Ndusụk mbon emi ẹkotde mbụk emi itọk itọk ẹsibụp mbụme emi. Edi, mme ufan̄ikọ oro ẹtịn̄ ẹban̄a owo iba emi ẹkekerede enyịn̄ oro. Iyekpep n̄kpọ ito mbụk oro edieke ifiakde ise se iketịbede.

Edidem Saul ke Israel ekenyene nditọiren itiaba ye nditọiban iba. Jonathan ekedi akpan esie. Nte ini akakade, Rizpah an̄wanesa Saul ama aman eyeneren emi ekekerede Mephibosheth ọnọ Saul. Jonathan n̄ko ama enyene eyen emi ekekerede Mephibosheth. Ọwọrọ Edidem Saul ekedi enyene eyen emi ekerede Mephibosheth, enyene eyeyen emi ekerede ukem enyịn̄ oro.

Ama odu ini emi Edidem Saul okodomode ndiwot kpukpru mbon Gibeon ke Israel. Etie nte enye ama owot ndusụk mmọ. Se enye akanamde oro ikọfọnke sia ke eyo Joshua, mbọn̄ Israel ẹma ẹnam ediomi emem ye mbon Gibeon.​​—Josh. 9:​3-27.

Ediomi oro okosụk ododu ke ini Edidem Saul akakarade. Edi edidem oro ama odomo ndisọhi mbon Gibeon mfep idọn̄ke enyịn ke ediomi oro. N̄kpọ oro ama anam “Saul ye ufọk esie ẹnyene ubiomikpe iyịp.” (2 Sam. 21:1) David ama edidi edidem ke akpatre. Ndien mbon Gibeon emi ẹkeyọhọde ẹsụhọ ẹma ẹketịn̄ idiọkn̄kpọ Saul emi ẹnọ David. David ama obụp mmọ se mmọ ẹyomde ẹnam man ẹsio isop idiọkn̄kpọ oro, man Jehovah onyụn̄ ọdiọn̄ isọn̄ Israel. Mmọ ikoyomke okụk, ẹkedọhọ yak ẹnọ mmimọ nditọiren itiaba ke otu nditọ owo emi ‘akaduakde ndisọhi mmimọ mfep’ yak ikowot. David ama anam se mmọ ẹkedọhọde oro.​​—2 Sam. 21:​2-6; Num. 35:​30, 31.

Mbemiso ini emi, Saul ye Jonathan ẹma ẹkpan̄a ke ekọn̄. Edi Mephibosheth eyen Jonathan okosụk ododu. Enye ekedi mbụn̄ọ tọn̄ọ ọkọduọ ini edide ekpri, ikonyụn̄ inyeneke ubọk ke se ete ete esie akanamde mbon Gibeon. David ama anam ediomi ye Jonathan ke imọ iyama enye ye nditọ esie. Ediomi oro eyenyene ufọn ọnọ nditọ Jonathan, ndien Mephibosheth ekedi eyen Jonathan. (1 Sam. 18:1; 20:42) Bible ọdọhọ ke ‘mbọm Mephibosheth, eyen Jonathan kpa eyen Saul, ama anam Edidem David ke ntak un̄wọn̄ọ oro ẹkedade enyịn̄ Jehovah ẹn̄wọn̄ọ.’​​—2 Sam. 21:7.

David ama anam se mbon Gibeon ẹkedọhọde oro. Enye ama ayak ẹmen nditọ irenowo Saul iba, emi kiet ekekerede Mephibosheth, ye nditọ nditọ Saul irenowo ition ẹkewot. (2 Sam. 21:​8, 9) Se David akanamde oro ama osio isop iyịp oro ke idụt mmọ.

Se iketịbede emi idịghe ikpîkpu mbụk. Ibet emi Abasi ọkọnọde ete “ẹkûwot . . . nditọ ẹban̄a idiọkn̄kpọ mme ete” ama an̄wan̄a kpukpru owo. (Deut. 24:16) Jehovah ikpekenyịmeke ẹwot nditọ Saul iba ye nditọ nditọ esie ition ekpedi mmọ ikenyeneke ubọk ke idiọkn̄kpọ Saul. Ibet oro afiak ọdọhọ ete: “Ẹdiwot owo kiet kiet ke idiọkn̄kpọ esiemmọ.” Etie nte mbon ubon Saul itiaba emi ẹkewotde ẹma ẹnyene ubọk ke se Saul akaduakde ndinam mbon Gibeon. Ndien oro akanam mmọ ẹbọ ufen idiọkn̄kpọ mmọ.

Mbụk Bible emi anam ikụt ke owo ikemeke ndinam idiọkn̄kpọ mma n̄kere mîdịghe ndọhọ ke imọ inyeneke se iduede, ke inam se ẹkedọhọde imọ inam. Se enye akanamde odoro enye ke idem. Ata eti n̄ke kiet ke Bible ọdọhọ ete: “Nam usụn̄ ukot fo ọdọnọ, nyụn̄ yak ofụri usụn̄ fo ọsọn̄ọ ada. Kûwọn̄ọde uka nnasia m̀mê ufien. Sio ukot fo fep ke se idiọkde.”​​—N̄ke 4:​24-27; Eph. 5:15.