Se Bible etịn̄de

 Baptism ọwọrọ ndinyịni owo ofụri ofụri ke mmọn̄. a Ẹtịn̄ ẹban̄a ediwak baptism ke Bible. (Utom 2:41) Kiet ke otu oro edi baptism Jesus, emi ẹkenyịnide enye ofụri ofụri ke Akpa Jordan. (Matthew 3:13, 16) Ke ediwak isua ama ekebe, ẹma ẹnịm owo Ethiopia kiet baptism ke “mmọn̄” emi okodude ke mben usụn̄ emi enye ekebede aka isan̄.​—Utom 8:36-40.

 Jesus ekekpep ke ana kpukpru mme mbet esie ẹna baptism. (Matthew 28:19, 20) Nte ini akade, apostle Peter ama edisọn̄ọ se Jesus ekekpepde oro.​—1 Peter 3:21.

Ke ibuotikọ emi

•  Nso ke baptism ọwọrọ?

•  Nso ke Bible etịn̄ aban̄a ndinịm nsekeyen baptism m̀mê christening?

•  Nso ke ndina baptism ke enyịn̄ Ete ye Eyen ye edisana spirit ọwọrọ?

•  Ndi ọdiọk owo ndifiak nna baptism?

•  Mme baptism oro ẹtịn̄de ke Bible

•  Nsu emi aban̄ade baptism

 Nso ke baptism ọwọrọ?

 Baptism edi idiọn̄ọ m̀mê se owo anamde ndiwụt mbon en̄wen ke imọ imakabade esịt ikpọn̄ idiọkn̄kpọ imọ, onyụn̄ ọn̄wọn̄ọ ọnọ Abasi ke idida uwem imọ inam n̄kpọ esie. Oro esịne ndidu uwem nte Abasi ye Jesus ẹmade. Mbon oro ẹnade baptism ẹnyịme ndisan̄a ke usụn̄ oro adade esịm nsinsi uwem.

 Nso ke ndina baptism ke enyịn̄ Ete ye Eyen ye edisana spirit ọwọrọ?

 Jesus ọkọdọhọ mme anditiene enye ẹnam ‘mme owo ẹdi mbet imọ . . . , ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ oro enye eketemede.’ (Matthew 28:19, 20) “Ke enyịn̄” ọwọrọ ke owo emi anade baptism ọdiọn̄ọ odudu oro Ete enyenede ye itie esie, onyụn̄ ọdiọn̄ọ eke Eyen n̄ko, ọdiọn̄ọ n̄ko utom oro Abasi adade edisana spirit anam man an̄wam ikọt esie. Man se itịn̄de emi an̄wan̄a: Apostle Peter ọkọdọhọ ete oro ekedide mbụn̄ọ toto ke nsek do ete: “Ke enyịn̄ Jesus Christ eyen Nazareth, san̄a!” (Utom 3:6) Se enye eketịn̄de emi ama an̄wan̄a owo​—Peter ama ọdiọn̄ọ odudu oro Jesus ekenyenede, ntak edi oro enye akadade enyịn̄ Jesus ọkọk ete oro udọn̄ọ.

•   “Ete” edi Jehovah c Abasi. Nte Andibot, Andinọ Uwem, ye Ata Ọkpọsọn̄ Abasi, Jehovah enyene odudu akan.​—Genesis 17:1; Ediyarade 4:11.

•   “Eyen” edi Jesus Christ, emi akakpade ọnọ nnyịn. (Rome 6:23) Nnyịn ikemeke ndinyene nsinsi uwem ibọhọke nnyịn idiọn̄ọ inyụn̄ inyịme se Jesus anamde man uduak Abasi osu.​—John 14:6; 20:31; Utom 4:8-12.

•   “Edisana spirit” edi odudu oro Abasi esidade anam n̄kpọ kpukpru ini. d Abasi akada edisana spirit esie obot n̄kpọ, ada anam mme n̄kpọ ẹdu uwem, ada anam se Enye etịn̄de an̄wan̄a mme prọfet esie ye mbon en̄wen, onyụn̄ ada ọnọ mmọ odudu ndisọn̄ọ nda nnam uduak esie. (Genesis 1:2; Job 33:4; Rome 15:18, 19) Abasi ama onyụn̄ ada edisana spirit esie anam mbon oro ẹkewetde Bible ẹdiọn̄ọ se ẹkpewetde.​—2 Peter 1:21.

