Exodus 16;1-36
16 Ekem mmọ ẹdaha ke Elim,+ ndien ke akpatre, ofụri esop nditọ Israel ẹdisịm wilderness Sin,+ emi odude ke ufọt Elim ye Sinai, ke ọyọhọ usen efịt ke ọyọhọ ọfiọn̄ iba ke mmọ ẹma ẹkewọn̄ọ ke isọn̄ Egypt.
2 Ndien ofụri esop nditọ Israel ẹtọn̄ọ ndisụk Moses ye Aaron uyo ke wilderness.+
3 Ndien nditọ Israel ẹdọdiọn̄ ẹdọhọ mmọ ẹte: “Ọkpọkọfọn nnyịn ndikpan̄a+ ke ubọk Jehovah ke isọn̄ Egypt ke adan̄aemi iketiede ke eso unam,+ inyụn̄ idiade udia iyụhọ, koro mbufo ẹmeda nnyịn ẹwọrọ ẹdi wilderness emi ndiwot ofụri esop emi ke akan̄.”+
4 Ekem Jehovah ọdọhọ Moses ete: “Sese ami mmọn̄ nnam uyo oto heaven+ edep ọnọ mbufo; ndien mbon emi ẹnyene ndiwobi se ikemde mmọ ke usen ke usen,+ man ndomo mmọ nse m̀mê mmọ ẹyesan̄a ke ibet mi m̀mê idisan̄ake.+
5 Ndien ama ekem ke ọyọhọ usen itiokiet+ mmọ ẹyetem se mmọ ẹdiwobide, ndien enye ayawak utịm ikaba akan se mmọ ẹsiwobide ke usen ke usen.”+
6 Ntre Moses ye Aaron ẹdọhọ kpukpru nditọ Israel ẹte: “Ke mbubreyo mbufo ẹyefiọk ẹte ke edi Jehovah akada mbufo ọwọrọ ke isọn̄ Egypt.+
7 Ndien ke usenubọk mbufo ẹyekụt ubọn̄ Jehovah,+ koro enye okopde uyo emi mbufo ẹsụkde Jehovah. Ndien nnyịn idi mmanie eke mbufo ẹkpesụkde uyo?”
8 Ndien Moses ọdọhọ ete: “Ntem ke edidi ke ini Jehovah ọnọde mbufo unam ndita ke mbubreyo ye uyo ndita nyụhọ ke usenubọk, koro Jehovah omokop uyo emi mbufo ẹsụkde enye. Ndien nnyịn idi mmanie? Idịghe nnyịn ke mbufo ẹsụk uyo, edi Jehovah ke mbufo ẹsụk uyo.”+
9 Ndien Moses ọdọhọ Aaron ete: “Dọhọ ofụri esop nditọ Israel ete, ‘Ẹsan̄a ẹkpere iso Jehovah, koro enye omokop nsụkuyo mbufo.’”+
10 Edikem nte Aaron osụk okụrede nditịn̄ ikọ ye ofụri esop nditọ Israel, mmọ ẹwọn̄ọde iso ẹse wilderness, ndien, sese! ubọn̄ Jehovah ọwọrọ owụt idem ke obubịt enyọn̄.+
11 Ndien Jehovah ọdọhọ Moses ete:
12 “Mmokop nsụkuyo nditọ Israel.+ Dọhọ mmọ ete, ‘Ke mbubreyo* mbufo ẹyeta unam ndien ke usenubọk mbufo ẹyeta uyo ẹyụhọ;+ ndien mbufo ẹyefiọk ẹte ke ami ndi Jehovah Abasi mbufo.’”+
13 Edikem ke mbubreyo orụk inuen nte nsan̄kot+ ẹdọk ẹdiyọhọ ke itienna mmọ, ndien ke usenubọk mbara ọduọ akanade itienna mmọ okụk.+
14 Ekem mbara oro asat ndien sese mfia mfefere n̄kpọ,+ emi ẹfiade nte n̄kpri mbai ice,+ ẹbono ke isọn̄ ke wilderness.
15 Ke ini nditọ Israel ẹkụtde, mmọ ẹdọhọ kiet eken ẹte: “Nso idi emi?” Koro mmọ mîkọfiọkke se enye edide. Ntem Moses ọdọhọ mmọ ete: “Emi edi uyo emi Jehovah ọnọde mbufo ke udia.+
16 Ntem ke Jehovah ọdọhọ ete, ‘Yak owo kiet kiet owobi se enye edidiade ama. Mbufo ẹnyene ndiwobi omer kiet+ ke owo kiet nte ekemde ye ibat ukpọn̄ emi ẹdude ke tent mbufo.’”
