Ndi ama etịn̄ enyịn okot mme Enyọn̄-Ukpeme isua emi? Ọfọn, se m̀mê emekeme ndibọrọ mme mbụme emi:

Didie ke Jehovah owụt nte ẹkemede ndinam n̄kpọ ye iban?

Enye isisarike mmọ, inyụn̄ imaha irenowo ikan iban. Abasi esikpan̄ utọn̄ ọnọ iban, nte etiede mmọ ke idem ye se ifịnade mmọ ẹsibehe enye. Enye esinyụn̄ ọnọ mmọ utom ẹnam.​—w24.01, p. 15-16.

Didie ke ikpanam se idude ke Ephesus 5:7 emi ọdọhọde: “Ẹkûnyene n̄kpọ ndinam ye mmọ”?

Apostle Paul okodụri nnyịn utọn̄ ete ikûdụk ndụk ye mbon emi ẹdinamde enen̄ede ọsọn̄ nnyịn ndidu uwem nte Jehovah oyomde. Utọ ndụk oro idịghe sụk ye mbon emi ikụtde iso ye iso itie kiet ineme nneme. Ndineme nneme ye mme owo ke Intanet esịne do.​—w24.03, p. 22-23.

Mme nsunsu mbụk ewe ke akpana ikpeme idem?

Oyom ikpeme idem ye mbụk emi nditọete nnyịn ẹdọhọde nnyịn edi emi mmọ mîkodụn̄ọkede idiọn̄ọ m̀mê edi akpanikọ, ikpeme idem ye e-mail emi nnyịn mîdiọn̄ọke owo emi ọnọde nnyịn, inyụn̄ ikpeme idem ye mbon emi mîdịghe aba Mme Ntiense Jehovah, edi ẹnam n̄kari nte iyom ndikpep Bible.​—w24.04, p. 12.

Nso ke idiọn̄ọ iban̄a se Jehovah edibierede inọ Edidem Solomon, mbon oro ẹkekpan̄ade ke Sodom ye Gomorrah, ye ke Ukwọ? Nso ke nnyịn mîdiọn̄ọke?

Nnyịn idiọn̄ọke m̀mê Jehovah ama ebiere ete ke ndomokiet ke otu mmọ idisetke tutu amama. Edi se idiọn̄ọde edi ke enye ọdiọn̄ọ kpukpru n̄kpọ, esinyụn̄ okop mme owo mbọm utọ oro idụhe.​—w24.05, p. 3-4.

Nso ke Abasi ndidi “Akwa Itiat” anam inịm? (Deut. 32:4)

Imekeme ndida Jehovah nte ebiet ubọhọ nnyịn. Enye edi se ẹberide edem; enye esinam kpukpru se enye ọkọn̄wọn̄ọde. Enye isikpụhọkede, osụk ededi utọ Abasi emi enye ekedide toto ke editọn̄ọ; ikpụhọkede edu esie ye se enye akaduakde ndinam.​—w24.06, p. 26-28.

Nso ikeme ndin̄wam fi okop inem obufa esop emi odude?

Beri edem ke Jehovah emi edin̄wamde fi nte akan̄wamde mme asan̄a-utom esie ke eset. Kpọn̄ ndimen obufa esop n̄kodomo ye akani esop. Tiene sịn idem nam se ẹnamde ke obufa esop emi odude nyụn̄ domo ndinyene mbufa ufan.​—w24.07, p. 26-28.

Uwụtn̄kpọ ita emi ẹdude ke Matthew ibuot 25 ẹkpep nnyịn nso?

Uwụtn̄kpọ erọn̄ ye ebot anam inen̄ede ikụt ke ọfọn inyene mbuọtidem inyụn̄ isọn̄ọ ida ye Abasi. Uwụtn̄kpọ nditọiban emi ẹkedide mme enyene ọniọn̄ ye mbon emi ẹkedide mme ndisịme owụt ke ọfọn iben̄e idem inyụn̄ itat enyịn ise se ikade iso. Uwụtn̄kpọ talent anam ikụt ke ọfọn iwụt ke nnyịn idịghe ifu, ke imonyụn̄ itịn̄ enyịn inam se ẹdọn̄de nnyịn.​—w24.09, p. 20-24.

Etehe temple Solomon okokon̄ didie?

Ke 2 Chronicle 3:4, ndusụk edikabade ẹdọhọ ke ekedi cubit 120, oro ọwọrọ mita 53. Edi mme ikpan̄wed eset en̄wen emi ẹnen̄erede ẹnịm ke se ẹwetde do enen ẹdọhọ “cubit 20,” oro edi mita usụkkiet. Ke ntak nte ibibene temple oro eketiede, etie nte cubit 20 edi nnennen.​—w24.10, p. 31.

Asan̄a-utom unamutom ndidi “ebe n̄wan kiet” ọwọrọ nso? (1 Tim. 3:12)

Ọwọrọ ke enye ọdọ n̄wan kiet kpọt, ikponyụn̄ inamke oburobụt idan̄. N̄kpọ efen edi ke enye ikpesehe n̄wan en̄wen ke an̄wa.​—w24.11, p. 19.

Ntak emi ikemede ndidọhọ ke se ẹtịn̄de ke John 6:53 ikowụtke se akpanade ẹnam ke ini Udia Mbubreyo Ọbọn̄?

John 6:53 ọdọhọ ke ana ẹta obụkidem Jesus ẹnyụn̄ ẹn̄wọn̄ iyịp esie. Jesus eketịn̄ ikọ oro ke isua 32 C.E., ke Galilee, okonyụn̄ etịn̄ ye mme Jew emi mîkọbuọtke idem ye enye kan̄a. Edi ke isua kiet ama ekebe ke enye ọkọtọn̄ọ Udia Mbubreyo Ọbọn̄ ke Jerusalem. Ke ini edinam oro, Jesus eketịn̄ ikọ ye mbon emi ẹditienede enye ikakara ke heaven.​—w24.12, p. 10-11.