Ndi Bible Ekeme Ndin̄wam Mi ke Ini Ọkpọsọn̄ Mfụhọ?

BRE

Se Bible ọbọrọde

Ih ekeme, sia “Abasi emi ọnọde mbon oro ẹfụhọde ndọn̄esịt” isikpọn̄ke utọ mbon oro.—2 Corinth 7:6.

Nte Abasi esinyan̄ade mbon oro ẹkopde ọkpọsọn̄ mfụhọ

Esinọ mmọ odudu. Abasi ‘ọyọdọn̄ fi esịt’ ke ndiyere akam fo nnyụn̄ nnọ fi odudu ndiyọ, idịghe ke nditre kpukpru mfịna fo ke ebe oro. (Philippi 4:13) Bible ọdọhọ ete: “Jehovah emekpere mmọ eke esịt obụn̄ọde; Enye onyụn̄ anyan̄a mmọ eke spirit mmọ anuahade.” (Psalm 34:18) Abasi oyokop akam fo idem ke ini mûkemeke nditịn̄ se oyomde.—Rome 8:26, 27.
Anam mmọ ẹti mbon oro ẹkefụhọde ke Bible. Ete kiet emi eketienede ewet Bible ọkọbọn̄ akam ọnọ Abasi ete: “Ami nsịne ke udem nseme n̄kot fi.” Se ikan̄wamde andiwet psalm ke ini ọkpọsọn̄ mfụhọ ekedi nditi ke ọdọdọn̄ Abasi ndifen mme idiọkn̄kpọ nnyịn. Ntak edi oro enye ọkọdọhọde Abasi ete: “Edieke ekpedide ndudue ke afo ese, O Jah, O Jehovah, anie ekpekeme ndida?”—Psalm 130:1, 3, 4.
Ọnọ mmọ idotenyịn. Abasi ọdọn̄ nnyịn esịt idahaemi onyụn̄ ọn̄wọn̄ọ ndisio kpukpru mfịna emi ẹsinamde inen̄ede ifụhọ. Ke ini enye edinamde se enye ọn̄wọn̄ọde emi, “owo iditịghi aba mme akpa n̄kpọ, mmọ idinyụn̄ idụkke owo esịt.”—Isaiah 65:17.

Mme Ntiense Jehovah ẹsika ufọkibọk ke ini mmọ ẹdọn̄ọde m̀mê ke ini ọkpọsọn̄ mfụhọ, kpa ye oro ẹdiọn̄ọde ke Abasi ayanyan̄a mmimọ. (Mark 2:17) Edi nnyịn isidọhọke owo ke enye akpakam ọbọ usọbọ enye emi m̀mê enye oko sia n̄kpọ aban̄ade usọbọ edi mbubehe idemowo.