NDI akanam emenyene mfịna ndien enye etie fi nte ke se iwọrọde fi oro, ke ediyọ ikpọn̄? Idu uwem ke “ndiọkeyo emi ọsọn̄de ndiyọ,” emi ekemede ndinam idem emem nnyịn mîdịghe anam etie nte ke idu ikpọn̄. (2 Tim. 3:1) Edi ima inyene mfịna, mme owo do emi ẹkemede ndin̄wam nnyịn. Bible owụt ufọn ndinyene mme ata ufan ke “ini nnanenyịn.”​—N̄ke 17:17.

Apostle Paul ama asan̄a ye ndusụk ufan esie aka nsio nsio itie ọkọkwọrọ ikọ. Mmọ ẹma ẹnyụn̄ ẹn̄wam enye ke ediwak usụn̄. (Col. 4:7-11) Ini ẹkekọbide Paul ke Rome, mme ufan esie ẹma ẹn̄wam enye ẹnam mme n̄kpọ emi enye mîkekemeke ndinam ke idemesie. Ke uwụtn̄kpọ, Epaphroditus ama ọnọ Paul mme n̄kpọ emi enye okoyomde, emi nditọ-ete irenowo ye iban ke Philippi ẹkenọde ẹsọk enye. (Phil. 4:18) Tychicus ama emen mme leta Paul ọsọk nsio nsio esop. (Col. 4:7; se se ẹwetde ẹban̄a itie Bible emi ke nwtsty.) Ke ntak emi mme ufan Paul ẹken̄wamde enye, enye ama ekeme ndisọn̄ọ mme esop idem, idem ke ini ẹkekọbide enye ẹtem ke ufọk, m̀mê ke ini ẹkedisịnde enye ke ufọk-n̄kpọkọbi. Nso ke afo ekeme ndinam mfịn man owụt ke edi ata ufan?

Nditọ-ete irenowo ye iban do mfịn emi ẹwụtde nte mme ata ufan ẹsin̄wamde kiet eken. Elisabet edi asiakusụn̄ ofụri ini ke Spain. Kop se enye etịn̄de mi aban̄a nte sista kiet okowụtde ke idi ufan esie. Ini dọktọ ọkọdọhọde ke eka Elisabet enyene ata idiọk kansa emi ediwotde enye, sista oro ama esinọ Elisabet ediwak etop ke fon ada ọsọn̄ọ enye idem. Enye ekesida mme etop esie oro oto Bible. Elisabet ọdọhọ ete: “Mme etop oro ẹma ẹsinọ mi odudu n̄keme ndinam se nyomde ndinam ke usen ke usen, inyụn̄ itiehe mi nte ke ndu ikpọn̄.”​—N̄ke 18:24.

Ima in̄wam nditọ-ete nnyịn ẹkeme ndika ukwọrọ-ikọ mîdịghe ẹkeme ndika mbono esop, nnyịn ye mmọ iyetetịm idi ufan. Ke uwụtn̄kpọ, ndi emekeme ndiwat brọda m̀mê sista emi okponde owo n̄ka mbono esop mîdịghe ukwọrọ-ikọ? Edieke anamde ntre, ana-edi ọyọsọn̄ọ enye idem, enye n̄ko ọyọsọn̄ọ fi idem. (Rome 1:12) Edi ndusụk Christian isikemeke ndikpọn̄ ufọk mmọ. Didie ke ikeme ndiwụt ke idi ata ufan inọ utọ mbon oro?

Ndusụk nditọ-ete nnyịn ikemeke ndidụk mbono esop ke Ufọkmbono Obio Ubọn̄, ekeme ndidi ke ntak idiọk udọn̄ọ m̀mê mfịna en̄wen. Kop uwụtn̄kpọ David emi ọkọdọn̄ọde kansa. Ke se ibede ọfiọn̄ itiokiet, enye ke ọkọbọ usọbọ kansa oro. Ke ofụri ini emi enye ọkọbọde usọbọ oro, David ye Lidia n̄wan esie ẹkeda Intanet ẹdụk mbono esop.

Didie ke mme ufan mmọ ke esop ẹken̄wam mmọ? Ekesidi mbono esop ama asuana, ndusụk mbon emi ẹkedụkde mbono esop ke Ufọkmbono  Obio Ubọn̄ ẹyenam se mmọ ẹkekeme man ẹda Intanet ẹneme nneme ye David ye Lidia. N̄kpọ en̄wen edi ke ini David ye Lidia ẹbọrọde mbụme, nditọ-ete ẹyenọ mmọ etop ke mbono esop ama akasuana ẹdọhọ mmọ ke ibọrọ mmọ oro ama enem mmimọ. Utịp ekedi nso? Ikenen̄ekede itie David ye Lidia ke idem nte ke mmọ ẹdu ikpọn̄.

