Mmọ ẹdi ekpri otu mme Christian emi ẹnen̄erede ẹma Abasi—kpukpru mmọ ẹdi irenowo. Mmọ ẹse ẹban̄a utom Mme Ntiense Jehovah ke ofụri ererimbot. Iso utom iba ke mmọ ẹnam:

•   Mmọ ẹsise ẹban̄a nte ẹtịmde ikọ Abasi emi ẹsiwetde ke n̄wed Mme Ntiense Jehovah ẹnyụn̄ ẹkpepde ke mboho Mme Ntiense Jehovah, ye ke nsio nsio ufọkn̄wed mmọ.—Luke 12:42.

•   Mmọ ẹsise ẹban̄a nte Mme Ntiense Jehovah ẹnamde utom ukwọrọikọ ke ofụri ererimbot, ye nte ẹdade okụk emi mme owo ẹsitịpde ke imaesịt ẹnam n̄kpọ Abasi.

 Otu Emi Ẹsede Ẹban̄a Utom Mme Ntiense Jehovah ẹtiene uwụtn̄kpọ “mme apostle ye mbiowo ke Jerusalem,” emi ẹkesibierede mme akpan n̄kpọ emi ẹbehede Ikọt Abasi. (Utom 15:2) Mmọ idịghe mme adausụn̄ m̀mê mme etubom inọ ikọt Jehovah, kpa nte mme apostle mîkedịghe. Mmọ ẹsiyak Bible ada mmọ usụn̄ ẹnyụn̄ ẹdiọn̄ọ ke Jesus Christ ke Jehovah Abasi emek ete edi Ibuot ọnọ ikọt esie.—1 Corinth 11:3; Ephesus 5:23.

 Mbon otu emi, ọtọn̄ọde ke January 2018, ẹdi Brọda Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson, ye Brọda David Splane. Kpukpru mmọ ẹdu ke ibuot itieutom Mme Ntiense Jehovah ke Warwick ke New York ke U.S.A.

 Otu Emi Ẹsede Ẹban̄a Utom Mme Ntiense Jehovah ẹnyene kọmiti itiokiet emi ẹsede ẹban̄a nsio nsio n̄kpọ; owo mmọ kiet kiet esidu ke kọmiti kiet m̀mê iba m̀mê akan oro.

•   Kọmiti Mme Anam-Ndutịm: Mmọ ẹsise ẹban̄a n̄kpọ ikpe ye ibet, ẹnam ndutịm man ẹn̄wam mbon oro oto-obot afanikọn̄ esịmde, ẹse ẹban̄a nditoete nnyịn oro ẹkọbọde ke ntak n̄kpọ Abasi, ẹsinyụn̄ ẹsọp ẹn̄wam yak ẹnam n̄kpọ ẹban̄a se ifịnade ikọt Jehovah.

•   Kọmiti Mbonutom: Mmọ ẹsise ẹban̄a mbonubon Bethel.

•   Kọmiti Usio N̄wed: Mmọ ẹsise ẹban̄a ndimịn̄ mme n̄wed ikọ Abasi nnọ ẹka nsio nsio itie, ndibọp itie Mme Ntiense Jehovah ẹsisopde idem, ye ndibọp mme itie ukabade n̄wed ye mme ọfis ke idụt kiet kiet.

•   Kọmiti Utom: Mmọ ẹsise ẹban̄a utom ukwọrọ “eti mbụk Obio Ubọn̄.”—Matthew 24:14.

•   Kọmiti Unọ Ukpep: Mmọ ẹsise ẹban̄a nte ẹtịmde Ikọ Abasi emi Mme Ntiense Jehovah ẹsikpepde ke mboho mmọ, ke mme ufọkn̄wed mmọ, ke mme vidio mmọ, ye ke mme n̄kpọ ntre.

•   Kọmiti Uwetn̄wed: Mmọ ẹsise ẹban̄a ndiwet ikọ abasi—m̀mê edi enye ẹdimịn̄de m̀mê enye ẹdidọn̄de ke ikpehe Intanet Mme Ntiense Jehovah. Mmọ ẹsinyụn̄ ẹse ẹban̄a utom ukabade n̄wed.

 Kpa ye ofụri utom emi mbon Otu Emi Ẹsede Ẹban̄a Utom Mme Ntiense Jehovah ẹsinamde ke mme kọmiti emi, mmọ ẹsisop idem kpukpru urua man ẹneme se inen̄erede ibehe esop Abasi. Ke mbono emi, mmọ ẹsikot ẹnyụn̄ ẹneme se Bible ọdọhọde ẹnyụn̄ ẹyak spirit Abasi ada mmọ usụn̄, ndien oro esinam mmọ ẹdiana kiet ẹbiere n̄kpọ.—Acts 15:25.

 Mmọ ẹdi mme Christian emi owo ekemede ndiberi edem; mmọ ẹsin̄wam ẹnam nsio nsio n̄kpọ ke mme kọmiti ẹbatde ke enyọn̄ emi. (1 Corinth 4:2) Mmọ ẹnyene ifiọk ẹnyụn̄ ẹnen̄ede ẹdiọn̄ọ utom kọmiti emi mmọ ẹdude; mmọ ẹsitiene ẹdụk mbono kọmiti mmọ kpukpru urua. Kpa ye mîdịghe mmọ ẹsibiere se ẹdinamde, mmọ ẹsisio nti ifiọk ẹdi, ẹtịn̄ se mmọ ẹdiọn̄ọde ẹban̄a se ẹnemede, ẹtiene ẹnam se kọmiti mmọ ẹkebierede, ẹnyụn̄ ẹkama enyịn ẹse m̀mê se ẹkebierede oro asan̄a ọfọn. Otu Emi Ẹsede Ẹban̄a Utom Mme Ntiense Jehovah ẹsinọ mmọ n̄ko ẹka ẹkese ikọt Abasi ke nsio nsio itie ke ofụri ererimbot, ẹsinyụn̄ ẹnọ mmọ n̄kpọ ẹnam ke edinam esop Abasi, utọ nte ke mbono ofụri isua m̀mê ke edinam ukụre Ufọkn̄wed Gilead.