N̄KPỌ NTE usem 7,000 ẹdu ke ererimbot emi. Ndien sia usem awakde ntem, ekeme ndisọn̄ mme akaisan̄, mme anyamurua, nditọ ufọkn̄wed, ye mbon ukara ndineme nneme ye kiet eken. Idịghe mfịn ke emi ọkọtọn̄ọ. Ke uwụtn̄kpọ, n̄kpọ nte isua 475 mbemiso Christ, ke ini ukara Edidem Ahasuerus (etie nte enye ekedi Xerxes I), mbon Persia ẹma ẹnọ ewụhọ edidem ẹsọk “mme ikpehe obio ukara emi ẹtọn̄ọde ke India tutu ẹsịm Ethiopia, ikpehe obio ukara ikie ye edịp ye itiaba, ẹnọ ẹsọk ikpehe obio ukara kiet kiet ke ido uwetn̄kpọ esie ẹnyụn̄ ẹnọ ẹsọk idụt kiet kiet nte usem esie edide.” *

Ata ediwak n̄ka m̀mê esop, esịnede ukara, ikpamaha ndinam utọ ọkpọsọn̄ utom emi mfịn. Edi enyene mbon oro ẹnamde utom emi. Mme Ntiense Jehovah ẹsio magazine, vidio, n̄wed, ye mme n̄kpọ ntre ke se ibede usem 750. Emi esịne n̄ko n̄kpọ nte usem idiọn̄ọ 80. Mmọ ẹnyụn̄ ẹsion̄o n̄wed mme nnan ke utọ ke utọ.

Ke adianade do, Mme Ntiense Jehovah ẹnam utom mmọ ke mfọn. Owo inyụn̄ ikpehe mbon oro ẹkabarede mme n̄wed emi, okụk. Mmọ ye Mme Ntiense eken ẹnam utom emi ke imaesịt. Ntak emi mmọ ẹnen̄erede ẹsịn idem ẹkabade n̄wed ẹsịn ke ediwak usem, ndien didie ke mmọ ẹsinam emi?