Ndi imekeme ndinam ndutịm ukwọrọ-ikọ nsịn mbon emi mîkemeke ndikpọn̄ ufọk mmọ? Edieke ikpụhọrede ndusụk n̄kpọ ke ndutịm nnyịn, imekeme ndiwụt ke nnyịn ifreke utọ mbon oro. (N̄ke 3:27) Ntak emi mûsioho ini utie ye mmọ uwet leta ukwọrọ ikọ mîdịghe ẹkot owo ke fon ẹkwọrọ? Mbon emi mîkemeke ndikpọn̄ ufọk ẹkeme ndida Intanet ẹdụk mbono an̄wa-utom. Ama enem David ye Lidia nte esop mmọ ẹkenamde utọ ndutịm oro. David ọdọhọ ete: “Nnyịn ndikonyụn̄ ntie ye nditọ-ete nnyịn irenowo ye iban n̄kop ibio ibio nneme ye nte ẹbọn̄de akam ama esinen̄ede ọsọn̄ọ nnyịn idem.” N̄kpọ en̄wen edi, edieke nte n̄kpọ etiede mîdidịghe mfịna inọ iso m̀mê edem, edieke onyụn̄ odotde se ẹnamde ntre, ndi emekeme ndisimen eyen ukpepn̄kpọ Bible fo ke ini ke ini aka ufọk asuanetop emi mîkemeke ndikpọn̄ ufọk eketie ekpep Bible?

Ima idiana ye nditọ-ete nnyịn emi mîkemeke ndikpọn̄ ufọk inam n̄kpọ inyụn̄ ida enyịn nnyịn ikụt nti edu mmọ, imesitetịm ikpere mmọ. Ke uwụtn̄kpọ, ama adiana ye utọ mme asuanetop oro ọkwọrọ ikọ onyụn̄ okụt nte mmọ ẹnen̄erede ẹda Ikọ Abasi ẹkpep owo n̄kpọ tutu se mmọ ẹkpepde oro odụk owo esịt, ana-edi eyetetịm ekpere mmọ. Emekeme ndinyene mbufa ufan ke ini an̄wamde nditọ-ete ẹka ukwọrọ-ikọ ẹnyụn̄ ẹdụk mbono esop.​—2 Cor. 6:13.

Paul ndikodu ye Titus ufan esie ama ọdọn̄ enye esịt. (2 Cor. 7:5-7) Mbụk mmọ oro eti nnyịn nte ke idịghe n̄kọ itetịn̄ ikọ idọn̄ mme owo esịt ke ida iwụt ke imokop mmọ mbọm, edi ke nnyịn ndidu ye mbon emi ẹnyenede mfịna inyụn̄ inam se ededi emi nnyịn ikemede man in̄wam mmọ owụt n̄ko ke imokop mmọ mbọm.​—1 John 3:18.

Nditọ-ete nnyịn irenowo ye iban ke Russia ẹnịm eti uwụtn̄kpọ ke ndin̄wam kiet eken. Kop uwụtn̄kpọ Sergey ye n̄wan esie Tatyana. Ke mme bodisi ẹma ẹkedi ufọk mmọ ẹdisuan ẹyom n̄kpọ, ẹma ẹmen mmọ mbiba ẹdaha ndikafak mbụme. Tatyana ke ẹkebem iso ẹsana ẹyak ekem enye ọnyọn̄ ufọk. Sergey ọdọhọ ete: “Ndondo emi [Tatyana] esịmde ufọk, sista kiet emi ekenyenede uko ama edi ufọk nnyịn. Ekem uwak mme ufan nnyịn en̄wen ẹma ẹdi n̄ko ẹdin̄wam nnyịn ẹfiak ẹtan̄ mme n̄kpọ ẹbono ke nde ke nde.”

Sergey adian do ete: “Idịghe mfịn ke n̄kọtọn̄ọ ndima Mme N̄ke 17:17 emi ọdọhọde: ‘Ata ufan amama ufan kpukpru ini, onyụn̄ edi eyeneka emi amanade ọnọ ini nnanenyịn.’ Mme ikọ emi ẹnen̄ede ẹn̄wan̄a mi ini ẹsụk ẹkọbọde mi mi, ami nnyụn̄ n̄kemeke ndiyọ ikpọn̄. Jehovah anam nnyene mme ufan emi mîfeheke ndịk, emi ẹdude ye ami.” a

Imoyom mme ufan nnyịn ẹn̄wam nnyịn idaha-emi n̄kpọ ọsọn̄de ntem. Edi iyoyom yak mmọ ẹtetịm ẹn̄wam nnyịn ke ini akwa ukụt. Ntre ẹyak inam ofụri se ikekeme ndidi ata ufan idaha-emi!​—1 Pet. 4:7, 8.