N̄kpọ mmọn̄eyet etie nte edịm, idepke ọkọm kiet. Bible ọdọhọ ‘ke idịghe mme ọsọp-itọk ẹkan ke mbuba, inyụn̄ idịghe n̄kpọsọn̄ owo ẹkan ke ekọn̄, koro n̄kpọntịbe unana idotenyịn ẹsịmde mmọ kpukpru.’ (Ecclesiastes 9:11) N̄kpọ mmọn̄eyet esiwọrọ n̄kparawa ye n̄kaiferi n̄ko. Nso ke mmọ ẹsinam ke ini utọ n̄kpọ emi ọwọrọde mmọ? Yak ise se n̄kaiferi ye akparawa kiet ẹkenamde.

•  REBEKAH

•  CORDELL

 Ete mi okosio eka mi ndọ ke ini n̄kedide isua 14.

 N̄kenịmke ke ete mi ekeme ndisio eka mi ndọ. N̄kekere ke edi n̄kpọ mbubru sia enye ama enen̄ede ama eka mi. Nso ikpanam enye ọkpọn̄ nnyịn?

 Ikememke nditịn̄ se iketịbede nnọ owo. N̄koyomke nditie n̄kere kpukpru oro. Esịt ama esiyat mi, edi n̄kọfiọkke se n̄kpanamde ini oro. Esịt ama esitịmede mi kpukpru ini, n̄kesinyụn̄ n̄kemeke ndide idap.

 Ke ini n̄kedide isua 19, kansa ama owot edima eka mi.

 Ama abiak mi ke ini ete mi okosiode eka mi ndọ, edi idụhe se ikabiakde mi nte n̄kpa eka mi. Osụk ababiak mi tutu emi. Nsụk n̄kemeke ndidep idap ọfọn, esịt esinyụn̄ etịmede mi ke ubọk ke ubọk.

 Edi enyene nsio nsio n̄kpọ emi ẹn̄wamde mi. Ke uwụtn̄kpọ, Mme N̄ke 18:1 ọdọhọ nnyịn ikûdian̄ade utie ikpọn̄, ntre mmodomo ndinam item Bible emi.

 Sia ndide Ntiense Jehovah, mmesima ndikot mme n̄wed Ikọ Abasi emi ẹsisọn̄ọde mi idem. N̄wed emi akan̄wamde mi ke ini ete ye eka mi ẹkedian̄arede ndọ edi Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn. Mmeti ke mma n̄kot ibuotikọ emi ke ọyọhọ Eboho 2, “Ndi Mmekeme Ndikop Inemesịt ke Ubon Oro Ete M̀mê Eka Kpọt Esede Enyịn?”

 Kiet ke otu itie N̄wed Abasi emi akan̄wamde mi n̄kûtịmede esịt n̄kaha edi Matthew 6:25-34. Jesus ọkọdọhọ ke ufan̄ikọ 27 ete: “Anie ke otu mbufo ekeme ndidian cubit a kiet ke isua uwem esie ke ntak emi enye okopde editịmede esịt?”

 N̄kpọ mmọn̄eyet esitịbe ọnọ kpukpru owo, edi enen̄ede ọfọn idiọn̄ọ nte inamde n̄kpọ ke ini n̄kpọ ọwọrọde nnyịn. Mmekpep n̄kpọ nto eka mi. Ke ini ete mi okosiode enye ndọ, idiọk udọn̄ọ mîkonyụn̄ iyakke enye ọbọ emem, mma mbon ikọduọkke idotenyịn. Edi okosụk ọbọbuọt idem ye Abasi tutu esịm usen n̄kpa esie. Ndifreke kpukpru se enye ekekpepde mi aban̄a Jehovah.

 Se ẹkpetiede ẹkere: Didie ke ndikot Bible ye mme n̄wed Ikọ Abasi ẹkeme ndin̄wam fi ke ini n̄kpọ mmọn̄eyet ọwọrọde fi?—Psalm 94:19.

 Ete mi akakpa ke ini n̄kedide isua 17. N̄kpa esie ama abiak mi odụk ọkpọ. Ibuot ama oyon̄ mi.

 Ke ini ete mi akakpade, eketie mi nte ndadaba, ke idịghe ete mi ke ẹda ọfọn̄ ẹnwan̄ oro. Eketie mi nte ke enye edede, ke enye eyedemede eyo ama esiere. N̄kekere ke okịm okụre.

 Ubon nnyịn ẹdi Mme Ntiense Jehovah, ndien esop nnyịn ẹma ẹn̄wam nnyịn etieti ke ini ete mi akakpade. Mmọ ẹma ẹsida udia ẹsọk nnyịn, ẹdu ye nnyịn, ẹnyụn̄ ẹsọn̄ọ nnyịn idem. Mmọ ẹma ẹka iso ẹn̄wam nnyịn ke anyan ini. Nte mmọ ẹken̄wamde nnyịn ama anam nnen̄ede nnịm ke Mme Ntiense Jehovah ẹdi ata mme Christian.—John 13:35.

 Itie N̄wed Abasi emi ekenen̄erede an̄wam mi edi 2 Corinth 4:17, 18. Itie oro ọdọhọ ete: “Okposụkedi ukụt nnyịn edide ke ibio ini onyụn̄ eferede, enye anam nnyịn inyene ubọn̄ emi etịmde-tịm odobi akan onyụn̄ odude ke nsinsi; ke adan̄aemi nnyịn mîdọn̄ke enyịn ke mme n̄kpọ oro ẹkụtde ke enyịn, edi idọn̄ enyịn ke mme n̄kpọ oro owo mîkwe ke enyịn. Koro mme n̄kpọ oro ẹkụtde ke enyịn ẹdu ke ibio ini, edi mme n̄kpọ oro owo mîkwe ke enyịn ẹdu ke nsinsi.”

 Ufan̄ikọ 18 ekenen̄ede ọsọn̄ọ mi idem. Ufen emi ete mi ọkọbọde ekedi ke ibio ini, edi se Abasi ọn̄wọn̄ọde ndinam nnọ nnyịn ke ini iso edidi ke nsinsi. N̄kpa ete mi ama anam mfiak ntie n̄kere nte n̄kodude uwem ye se n̄kpadade uwem mi nnam.

 Se ẹkpetiede ẹkere: Didie ke n̄kpọ mmọn̄eyet ekeme ndinam afiak etie ekere se akpadade uwem fo anam?—1 John 2:17.