Ima isidọhọ ndusụk ini ke akana Messiah oto ubon akpan. Etie nte se isikotde ke Mme Hebrew 12:16 akanam isidọhọ ntre. Itien̄wed oro ọdọhọ ke Esau ‘ikowụtke esịtekọm inọ ndisana n̄kpọ,’ ama onyụn̄ ‘ada unen esie nte akpan okpụhọ ye Jacob ke ntak udia ini kiet.’ Sia Esau ama akanyam itie akpan ọnọ Jacob, etie nte emi akanam ikere ke oro akanam Jacob odot nditiene ndi ete ete Messiah.​—Matt. 1:​2, 16; Luke 3:​23, 34.

Edi ke ima ikafiak idụn̄ọde se Bible etịn̄de, imedikụt ke idịghe owo ededi akpan, enye ekeme nditiene ndi ete ete Messiah. Yak ise se inamde idọhọ ntre.

Akpan Jacob, m̀mê Israel, ekedi Reuben emi Leah akamande. Ekem, Rachel an̄wan ima Jacob ama aman akpan esie, Joseph. Ke ini Reuben akanamde oburobụt ido, ẹma ẹbọ enye itie akpan ẹnọ Joseph. (Gen. 29:​31-35; 30:​22-25; 35:​22-26; 49:​22-26; 1 Chron. 5:​1, 2) Kpa ye oro, Joseph iketieneke idi ete ete Messiah, Reuben ikonyụn̄ idịghe. Utu ke oro, Judah ọyọhọ eyen Jacob inan̄, emi Leah akamande ekedi.​—Gen. 49:10.

Luke 3:32 asiak owo ition en̄wen emi ẹketienede ẹdi mme ete ete Messiah. Etie nte kpukpru mbon oro ẹsiakde ke itien̄wed  emi ẹkedi akpan. Boaz okobon Obed, ndien Obed obon Jesse.​—Ruth 4:​17, 20-22; 1 Chron. 2:​10-12.

David eyen Jesse ikedịghe akpan, enye ekedi akpatre ke otu nditọiren itiaita emi Jesse ekenyenede. Kpa ye oro David mîkedịghe akpan, enye ama etiene edi ete ete Messiah. (1 Sam. 16:​10, 11; 17:12; Matt. 1:​5, 6) Owo en̄wen emi eketienede edi ete ete Messiah ekedi Solomon eyen David, enye ikonyụn̄ idịghe akpan.​—2 Sam. 3:​2-5.

Se inemede emi iwọrọke ke inyeneke se ẹkedade akpan ẹdọn̄. Ẹma ẹsinen̄ede ẹkpono akpan; ke ini ete akpade, enye ekesidi ibuot ufọk. Ke ini ẹdemede n̄kpọ ke ubon, ẹkesinọ akpan udeme n̄kpọ iba.​—Gen. 43:33; Deut. 21:17; Josh. 17:1.

Ẹma ẹsibọ owo itie akpan ẹnọ owo en̄wen. Abraham ama ọbọ Ishmael itie akpan ọnọ Isaac. (Gen. 21:​14-21; 22:2) Nte ima iketetịn̄, ẹma ẹbọ Reuben itie akpan ẹnọ Joseph.

Idahaemi, ẹyak ifiak ise Mme Hebrew 12:16 oro iketịn̄de iban̄a ke ntọn̄ọ. Itien̄wed oro ọdọhọ ete: “Mbak owo use m̀mê owo ekededi eke mîwụtke esịtekọm inọ ndisana n̄kpọ edidu, nte Esau, emi akadade unen esie nte akpan okpụhọ ye udia ini kiet.” Nso ke ikọ Paul emi ọkọwọrọ?

Apostle Paul iketịn̄ke iban̄a mbon oro ẹkedide mme ete ete Messiah. Mbemiso enye eketịn̄de se idude ke Mme Hebrew 12:​16, enye ama ọdọhọ ikọt Abasi “ẹsiak afan̄ eke enende ẹnọ ikpat” mmọ. Emi idiyakke mmọ ‘ẹtaba mfọnido Abasi oro owo mîdotke,’ sia mmọ ẹkeme nditaba mfọn Abasi edieke mmọ ẹnamde use. (Heb. 12:​12-16) Edieke mmọ ẹnamde use, mmọ ẹditie nte Esau emi mîkowụtke “esịtekọm inọ ndisana n̄kpọ,” okonyụn̄ esịnde n̄kpọ Abasi ke ndek.

Ke eyo mme Esau, ibuot ufọk ekesiwa uwa ọnọ Abasi ke ibuot ubon esie; etie nte Esau ama esitiene awa uwa ndusụk ini ọnọ Abasi ke ibuot ubon mmọ. (Gen. 8:​20, 21; 12:​7, 8; Job 1:​4, 5) Sia enye mîkamaha n̄kpọ Abasi, enye ama ayak kpukpru unen esie nte akpan atak ke ntak udia inikiet. Ekeme ndidi enye ikoyomke nditiene mbọ ufen oro ẹkedọhọde ke eyesịm mfri Abraham. (Gen. 15:13) Esau ama owụt n̄ko ke imọ imaha n̄kpọ Abasi, inyụn̄ “iwụtke esịtekọm inọ ndisana n̄kpọ” ke ini enye ọkọdọde iban iba emi ẹkedide mme okpono ndem. Oro ama anam uwem odorode ete ye eka esie. (Gen. 26:​34, 35) Omokụt do ke Esau iketiehe nte Jacob emi ọkọdọde n̄wan emi okponode Jehovah!​—Gen. 28:​6, 7; 29:​10-12, 18.

Idahaemi ẹyak imen ikọ nnyịn ikesịn ke ufọk. Nso ke ikpetịn̄ iban̄a mbon oro ẹketienede ẹdi mme ete ete Messiah? Ndusụk mmọ ẹkedi akpan, ndusụk ikedịghe. Mme Jew ẹma ẹfiọk emi, oro akanam mmọ ẹdọhọ ke Christ edi eyen David. David ekedi akpatre eyeneren Jesse.​—Matt. 22:42.