oku ye bishop ẹma ẹsidọ ndọ.

Ke mbono oro ikpọ owo Catholic ẹkenịmde ke isua 1123 ye 1139 ke Lateran ke Rome, ẹma ẹkpan mme ọkwọrọikọ ndidọ ndọ, ndien tutu esịm mfịn, Ufọkabasi Catholic isụk inyịmeke ikpọ owo mmọ ẹdọ ndọ. Mmọ ẹkenam emi man ufọkabasi ẹka iso ẹnyene odudu, man mme oku ufọkabasi ẹkûnyụn̄ ukpọn̄ inyene ufọkabasi unọ nditọ mmọ ke ini ẹyomde ndikpa.

Bible anam idiọn̄ọ nte Abasi esede n̄kpọ emi. Enye etịn̄ ke Jesus ikọdọhọ ndọ, onyụn̄ anam ifiọk se Jesus eketịn̄de aban̄a mbon en̄wen oro mîdọhọ ndọ “ke ntak obio ubọn̄ heaven.” (Matthew 19:12) Apostle Paul ama onyụn̄ etịn̄ aban̄a mme Christian oro mîdọhọ ndọ ke ntak “eti mbụk.”​—⁠1 Corinth 7:​37, 38; 9:⁠23.

Edi Jesus ye Paul ikọdọhọke ke mme ọkwọrọikọ ikpọdọhọ ndọ. Jesus ọkọdọhọ ke nditre ndidọ ndọ edi “enọ,” ndien ke idịghe kpukpru mbet imọ ẹnyene enọ emi. Kpa ye oro Paul ọkọdọhọde ke mbon “emi akanam mîdọhọ ndọ” ẹnam ọfọn, enye ama adian do ete: “Nnyeneke ewụhọ ndomokiet eke otode Ọbọn̄, edi ekikere mi ke nnọ.”​—⁠Matthew 19:11; 1 Corinth 7:⁠25.

Bible ọdọhọ n̄ko ke ediwak mme Christian ke eyo mme apostle ẹma ẹdọ ndọ, esịnede apostle Peter. (Matthew 8:14; Mark 1:​29-31; 1 Corinth 9:⁠5) Ediwak owo ke eyo mmọ ẹkedu oburobụt uwem, ntre Paul ama ewet leta ọnọ mme Christian ete ke edieke owo emi edide esenyịn ke esop Abasi ọdọde ndọ, ke enye ekpenyene ndidi “ebe n̄wan kiet,” onyụn̄ enyene “nditọ eke ẹsụkde ibuot.”​—⁠1 Timothy 3:​2, 4.

Mme Christian oro ẹkedọde ndọ ẹma ẹsinam idan̄ sia Bible ọdọhọ yak “ebe ọnọ n̄wanndọ esie se idide udeme n̄wanndọ,” onyụn̄ ọdọhọ yak n̄wan ye ebe “ẹkûsịn ndinọ kiet eken n̄kpọ emi,” oro edi, ẹkûsịn kiet eken idan̄. (1 Corinth 7:​3-5) Emi owụt ke Abasi idọhọke owo okûdọ ndọ, inyụn̄ idọhọke ke ọdiọk n̄wan ye ebe ndinam idan̄.

Edieke mîdiọkke ọkwọrọikọ ndidọ ndọ, ntak emi Jesus ye Paul ẹkedọhọde ke mbon emi mîdọhọ ndọ ẹnam ọfọn? Sia owo emi mîdọhọ ndọ eyenen̄ede enyene ini ndikwọrọ eti mbụk nnọ mme owo. Mbon emi mîdọhọ ndọ ẹnen̄ede ẹkeme ndida ini mmọ nnam n̄kpọ Abasi sia mmọ mînyeneke editịmede esịt emi mbon oro ẹdọde ndọ ẹsinyenede.​—⁠1 Corinth 7:​32-35.

Ke uwụtn̄kpọ, akparawa kiet emi ekerede David ama ọkpọn̄ utom esie emi ẹkesikpede enye ediwak okụk ke akwa obio kiet ke Mexico aka okodụn̄ ke obio-in̄wan̄ kiet ke Costa Rica man ekpep mme owo Bible. Enye ekere ke sia imọ mîdọhọ ndọ anam imọ ikeme ndinam emi. Enye ọdọhọ ete: “Ikememke nditọn̄ọ uwem ke esenidụt nnyụn̄ ndụn̄ ke utọ ufọk emi mmen̄kesidụn̄ke, edi sia mmendọhọ n̄wan ikọsọn̄ke ikaha.”

Claudia, emi mîdọhọ ndọ onyụn̄ akade okodụn̄ ke ebiet emi ẹyomde-yom mme ọkwọrọikọ, ọdọhọ ete: “Enen̄ede enem mi ndinam utom Abasi. Ke ini n̄kụtde nte Abasi an̄wamde mi, emi anam nnen̄ede mbuọt idem ye enye nnyụn̄ ntetịm n̄kpere enye.”

Enyene-idem edibiere m̀mê iyọdọ ndọ m̀mê ididọhọ. Claudia afiak ọdọhọ ete: “Edieke anamde n̄kpọ Jehovah Abasi ke ofụri esịt, oyokop inemesịt, inamke n̄kpọ m̀mê ọmọdọ ndọ m̀mê udọhọ.”​—⁠Psalm 119:​1, 2.