Jesus ama etịn̄ nte idisan̄ade ‘ifiọk ke obio ubọn̄ Abasi ekpere.’ (Luke 21:31) Enye ama etịn̄ ediwak prọfesi emi ẹdisude, esịnede ikpọ ekọn̄, ikpọ unyekisọn̄, unana udia, ye ndiọi udọn̄ọ, ndien nnyịn imokụt kpukpru emi ẹtịbede mfịn.—Luke 21:10-17.

Bible etịn̄ n̄ko nte mme owo ẹdidude uwem ke “mme akpatre usen” emi mme owo ẹkarade mi. Emekeme ndikot emi ke 2 Timothy 3:1-5. Ke ini esede nte mme owo ẹdude uwem ẹnyụn̄ ẹnamde n̄kpọ, anaedi omokụt ke prọfesi emi ke osu.

Nso ke emi ọwọrọ? Ọwọrọ ke ibịghike, Obio Ubọn̄ Abasi ọmọn̄ edi, ndien ke enye ayanam uwem enen̄ede enem ke isọn̄ emi. (Luke 21:36) Bible etịn̄ nti n̄kpọ oro Abasi ọn̄wọn̄ọde ndinam nnọ mme owo ke isọn̄ emi. Yak ineme ndusụk.

“Ẹnọ enye [Jesus] ukara ye itie ukpono ye obio ubọn̄, ẹte kpukpru owo ye mme idụt ye usem ẹnam n̄kpọ ẹnọ enye. Ukara esie edi nsinsi ukara emi mîdibehe ifep, obio ubọn̄ esie onyụn̄ edi obio ubọn̄ oro owo mîdisoboke.”—DANIEL 7:14.

Nso ke emi ọwọrọ? Abasi emek Jesus Eyen esie Edidem Obio Ubọn̄ Esie. Obio Ubọn̄ emi ọfọn akan ukara efen ekededi, ndien enye edikara ofụri isọn̄. Afo emekeme nditiene ndu do.

“Baba andidụn̄ kiet ididọhọke ite: ‘Ndọdọn̄ọ.’”—ISAIAH 33:24.

Nso ke emi ọwọrọ? Udûdọn̄ọke aba, udûnyụn̄ ubiomoke ndo; edidu uwem ke nsinsi.

“Enye amanam ekọn̄ etre tutu esịm utịt isọn̄.”—PSALM 46:9.

Nso ke emi ọwọrọ? Owo idin̄wanake aba ekọn̄, kpukpru ufen emi mme owo ẹsibọde ke ntak ekọn̄ oyonyụn̄ etre.

“Idiọkowo ididụhe aba. . . . Mbon nsụkidem ẹyeda isọn̄ ẹnyene.”—PSALM 37:10, 11.

Nso ke emi ọwọrọ? Mme idiọkowo ididụhe aba, mbon emi ẹnamde se Abasi ọdọhọde kpọt ẹdidu.

“Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ.”—ISAIAH 65:21, 22.

Nso ke emi ọwọrọ? Kpukpru itie ke ererimbot ediyeye. Abasi ọyọbọrọ akam oro isibọn̄de ite yak ẹnam uduak esie “ke isọn̄.”—Matthew 6:10.