Ekpedi omodomo ndimia nsụn̄ n̄wot akanam, ọyọdiọn̄ọ ke idịghe ekpri utom. Ata ediwak ini emi owo oyomde ndiwot mmọ, mmọ ẹsifep inikiet inikiet.

 Ntaifiọk ẹnam ndụn̄ọde ẹkụt ke utọ nsụn̄ kiet emi esimade mfri ekeme ndiwọn̄ọde idem nte ubomofụm ekọn̄ esiwọn̄ọrede, edi nsụn̄ emi esiwọn̄ọde ke mbahade sekọn kiet kpọt. Prọfessọ Michael Dickinson ọdọhọ ke ini nsụn̄ emi ẹmanade, ke ‘mmọ ẹkeme ndife nte ata-awat ubomofụm, ke etie nte ndimen nsekeyen emi ẹsụk ẹmande idahaoro nsịn ke ubomofụm ekọn̄ ndien enye awat ubomofụm oro ata edifọn edifọn.’

 Mme anam-ndụn̄ọde ẹma ẹ-vidio nte nsụn̄ emi ẹsifede ẹnyụn̄ ẹkụt ke mmọ ẹsimia mba mmọ utịm ike-200 ke sekọn kiet. Edi edieke mmọ ẹmiade mba ini kiet kpọt, oro ekem ndiwọn̄ọde idem inikiet inikiet mfep n̄kpọndịk.

 Ndi esida mmọ ini ndisọsọp ndiọn̄ọ se ẹkpenamde? Mme anam ndụn̄ọde ẹkụt ke nte mmọ ẹsisọpde ẹfep n̄kpọndịk ọsọp utịm ike-50 akan ini owo adade ekep enyịn. Dickinson ọdọhọ ete: “Ata ekpri ini ntem ke nsụn̄ emi esida ọdiọn̄ọ ebiet emi n̄kpọndịk odude onyụn̄ ọdiọn̄ọ n̄kan̄ emi enye ediwọn̄ọrede idem ife ika man efep n̄kpọndịk oro.”

 Mme anam-ndụn̄ọde ke ẹdomo ndidiọn̄ọ nte nin̄inin̄i mfre nsụn̄ mfri ekemede ndinam n̄kpọ emi mme engineer mîkemeke ndinam.

 Afo Ekere Didie? Ndi nsụn̄ mfri emi esisọpde usọp ntre okofoforo? Mîdịghe ndi ẹkebobot enye?