•   Èdina be yeawɔ nuwo faa le ale si nɔnɔmea bia nu, gake srɔ̃wò ya dina be woawɔ ɖoɖo ɖe nu sia nu ŋu do ŋgɔ.

•   Ènye ame kpoo si melɔ̃a nuƒoƒo fũu o, gake srɔ̃wò ya le hayahaya eye wòlɔ̃a amewo dome nɔnɔ kple dzeɖoɖo.

 Ðe nɔnɔme aɖe le srɔ̃wò si si medzɔa dzi na wò oa? Ne ètsɔa susu ɖoa eŋu fũu akpaa, ate ŋu agblẽ nu le wò srɔ̃ɖeɖe ŋu. Le nyateƒe mea, Biblia gblɔ be “ame si léa nya ɖeka ɖe nu la klãa xɔlɔ̃ veviwo dome.”—Lododowo 17:9.

 Le esi nàna srɔ̃wò ƒe nɔnɔme ma nahe masɔmasɔwo ava mia kplii dome teƒea, ɖewohĩ àte ŋu asrɔ̃ ale si nàde dzesi nu nyui aɖe le nɔnɔme ma ŋu.

Míadzro nya siawo me le nyati sia me

•  Susu nyui nenɔ asiwò ɖe srɔ̃wò ƒe nɔnɔme si medzɔa dzi na wò o ŋu

•  Nya si srɔ̃tɔ aɖewo gblɔ

•  Biabia siwo me miate ŋu adzro

 Ne srɔ̃wò ƒe nɔnɔme aɖe vea dɔme na wòa, anɔ eme be nane le nɔnɔme ma ke ŋu si wɔnɛ be eƒe nu doa dzidzɔ na wò. Bu esia ƒe kpɔɖeŋu etɔ̃ aɖewo ŋu kpɔ:

 “Zi geɖea, nye aƒetɔ wɔa nu blewu, eye metea ŋu wɔa eƒe nuwo vɔna kaba ne ehiã be míayi teƒe aɖe o. Gake nɔnɔme ma ke wɔnɛ be wògbɔa dzi ɖi na amewo eye wògbɔ dzi ɖi na nye hã. Ɣeaɖewoɣia, ale si wòwɔa nu blewua vea dɔme nam, gake ale si esia nana wògbɔa dzi ɖiia dzɔa dzi nam ŋutɔ.”—Chelsea.

 “Nye aƒenɔ léa fɔ ɖe ɖoɖo nyui wɔwɔ ŋu; edina be yeakpɔ egbɔ be nu sia nu le zɔzɔm ɖe ɖoɖowɔɖi dzi pɛpɛpɛ, eye esia tea ŋu vea dɔme nam. Gake nɔnɔme ma ke wɔnɛ be ekpɔa nu sia nu gbɔ nyuie.”—Christopher.

 “Ɣeaɖewoɣia, ewɔna nam be srɔ̃nye metsɔa ɖeke le nanewo me o, eye esia ɖea fu nam ŋutɔ. Gake ale si metsɔa dzitsitsi wɔa nui oa nye nɔnɔme vevi aɖe si na eƒe nu nyo ŋunye. Ale si wòtea ŋu wɔa nu tufafatɔe le nɔnɔme sesẽwo mea dzɔa dzi nam ŋutɔ.”—Danielle.

 Abe ale si Chelsea, Christopher, kple Danielle va kpɔe enea, zi geɖea kadodo nɔa ame srɔ̃ ƒe nyuiƒewo kple gbagbãƒewo dome. Le esia taa, màte ŋu atsɔ nyuiƒea eye nàgblẽ gbagbãƒea ɖi o. Ðeko wòle abe ale si akpa eve li na gaku ene; màte ŋu atsɔ akpa ɖeka agblẽ akpa evelia ɖi o.

 Ke hã, enye nyateƒe be le nɔnɔme aɖewo ya gomea, nyuiƒe aɖeke mele wo ŋu o. Le kpɔɖeŋu me, Biblia gblɔ be ame aɖewo nye ‘dɔmedzoetɔwo.’ (Lododowo 29:22) Le go mawo mea, ele be amea nadze agbagba ɖe sia ɖe aɖe “ameléleɖedɔme kaɖikaɖi, dɔmedzoe, dziku, ɣlidodo, kple nya veame ɖe sia ɖe ƒomevi ɖa.” a—Efesotɔwo 4:31.

 Gake ne ɖeko srɔ̃wòa ƒe nɔnɔmea medzɔa dzi na wò oa, ke wɔ Biblia ƒe aɖaŋuɖoɖo sia dzi: “Miyi edzi miado dzi anɔ anyi kple mia nɔewo . . . ne nya aɖe le ame aɖe si ɖe nɔvia ŋu.”—Kolosetɔwo 3:13.

 Tsɔ kpe ɖe eŋua, dze agbagba nàde dzesi nu si nyo le srɔ̃wòa ƒe nɔnɔmea ŋu—ɖewohĩ nɔnɔme ma gɔ̃ hã na eƒe nu nyo ŋuwò hafi mieɖe srɔ̃. Srɔ̃ŋutsu aɖe si ŋkɔe nye Joseph gblɔ be, “Ne ètsɔa susu ɖoa srɔ̃wò ƒe nɔnɔme si medzɔa dzi na wò o ɖeɖe ko ŋua, ɖeko wòasɔ kple ale si ame aɖe natsɔ susu aɖo ale si lotamekpe aɖe ƒe nugbɔ le tsutsɔ̃e ŋu gake wòaɖe susu ɖa le ale si wònya kpɔe la ŋu.”

 Gbãa, mia dometɔ ɖe sia ɖe ate ŋu abu biabia siwo gbɔna ŋu le eɖokui si. Eyome miadzro ŋuɖoɖoawo me ɖekae.

•   Ðe nɔnɔme aɖe le srɔ̃wò si si nèkpɔe be ele kuxiwo hem va srɔ̃ɖeɖea mea? Ne nenemae la, ke nɔnɔme kae?

•   Ðe wònye nɔnɔme gbegblẽ vavã, alo ɖeko medzɔa dzi na wò o koe?

•   Ðe nane nyo le eƒe nɔnɔme ma ŋua? Ne nenemae la, nu kae nyo le eŋu, eye nu ka tae srɔ̃wò ƒe nɔnɔme ma dzea ŋuwò?