Ebe ye n̄wan emi ẹsidianade kiet ẹnam n̄kpọ ẹtie nte awat-ubomofụm ye udiana esie emi ẹdianade kiet ẹwat ubomofụm. Idem ke ini ebe ye n̄wan ẹnyenede mfịna, ebe idikereke iban̄a idemesie kpọt, n̄wan idinyụn̄ ikereke iban̄a idemesie kpọt, edi mmọ mbiba ẹdikere iban̄a kiet eken.

SE BIBLE ETỊN̄DE: “Mmọ idịghe aba owo iba, edi ẹdi obụk kiet.”​—Matthew 19:6.

“Ndọ idịghe n̄kpọ owo kiet. Ebe ye n̄wan ẹnyene ndidiana kiet nnam enye enem.”​—Christopher.

Ke ini ebe ye n̄wan emi mîdianake kiet ẹnyenede mfịna, mmọ ẹsitọhọ ye kiet eken utu ke ndiyom usụn̄ n̄kọk mfịna mmọ. Emi esinam ekpri n̄kpọ akabade ata akamba mfịna.

“Ebe ye n̄wan ẹkpenyene ndidiana kiet nnam n̄kpọ. Edieke ami ye ebe mi mîdianake kiet, ọwọrọ idụn̄ nte owo iba emi ẹbuanade ubet ufọk kiet, idụn̄ke nte ebe ye n̄wan. Ndien emi ekeme ndida mfịna ndi ke ini iyomde ndibiere akpan n̄kpọ.”​—Alexandra.

FIAK SE NTE ESINAMDE N̄KPỌ

• Ndi nsida okụk emi n̄n̄wanade nte okụk mi kpọt?

• Ndi uwem esinen̄ede enem mi ke ini ndude ikpọn̄ m̀mê ke ini ndude ye ebe m̀mê n̄wan mi?

• Ndi nsimaha ndidian idem ye mbon mme ebe m̀mê n̄wan mi kpa ye oro n̄kụtde ke enye adian idem ye mmọ?

NEME N̄KPỌ EMI YE EBE M̀MÊ N̄WAN FO

• Nso ye nso ke isidiana kiet inam?

• Nso ye nso ke oyom inen̄ede idiana kiet inam?

• Nso ke ikpanam man inen̄ede ima ndisidiana kiet nnam n̄kpọ?

NAM EMI ISE

• Da nte ke ebre tenis ye ebe m̀mê n̄wan fo. Utu ke ndiyom ndibre n̄kan enye, ọfọn ẹdiana kiet ẹbre.

• Kûkere nte akpakande ebe m̀mê n̄wan fo, edi kere nte mbufo mbiba ẹkpekande.

“Fre ban̄a m̀mê anie enen m̀mê anie mînenke. Se ikam idide akpan n̄kpọ ke ndọ edi ndidiana kiet nnyụn̄ ndụn̄ ke emem.”​—Ethan.

SE BIBLE ETỊN̄DE: “Ẹkûse ẹban̄a mbubehe mbufo kpọt, edi ẹse ẹban̄a mbubehe mbon en̄wen n̄ko.”​—Philippi 2:​3, 4.