 Ndi ọdiọk owo ndifiak nna baptism?

 Ediwak owo ẹmek ndikpụhọ ufọkabasi oro mmọ ẹkesikade. Edi, nso iditịbe edieke edide mmọ ẹma ẹnana baptism ke akani ufọkabasi mmọ? Ndi ọdiọk mmọ ndifiak nna baptism? Ndusụk owo ẹdọhọ ih. Ndien mmọ ẹsida se Ephesus 4:5 etịn̄de, ẹsọn̄ọ emi. Itie oro ọdọhọ ete: “Ọbọn̄ kiet, mbuọtidem kiet, baptism kiet.” Edi itie emi idọhọke ke owo ikemeke ndifiak nna baptism. Nso inam idọhọ ntre?

 Se Etịn̄de Ẹban̄a. Se Ephesus 4:5 etịn̄de owụt ke apostle Paul ekenen̄ede etịn̄ ntak oro anade mme Christian ẹnịm ukem n̄kpọ ẹnyụn̄ ẹnyene mbuọtidem kiet. (Ephesus 4:1-3, 16) Utọ edidianakiet oro edikeme ndidu edieke mmọ ẹtienede Ọbọn̄ kiet kpa Jesus Christ; ẹnyenede mbuọtidem kiet, se Bible ekpepde onyụn̄ an̄wan̄de mmọ ukem ukem, ẹnyụn̄ ẹnamde se Bible ọdọhọde man owo odot ndina baptism.

 Apostle Paul ama ọdọhọ ndusụk mbon oro ẹma ẹkenana baptism ẹfiak ẹna baptism. Enye eketịn̄ emi sia mmọ ikọdiọn̄ọke se akanade owo anam man odot ndina baptism ini mmọ ẹkanade baptism.​—Utom 19:1-5.

 Se Bible ọdọhọde owo anam man odot ndina baptism. Man Abasi enyịme owo oro anade baptism, ana enye anam se Bible etịn̄de aban̄a baptism mbemiso enye anade baptism. (1 Timothy 2:3, 4) Edieke owo emi anade baptism ekenịmde mme n̄kpọ oro Bible mîkpepke mbemiso enye anade baptism, Abasi idinyịmeke baptism oro. (John 4:23, 24) Ekeme ndidi owo oro ikọdiọn̄ọke ke nte enye ekesidude uwem ikọfọnke. Enye ikenyeneke “nnennen ifiọk” akpanikọ mbemiso enye anade baptism. (Rome 10:2) Man Abasi enyịme enye ana enye ekpep akpanikọ Bible, anam se enye ekpepde, ayak uwem esie ọnọ Abasi, ekem afiak ana baptism. Ama etịbe ntem, baptism oro enye afiakde ana do idiọkke. Ke nditịn̄ akpanikọ, ata nnennen n̄kpọ ke enye anam oro.

 Mme baptism en̄wen oro ẹtịn̄de ke Bible

 Bible etịn̄ aban̄a nsio nsio baptism oro mîkedịghe ukem ye enye oro mme mbet Jesus ẹkanade. Se uwutn̄kpọ ifan̄ mi.

 Baptism oro John Andinịm Owo Baptism ekesinịmde mme owo. e John Andinịm Owo Baptism ama esinịm mme Jew ye mbon oro ẹkesitienede mme Jew ẹkpono Abasi baptism ke ini mmọ ẹkekabarede esịt ke idiọkn̄kpọ oro mmọ ẹkenamde ẹdue Ibet Moses​—Ibet emi Abasi akade Moses ọnọ nditọ Israel. Baptism oro John ekesinịmde mme owo ama eben̄e mmọ idem ndidiọn̄ọ nnyụn̄ nnyịme Messiah, oro edi, Jesus eyen Nazareth.​—Luke 1:13-17; 3:2, 3; Utom 19:4.

