Se Ifiọkde Iban̄a Abasi Anam Iyom Ndidi Ufan Esie
Abasi enen̄ede enyene odudu onyụn̄ enyene nti edu. Enye oyom nnyịn ikpep n̄kpọ iban̄a imọ inyụn̄ idi ufan imọ. (John 17:3; James 4:8) Ntak edi oro enye etịn̄de ediwak n̄kpọ aban̄a idemesie ke Bible.
Abasi Enyene Enyịn̄
“Man mme owo ẹkpefiọk ẹte ke afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.”—PSALM 83:18.
Bible ọdọhọ ke Jehovah kpọt edi ata Abasi. Enye okobot ekondo ye ofụri se idude ke esịt. Enye ikpọn̄ ke ikpatuak ibuot inọ.—Ediyarade 4:11.
Jehovah Edi Abasi Ima
“Abasi edi ima.”—1 JOHN 4:8.
Jehovah ada Bible ye mme n̄kpọ emi enye obotde anam idiọn̄ọ utọ owo emi enye edide. Ima edi ata akpan edu esie. Ima esinam enye anam kpukpru n̄kpọ. Nte ikpepde n̄kpọ iban̄a Jehovah, ntre ke idinen̄ede ima enye.
Jehovah Esifen Ọnọ Mme Owo
‘Afo edi Abasi emi efende ọnọ owo.’—NEHEMIAH 9:17.
Jehovah ọdiọn̄ọ ke nnyịn ifọnke ima, ntre enye ‘esifen ọnọ’ nnyịn. Ke ini ikpede enye ubọk inyụn̄ isịnde ukeme itre ndinam idiọkn̄kpọ, enye eyefen ọnọ nnyịn, idinyụn̄ idaha idiọkn̄kpọ oro imia nnyịn ufen.—Psalm 103:12, 13.
Jehovah Oyom Ibọn̄ Akam Inọ Imọ
“Jehovah emekpere kpukpru mbon oro ẹsemede ẹkot enye . . . Enye oyokop eseme emi mmọ ẹsemede ẹyom un̄wam.”—PSALM 145:18, 19.
Inyeneke san̄asan̄a n̄kpọ emi Jehovah ọdọhọde inam m̀mê ikama ke ini ibọn̄de akam inọ enye. Enye esikpan̄ utọn̄ ọnọ nnyịn ke ini ibọn̄de akam, kpa nte ete ye eka ẹsikpan̄de utọn̄ ẹnọ nti nditọ mmọ.
Ekeme Ndidi Ayama Mmọ Emi N̄ko
BIBLE EKEME NDIBỌRỌ MBỤME FO
Ndi Abasi Onyụn̄ Etie nte Odudu?
Bible ọdọhọ ke Abasi okobot kpukpru n̄kpọ, edi ndi enye ekere aban̄a nnyịn?
BIBLE EKEME NDIBỌRỌ MBỤME FO
Ndi Abasi Eyefen Ọnọ Mi?
Se se Bible ẹtịn̄de aban̄a se ikpanamde man Abasi efen ọnọ nnyịn.
