Nya vɔ̃wo dzɔna ɖe ame sia ame dzi. Biblia gblɔ be: “Dziɖuɖu le duɖimekeke me mele afɔ ɖeablɛ me ɣesiaɣi o, . . . elabena azãgbe kple nuɖiɖeame li na wo katã.” (Nyagblɔla 9:11) Esia nye nyateƒe le sɔhɛ aɖewo siwo dzi nya vɔ̃wo dzɔ ɖo hã gome. Aleke wowɔ te ŋu nɔ te ɖe nya vɔ̃wo nu? Se wo dometɔ eve aɖewo ƒe ŋutinyawo ɖa.

•  REBEKAH

•  CORDELL

 Dzinyelawo gbe wo nɔewo esime mexɔ ƒe 14.

 Nyemexɔe se be dzinyelawo le wo nɔewo gbem ŋutɔŋutɔ o, ewɔ nam abe ɖeko tɔnye di be yeaɖe ye ɖokui ɖe aga vie ene. Elɔ̃ nɔnye ŋutɔ, ke nu ka tae wòdzo le egbɔ ɖo? Nu ka tae wòadzo le gbɔnye ɖo?

 Esesẽna nam be maɖo dze tso nu si nɔ dzɔdzɔm la ŋu na ame aɖe. Medi be maɖe nya mawo katã ɖa le susu me. Dzi kuam vevie, gake nye ŋutɔ nyemenyana ɣeaɖewoɣi hã o. Metsia dzimaɖi vevie, eye alɔ̃ menya dɔna nam o.

 Esi mexɔ ƒe 19 la, kansa wu nɔnye. Tsi metoa nye kplii dome o.

 Enye nyateƒe be ete ɖe dzinye vevie esi dzinyelawo gbe wo nɔewo, gake nɔnye ƒe ku ya gbã dzi nam ale gbegbe. Mekpɔ fa nam o. Alɔ̃ meganya dɔna nam kura o, eye megatsia dzimaɖi kokoko.

 Gake mekpɔe be nu geɖewo li mate ŋu awɔ tso nɔnɔmea ŋu. Le kpɔɖeŋu me, Lododowo 18:1 xlɔ̃ nu mí tso ame ɖokui ɖeɖe ɖe aga ŋu, eye mewɔ ɖe aɖaŋuɖoɖo ma dzi.

 Eye esi wònye Yehowa Ðasefoe menye ta la, medzea agbagba xlẽa míaƒe Biblia-srɔ̃gbalẽ dedziƒonameawo. Agbalẽ siawo dometɔ aɖe si kpe ɖe ŋunye esime dzinyelawo nɔ wo nɔewo gbem lae nye Nya Siwo Sɔhɛwo Biana Ƒe Ŋuɖoɖo Vavãwo, ele yevugbe me. Meɖo ŋku edzi be mexlẽ Babla 2 lia ƒe nyati si nye: “Ðe Mate Ŋu Akpɔ Dzidzɔ Le Dzila Ðeka Ƒe Dzikpɔkpɔ Tea?”

 Biblia me nya vevi siwo kpena ɖe ŋunye menɔa te ɖe nye dzimaɖitsitsia nu la dometɔ ɖekae nye esi dze le Mateo 6:​25-34. Le kpukpui 27 lia me la, Yesu bia be: “Mia dometɔ kae li, si ne ele dzimaɖi tsim la, wòate ŋu atsɔ abɔklugui a ɖeka akpe ɖe eƒe agbenɔƒe ŋu?”

 Nya vɔ̃wo dzɔna ɖe mí katã dzi, gake mesrɔ̃e le nɔnye ƒe kpɔɖeŋua me be ale si míenɔa te ɖe wo nui la le vevie. Eto nu geɖe me. Atsuƒe gblẽ nɛ, eye wòdze dɔ aɖe si womate ŋu ada o. Gake le wo katã me la, dzi meɖe le eƒo o, eye xɔse sẽŋu gakpɔtɔ nɔ esi va se ɖe eƒe kugbe. Nyemaŋlɔ nu siwo wòfiam tso Yehowa ŋu la be gbeɖe o.

 Bu nya sia ŋu: Aleke Biblia kple Biblia-srɔ̃gbalẽwo xexlẽ ate ŋu akpe ɖe ŋuwò nànɔ te ɖe nya vɔ̃wo nu?​—⁠Psalmo 94:19.

 Esi mexɔ ƒe 17 la, mekpɔ tɔnye ƒe ku teƒe. Tɔnye ƒe kue nye nya vɔ̃ gãtɔ kekeake si dzɔ ɖe dzinye kpɔ. Nye dzi gbã gudugudu.

 Ewɔna nam be meku ŋutɔŋutɔ o, menye tɔnyee nye ema wotsyɔ avɔa na o. Megblɔna na ɖokuinye be, ‘Ele fɔfɔ ge etsɔ.’ Gbɔgblɔ bu ɖem.

 Yehowa Ðasefowoe nye kple dzinyelawo míenye, eye míaƒe hametɔwo kpe ɖe mía ŋu ale gbegbe esi tɔnye ku. Wona nuɖuɖu mí, wova nɔa mía gbɔ, eye womegblẽa mí ɖi o, eye wowɔ esia ɣeyiɣi didi aɖe. Woƒe kpekpeɖeŋu siawo katã gaɖo kpe edzi nam be Kristotɔ vavãwoe Yehowa Ðasefowo nye.​—⁠Yohanes 13:35.

 Mawunyakpukpui aɖe si de dzi ƒo nam ŋutɔ lae nye 2 Korintotɔwo 4:17, 18. Egblɔ be: “Togbɔ be ɣeyiɣi vi aɖe ƒe xaxa si nu mesẽ o koe wònye hã la, ehea ŋutikɔkɔe gã mavɔ si ƒoa nu sia nu ta sãsãsã la vanɛ na mí; esi míenana míaƒe ŋkuwo nɔa nu siwo wokpɔna la ŋu o, ke boŋ nu siwo womekpɔna o la ŋu. Elabena nu siwo wokpɔna la nɔa anyi ɣeyiɣi vi aɖe ko, ke nu siwo womekpɔna o ya nɔa anyi tegbee.”

 Mawunyakpukpuia ƒe akpa mamlɛtɔa wɔa dɔ ɖe dzinye ŋutɔ. Ɣeyiɣi vi aɖe ƒe nu koe tɔnye ƒe fukpekpea nye, gake nu siwo ƒe ŋugbe Mawu do be yeawɔ na mí le etsɔme ya anɔ anyi tegbee. Tɔnye ƒe kua na megbugbɔ ŋku lé ɖe nye agbenɔnɔ ŋu hetrɔ asi le nye agbemetaɖodzinuwo hã ŋu.

 Bu nya sia ŋu: Aleke nya vɔ̃ dzɔɖeamedzi ate ŋu ana be ame nagbugbɔ ŋku alé ɖe eƒe agbemetaɖodzinuwo ŋu?​—⁠1 Yohanes 2:17.