Isaiah 45;1-25
45 Ntem ke Jehovah ọdọhọ Cyrus, enye emi enye eyetde aran,+ emi mmụmde enye ubọk nnasia,+ man n̄kan mme idụt ke iso esie,+ man n̄kpatat isịn ndidem; man mberede mme eberede-iba usụn̄ ke iso esie, mbak ẹdiberi mme inuaotop:
2 “Ami nyebem fi iso n̄ka,+ nyonyụn̄ nnam mme n̄kpotụk n̄kpotụk ebiet ẹdọnọ.+ Nyanuak mme usụn̄ okpoho mbai mbai, nnyụn̄ n̄kpok mme ukwak usịnusụn̄ mfep.+
3 Ndien ami nyọnọ fi mme n̄kpọuto+ oro ẹdude ke ekịm ye mme n̄kpọuto oro ẹdịpde ke mme ebiet udịbe, man afo ọfiọk ke ami ndi Jehovah, Enye emi okotde fi ke enyịn̄+ fo, kpa Abasi Israel.
4 Ami n̄kakam n̄kot fi ke enyịn̄ fo ke ntak Jacob asan̄autom mi ye ke ntak Israel, owo mi emi mmekde;+ n̄kọnọ fi enyịn̄ ukpono, okposụkedi emi afo mûkọfiọkke mi.+
5 Ami ndi Jehovah, ndien baba kiet efen idụhe.+ Abasi idụhe ke ẹsiode mi ẹfep.+ Ami nyetịm mbọp fi mbọbọ, okposụkedi emi afo mûfiọkke mi,
6 man mme owo ẹkpefiọk ke edem usiahautịn ye ke edem usoputịn ẹte ke baba Abasi kiet idụhe ke ẹsiode mi ẹfep.+ Ami ndi Jehovah, ndien baba kiet efen idụhe.+
7 Ami nnam un̄wana+ nnyụn̄ mbot ekịm,+ nnam emem+ nnyụn̄ mbot afanikọn̄,+ ami Jehovah nnam kpukpru n̄kpọ emi.+
8 “O mbufo mme heaven, ẹnam edinen ido ọtọi nte edịm;+ yak obubịt enyọn̄ ọtọi edinen ido.+ Yak isọn̄ okụbọde inua onyụn̄ osion̄o mbun̄wụm edinyan̄a, yak enye anam edinen ido asiaha+ ke ukem ini. Ami Jehovah mbot enye.”+
9 Mbọm owo eke an̄wanade ye Andibot enye,+ nte ubak usiọn̄ kiet adahade an̄wana ye mbai usiọn̄ eken! Nte mbateso+ ọkpọdọhọ andida enye mbot n̄kpọ ete: “Afo obot nso?” Nte utom fo okponyụn̄ ọdọhọ ete: “Enye inyeneke ubọk”?
10 Mbọm owo eke ọdọhọde ete esie ete: “Afo obon nso?” onyụn̄ ọdọhọde n̄wan ete: “Nso orụk uman abiak fi?”+
11 Ntem ke Jehovah, Edisana Abasi Israel+ ye Andibot+ enye, ọdọhọ ete: “Kam bụp mi mme n̄kpọ oro ẹdide,+ emi ẹban̄ade nditọ mi;+ mbufo ẹnyụn̄ ẹwụk mi nsian mbufo se ubọk mi anamde.+
12 Ami nnam isọn̄+ nnyụn̄ mbot owo nsịn ke esịt.+ Ubọk mi anyanade ikpaenyọn̄ enịm,+ ami nnyụn̄ n̄kara ofụri udịm esie.”+
13 “Ami mmedemede owo ke edinen ido,+ ndien nyanam kpukpru usụn̄ esie enen.+ Edi enye edibọp obio mi,+ oyonyụn̄ asana ikọt mi oro ẹdude ke ntan̄mfep ayak,+ idịghe ke ekọmurua+ inyụn̄ idịghe ke ubọkedem,” Jehovah mme udịm ọdọhọ.
