Ndi Jesus Akakpa ke Cross?

BRE

Se Bible ọdọhọde

Ediwak owo ẹdọhọ ke ẹda cross ẹdiọn̄ọ mme Christian. Edi Bible itịn̄ke nte eto emi ẹkekọn̄de Jesus ẹwot eketiede ntre idụhe owo emi ekemede ndidọhọ ke imọ imenen̄ede ifiọk nte eketiede. Edi se Bible etịn̄de anam nnyịn idiọn̄ọ ke owo ikọkọn̄ke Jesus ke cross, ke ẹkekọn̄ enye ke anyan eto.

Ke Bible, ikọ Greek emi ẹsidade ẹtịn̄ ẹban̄a eto emi ẹkekọn̄de Jesus ẹwot edi stau·rosʹ. (Matthew 27:40; John 19:17) Okposụkedi emi ediwak Bible en̄wen ẹkabarede stau·rosʹ nte “cross,” ediwak nta mme ekpep n̄kpọ mban̄a Bible ẹdọhọ ikọ emi ọwọrọ “anyan eto.” a N̄wed emi ekerede A Critical Lexicon and Concordance to the English and Greek New Testament ọdọhọ ke ‘akananam stau·rosʹ iwọrọke eto emi ẹdade eto en̄wen ẹdori ibiọn̄.’

Ikọ Greek efen emi ekemede ndida n̄kabade stau·rosʹ edi xyʹlon. Ẹsida ikọ emi n̄ko etịn̄ ikọ ke Bible. (Utom 5:30; 1 Peter 2:24) Ikọ emi ọwọrọ “eto,” “eto emi ẹsiakde,” “anyan eto,” m̀mê “eto emi ẹtọde.” b The Companion Bible ọdọhọ ntem: “Udukwe n̄kpọ ndomokiet ke usem Greek emi ẹdade ẹwet Obufa Testament emi owụtde ke ẹkedi eto iba.”

Ndi Abasi enyịme ẹkama cross ẹkpono imọ?

A crux simplex—se mbon Latin ẹkesikotde anyan eto emi ẹkesikọn̄de anamidiọk ẹwot

Inamke n̄kpọ m̀mê n̄kpọ emi ẹkekọn̄de Jesus ẹwot eketie didie, se itienede emi ye mme itie Bible emi ẹwụt ke inaha ikama cross ituak ibuot inọ Abasi.

Abasi imaha owo akama n̄kpọ ndomokiet atuak ibuot ọnọ imọ, ọkpọkọm cross. Abasi ama ọdọhọ nditọ Israel ete ẹkûnam “mbiet ekededi” ẹda ẹtuak ibuot ẹnọ imọ. Ẹdọhọ mme Christian n̄ko ẹte “ẹfehe ẹkpọn̄ ukpono ndem.”—Deuteronomy 4:15-19; 1 Corinth 10:14.
Mme Christian eyo mme apostle ikakamake cross ituak ibuot inọ Abasi. c Se mme apostle ẹkekpepde ye se mmọ ẹkenamde ke kpukpru mme Christian ẹkpeda nte uwụtn̄kpọ.—2 Thessalonica 2:15.
Akpa mbon emi ẹkesikamade cross ẹtuak ibuot ẹkedi mme okpono ndem. d Ke Jesus ama akakpa ndien ediwak isua ẹbe, mme ufọkabasi ikekpepke aba se Jesus ekekpepde. Ẹma ẹyak mbufa owo emi ẹdide ndidụk ufọkabasi “ẹsụk ẹka iso ẹkama mme n̄kpọ emi mmọ ẹkesikamade ẹkpono ndem,” kpa ye cross n̄ko. (The Expanded Vine’s Expository Dictionary of New Testament Words) Bible inyịmeke utọ n̄kpọ oro, oro edi, ndinyịme okpono ndem osụk akama mme n̄kpọ emi mmọ ẹkesikamade ẹtuak ibuot mbak mmọ ẹsọn̄ọ ẹsịne ke ufọkabasi.—2 Corinth 6:17.

a Se New Bible Dictionary, Third Edition, emi D. R. W. Wood afiakde ẹwet, page 245; Theological Dictionary of the New Testament, Volume VII, page 572; The International Standard Bible Encyclopedia, Revised Edition, Volume 1, page 825; ye The Imperial Bible-Dictionary, Volume II, page 84.

b Se The Expanded Vine’s Expository Dictionary of New Testament Words, page 1165; A Greek-English Lexicon, emi Liddell ye Scott ẹsiode, ọyọhọ usụkkiet, page 1191-1192; ye Theological Dictionary of the New Testament, Volume V, page 37.

c Ka ebiet okụtde “Cross” ke Encyclopædia Britannica, 2003; The Cross—Its History and Symbolism, page 40; ye The Companion Bible, Oxford University Press, se ẹwetde ẹdian, ọyọhọ 162, page 186.

d Se The Encyclopedia of Religion, Eboho 4, page 165; The Encyclopedia Americana, Eboho 8, page 246; ye Symbols Around Us, page 205-207.