 Baptism Jesus. Baptism oro John Andinịm Owo Baptism ekenịmde Jesus ama okpụhọde ye mme baptism eken. Jesus ama ọfọn ama, enye ikanamke idiọkn̄kpọ akpa. (1 Peter 2:21, 22) Baptism Jesus ikọwọrọke ke enye akabade esịt ke idiọkn̄kpọ oro enye akanamde m̀mê ke enye ‘ekeben̄e Abasi ete anam imọ inyene eti ubieresịt.’ (1 Peter 3:21) Utu ke oro, okowụt ke enye ayak idem ọnọ Abasi ndinam uduak esie nte Messiah oro ẹken̄wọn̄ọde m̀mê Christ. Emi esịne ndikayak uwem esie nnọ ke ibuot nnyịn.​—Mme Hebrew 10:7-10.

 Ndinịm owo baptism ke edisana spirit. John Andinịm Owo Baptism ye Jesus Christ ẹma ẹtịn̄ ẹban̄a ndinịm owo baptism ke edisana spirit. (Matthew 3:11; Luke 3:16; Utom 1:1-5) Ndinịm owo baptism ke edisana spirit idịghe ukem ye ndinịm owo baptism ke enyịn edisana spirit. (Matthew 28:19) Nso inam edi ntre?

 Ekpri ibat mbet Jesus kpọt ke ẹnịm baptism ke edisana spirit. Mmọ ẹdi mme Christian oro ẹdade edisana spirit ẹyet aran sia Abasi emek mmọ nditiene Jesus n̄kara isọn̄ emi nte ndidem ye mme oku ke heaven. f (1 Peter 1:3, 4; Ediyarade 5:9, 10) Mbon oro mmọ ẹdikarade ẹdi ediwak miliọn mbet Jesus oro ẹnyenede idotenyịn ndidu uwem nsinsi mi ke Paradise ke isọn̄.​—Matthew 5:5; Luke 23:43.

 Ndina baptism ndụk ke Christ Jesus ye ke n̄kpa esie. Mbon oro ẹkadade edisana spirit ẹnịm mmọ baptism ẹma ẹna ‘baptism ẹdụk ke Christ Jesus’ n̄ko. (Rome 6:3) Baptism enye emi aban̄a mme mbet Jesus oro ẹyetde aran oro ẹditienede enye ikara ke heaven. Mmọ ndina baptism ndụk Jesus Christ, anam mmọ ẹsịne ke esop esie oro ẹyetde aran. Enye edi Ibuot ndien mmọ ẹdi idem.​—1 Corinth 12:12, 13, 27; Colossae 1:18.

 Mme Christian oro ẹyetde aran ẹna ‘baptism ẹdụk ke n̄kpa Jesus’ n̄ko. (Rome 6:3, 4) Mmọ ẹkpebe Jesus, ke ndida ofụri uwem mmọ nnam se Abasi ọdọhọde utu ke ndinam se idọn̄de mmọ, ndien ukem nte Jesus, mmọ ẹdiọn̄ọ ke mmimọ ididụhe uwem nsinsi mi ke isọn̄. Baptism emi esisịm utịt ke ini mmọ ẹkpade ẹnyụn̄ ẹnamde mmọ ẹset ẹkedu uwem ke heaven nte edibot n̄kpọ eke spirit.​—Rome 6:5; 1 Corinth 15:42-44.

 Ndinịn mme owo baptism ke ikan̄. John Andinịm Owo Baptism ọkọdọhọ mbon oro ẹkekpan̄de utọn̄ ẹnọ enye ete: “Enye oro [Jesus] eyenịm mbufo baptism ke edisana spirit ye ikan̄. Udọk usakn̄kpọ esie odu enye ke ubọk, ndien enye ayanam ọtọ udịghi wheat esie etịm asana, oyonyụn̄ atan̄ wheat esie obon ke ufọk ubonn̄kpọ, edi enye ọyọfọp mbio ke ikan̄ eke owo mîdikemeke ndinịme.” (Matthew 3:11, 12) Diọn̄ọ ke ndinịm owo baptism ke ikan̄ okpụhọde ye ndinịm owo baptism ke edisana spirit. Nso ke uwụtn̄kpọ John emi ọkọwọrọ?

 Wheat ada aban̄a mbon oro ẹdikopde uyo Jesus inyụn̄ inam se enye eketịn̄de. Mmọ ke ẹdida edisana spirit inịm baptism. Mbio ada aban̄a mbon oro mîdikopke se Jesus etịn̄de. Mmọ ke ẹdida ikan̄ inịm baptism, oro ọwọrọ ke ẹdisosobo mmọ ifep.​—Matthew 3:7-12; Luke 3:16, 17.