14 Ntem ke Jehovah ọdọhọ ete: “Mbonutom Egypt+ emi owo mîkpehe okụk ye mbonurua Ethiopia ye mbon Seba,+ nnyan owo,+ ẹyedi ẹbịne fi, mmọ ẹyenyụn̄ ẹkabade ẹdi okwo.+ Mmọ ẹyesan̄a fi ke edem; mmọ ẹyebe ẹdi ye ebuka+ ẹnyụn̄ ẹdinụhọ ẹnọ fi.+ Mmọ ẹyebọn̄ akam ẹnọ fi ẹnyụn̄ ẹdọhọ ẹte, ‘Ke akpanikọ, Abasi abuana n̄kpọ ye afo,+ baba kiet efen inyụn̄ idụhe; Abasi efen idụhe.’”+
15 Ke akpanikọ afo edi Abasi emi edịbede,+ Abasi Israel, kpa Andinyan̄a.+
16 Kpukpru mmọ iditreke ndidia bụt ye esuene. Kpukpru mme andinam ndisọi mbiet ẹyesan̄a ke esuene.+
17 Amaedi Israel, ẹyenyan̄a enye koro enye abuanade n̄kpọ ye Jehovah,+ enye oyonyụn̄ enyene edinyan̄a ke nsinsi.+ Bụt idinamke mbufo,+ owo idinyụn̄ isueneke+ mbufo ke nsinsi nsinsi.
18 Koro ntem ke Jehovah ọdọhọ, kpa Andibot enyọn̄,+ Enye emi edide ata Abasi,+ kpa Andibot isọn̄ ye Andinam enye,+ Enye emi ọkọsọn̄ọde owụk enye,+ emi mîkobotke enye ke ikpîkpu, emi okobotde enye man ẹdụn̄ ke esịt:+ “Ami ndi Jehovah, ndien baba kiet efen idụhe.+
19 N̄ketiehe ke ebiet udịbe,+ ke n̄kịmn̄kịm ebiet isọn̄, ntịn̄ ikọ; n̄kọdọhọke mfri Jacob nte, ‘Mbufo ẹyom mi ke ikpîkpu.’+ Ami ndi Jehovah emi ntịn̄de se inende ye se idide akpanikọ.+
20 “Mbufo ẹsop idem ẹnyụn̄ ẹdi.+ Ẹsop idem ọtọkiet, mbufo emi ẹfehede ẹbọhọ mme idụt.+ Mbon oro ẹbiomde edisọi mbiet eto mmọ inyeneke ifiọk ndomokiet, kpasụk ntre ye mbon oro ẹbọn̄de akam ẹnọ abasi oro mîkemeke ndinyan̄a.+
21 Mbufo ẹtịn̄ se ẹnyenede ẹnyụn̄ ẹnọ uyarade ndisọn̄ọ se ẹtịn̄de.+ Ih, yak mmọ ẹsop ibuot ọtọkiet. Anie anam ẹkop emi toto ke eset?+ Anie ọtọt enye toto ke ini oro?+ Nte idịghe ami Jehovah, emi Abasi efen mîdụhe ke ẹsiode mi efep;+ edinen Abasi ye Andinyan̄a,+ emi baba kiet efen mîdụhe ke ẹsiode mi ẹfep?+
22 “Kpukpru mbufo ke utịt isọn̄, ẹwọn̄ọde ẹtiene mi man ẹnyan̄a mbufo;+ koro ami ndi Abasi, ndien baba kiet efen idụhe.+
23 Mmotomo idemmi+—ikọ ọmọwọrọ mi ke inua ke edinen ido,+ ntre enye idifiakke+—nte ke kpukpru edọn̄ ẹyetọn̄ọ ẹnọ mi,+ kpukpru edeme ẹyetomo,+
24 ẹte, ‘Ke akpanikọ Jehovah enyene ọyọhọ edinen ido ye odudu.+ Kpukpru mbon oro ẹyatde esịt ye enye ẹyedi nnennen ẹbịne enye, bụt oyonyụn̄ anam mmọ.+
25 Ke un̄wam Jehovah, kpukpru mfri+ Israel ẹyedi edinen+ ẹyenyụn̄ ẹbụre mbụre ẹban̄a idemmọ.’”+
