Genesis 6;1-22
6 Edikem ke ini mme owo ẹtọn̄ọde ndiwak ke iso isọn̄, nditọiban ẹnyụn̄ ẹmanade ẹnọ mmọ,+
2 nditọiren ata Abasi+ ẹtọn̄ọ ndikụt+ nditọiban owo, nte mmọ ẹyede; ndien mmọ ẹda kpukpru iban oro mmọ ẹmekde ẹdọ.
3 Ekem Jehovah ọdọhọ ete: “Spirit mi+ idiyọhọ owo ke nsinsi+ koro enye edide obụk.+ Edi isua uwem esie edidi isua ikie ye edịp.”+
4 Mme Nephilim ẹkedu ke isọn̄ ke ini oro, adan̄aoro ke nditọiren ata Abasi ẹkenyene ebuana ye nditọiban owo, mmọ ẹnyụn̄ ẹman nditọ ẹnọ mmọ, nditọ oro ẹkedi n̄kpọsọn̄ irenowo emi ẹkedude ke eyo oko, mbon oro ẹwọrọde etop.
5 Ekem Jehovah okụt nte idiọkn̄kpọ owo awakde ke isọn̄ ndien kpukpru n̄kpọ+ ke ekikere esịt owo ẹsụk ẹdi idiọk kpukpru ini.+
6 Ndien Jehovah eseme*+ koro enye akanamde owo ke isọn̄, esịt onyụn̄ ayat enye.+
7 Ndien Jehovah ọdọhọ ete: “Mmọn̄ nsọhi owo emi n̄kobotde+ mfep ke iso isọn̄, ọtọn̄ọde ke owo tutu esịm ufene, ye mme unam eke ẹnyọnide ye edibotn̄kpọ emi efede ke enyọn̄,+ koro mmeseme* ke emi n̄kanamde mmọ.”+
8 Edi Noah okụt mfọn ke iso Jehovah.
9 Emi edi mbụk emi aban̄ade Noah.
Noah ekedi edinen owo.+ Enye anana ndudue ke otu mbon eyo esie. Noah onyụn̄ asan̄a ye ata Abasi.+
10 Ekem Noah obon nditọiren ita, Shem ye Ham ye Japheth.+
11 Ndien isọn̄ abiara ke enyịn ata Abasi,+ afai+ onyụn̄ ọyọhọ ke isọn̄.
12 Ntre Abasi ese isọn̄, ndien sese! enye amabiara,+ koro kpukpru obụkidem ẹkebiatde usụn̄ mmọ ke isọn̄.+
13 Ekem Abasi ọdọhọ Noah ete: “Utịt kpukpru obụkidem emedi ke iso mi,+ koro oto mmọ afai ọyọhọ isọn̄; ndien sese, ami mmọn̄ nsobo mmọ ye isọn̄.+
14 Da eto gopher kọn̄ ubom nọ idemfo.+ Nam mme ubet ke ubom oro, nyụn̄ da itai+ yet enye ke esịt ye ke edem.
15 Ntem ke afo edinam enye: uniọn̄ esie edidi cubit+ ikie ita, ubom esie edidi cubit aba ye duop, enye edinyụn̄ okon̄ ke cubit edịp ye duop.
16 Nam window* ke ubom oro, nyụn̄ nịm ufan̄ emi edide cubit kiet kpere ọkọm, nyụn̄ sịn usụn̄ ubom ke n̄kan̄ esiemmọ;+ tọn̄ọ ke isọn̄ bọp, ekem dori akpa enyọn̄ ye ọyọhọ enyọn̄ iba.
17 “Ndien ami mmọn̄ nnam ukwọ+ mmọn̄ edep ke isọn̄ osobo kpukpru obụkidem emi odudu uwem+ odude mmọ ke idem ke idak ikpaenyọn̄. Kpukpru se idude ke isọn̄ ẹyekpan̄a.+
18 Mmanam ediomi mi ye afo; ndien afo enyene ndidụk ubom oro, afo ye nditọiren fo ye n̄wan fo ye iban nditọiren fo.+
19 Kpukpru odu-uwem edibotn̄kpọ ke kpukpru orụk obụkidem,+ afo edida iba iba ọdọn̄ ke ubom oro man enịm mmọ uwem.+ Mmọ ẹdidi ayara ye uman.
20 Mme edibotn̄kpọ emi ẹfede ke orụk mmọ ye mme ufene ke orụk mmọ, ye kpukpru unam eke ẹnyọnide ke isọn̄ ke orụk+ mmọ, ẹdisan̄a ye afo iba iba ẹdụk man enịm mmọ uwem.+
21 Ndien da kpukpru orụk udia eke ẹsidiade;+ nyụn̄ tan̄ mmọ bon nọ idemfo, ndien emi edidi udia fo ye eke mmọ.”+
22 Ndien Noah anam kpukpru se Abasi eketemede enye. Enye anam kpa ntre.+