17 Ndien nditọ Israel ẹnam kpa ntre; ndien mmọ ẹwobi, ndusụk ediwak ndusụk esisịt.
18 Ke ini mmọ ẹdomode ke omer, owo emi okowobide ediwak inyeneke nyọhọ-nsụhọ, owo emi okowobide esisịt inanake.+ Mmọ ẹkewobi nte owo kiet kiet edidiade.
19 Ndien Moses ọdọhọ mmọ ete: “Yak owo okûsụhọ enye tutu eyo esiere.”+
20 Edi mmọ ikopke uyo Moses. Ke ini ndusụk owo ẹsụhọde ndusụk tutu eyo esiere, enye odụk ndọn̄ onyụn̄ etebe;+ ndien Moses ayat esịt ye mmọ.+
21 Ndien mmọ ẹwobi kpukpru usenubọk,+ owo kiet kiet nte enye edidiade. Ke ini eyo ofiopde, enye atara.
22 Ndien edikem ke ọyọhọ usen itiokiet mmọ ẹwobi awak utịm ikaba,+ omer iba ke owo kiet. Ndien kpukpru mbọn̄ esop ẹdi ẹditịn̄ ẹnọ Moses.
23 Ndien enye ọdọhọ mmọ ete: “Emi edi se Jehovah ọkọdọhọde. N̄kpọn̄ ke ẹdinịm sabbath, kpa edisana sabbath Jehovah.+ Mbufo ẹsan̄ se ẹyomde ndisan̄, ẹnyụn̄ ẹtem se ẹyomde nditem,+ ndien ẹtịm ofụri se iyọhọde isụhọ ẹnịm tutu eyo esiere.”
24 Ntre mmọ ẹtịm enye ẹnịm tutu eyo esiere, kpa nte Moses okowụkde; enye itebeke, ndọn̄ inyụn̄ idụkke.+
25 Ekem Moses ọdọhọ ete: “Ẹdia enye mfịn emi, koro mfịn edi sabbath+ Jehovah. Mbufo idikwe enye ke isọn̄ mfịn emi.
26 Mbufo ẹdiwobi enye ke usen itiokiet, edi ọyọhọ usen itiaba edi sabbath.+ Enye ididụhe ke usen oro.”
27 Edikem ke ọyọhọ usen itiaba ndusụk owo ẹwọn̄ọ ẹka ndiwobi, edi ikwe.
28 Ndien Jehovah ọdọhọ Moses ete: “Adan̄a didie ke mbufo ẹditre ndinịm mme ewụhọ mi ye mme ibet mi?+
29 Ẹfiọk ẹte ke Jehovah ọmọnọ mbufo sabbath.+ Ntak edi oro enye ọnọde mbufo udia usen iba ke ọyọhọ usen itiokiet. Owo kiet kiet etie ke ufọk esie.+ Owo baba kiet okûkpọn̄ ebiet esie ke ọyọhọ usen itiaba.”
30 Ndien mmọ ẹnịm sabbath ke ọyọhọ usen itiaba.+
31 Ndien ufọk Israel ẹkot enye “manna.” Enye akafia nte n̄kpasịp coriander, onyụn̄ enem nte mfefere uyo eke ẹsịnde aranọkwọk.+
32 Ekem Moses ọdọhọ ete: “Ntem ke Jehovah ọdọhọ ete, ‘Ẹdomo enye ọyọhọ omer kiet ẹnịm ẹnọ ofụri emana mbufo,+ man mmọ ẹkpekụt udia oro n̄kọnọde mbufo ẹdia ke wilderness ke ini n̄kadade mbufo n̄wọrọ ke isọn̄ Egypt.’”+
33 Ntre Moses ọdọhọ Aaron ete: “Da aban̄ nyụn̄ domo manna eke ọyọhọde omer kiet sịn, nyụn̄ nịm enye ke iso Jehovah nte n̄kpọ nditịm nnịm ke ofụri emana mbufo.”+
34 Kpa nte Jehovah okowụkde Moses, Aaron enịm enye ke iso Ntiense+ nte n̄kpọ oro ẹnyenede nditịm nnịm.
35 Ndien nditọ Israel ẹdia manna oro ke isua aba,+ tutu mmọ ẹdisịm isọn̄ emi mme owo ẹdụn̄de.+ Mmọ ẹkesidia manna tutu mmọ ẹdisịm adan̄a isọn̄ Canaan.+
36 Ndien omer kiet edi ubak ephah kiet ke itie duop.
Mme Ikọ Idakisọn̄
^ At. Ed., “ke ufọt mbubreyo iba.”
