“Ale si yame ƒe nɔnɔme le gbegblẽm kabakaba la ahe kuxi geɖe vɛ. Tsiɖɔɖɔwo ana dugãwo nabu ɖe tsi me. Xexea me axɔ dzo gbãgbãgbã. Ahom sesẽwo atu. Tsikpɔkpɔ asesẽ le teƒe geɖe. Ati kple lã ƒomevi vovovo akpe teƒe akpewo atsrɔ̃. Menye nususugblɔ alo amiɖeɖe ɖe nya dzro aɖe koe wonye o. Ke boŋ wonye nu siwo dzɔdzɔmeŋutinunyalawo gblɔ be adzɔ ne wometrɔ asi le mɔ siwo dzi tom wole fifia hafi kpɔa elektrikŋusẽ, mɔ̃memi, kple bubuawo ŋu o.”—Nya siawoe António Guterres, si nye Dukɔ Ƒoƒuawo ƒe dɔdzikpɔlagã gblɔ esime Dukɔ Ƒoƒuawo ƒe habɔbɔ si léa ŋku ɖe yame ƒe nɔnɔmewo ŋu la kpe ta le April 4, 2022 dzi.

 “Dzɔdzɔmeŋutinunyalawo le nu xlɔ̃m amewo be yame ƒe nɔnɔme ƒe tɔtrɔ agblẽ nu geɖe le ƒe siwo gbɔna me, eye modzakaɖebɔ 423 [siwo le Amerika] dome agblẽ, elabe teƒe mawo ŋue yame ƒe dzoxɔxɔ ate ŋu agblẽ nu le bɔbɔe. Nu siwo wòagblẽa ɖi afɔku dziŋɔ siwo ŋu Biblia ƒo nu tsoe: dzo kple tsiɖɔɖɔ, tsikpewo ƒe loló, atsiaƒuwo ƒe ɖɔɖɔ, kple xexea me ƒe dzoxɔxɔ gbãgbãgbã.”—Nyatsoƒe: The New York Times, June 15, 2022, “Flooding Chaos in Yellowstone, a Sign of Crises to Come.”

 Ðe wòanya wɔ be woakpɔ ale si wole anyigbaa gblẽm ƒe kuxia gbɔa? Ne anya wɔa, ke ame kae akpɔ kuxia gbɔ? Bu nya si Biblia gblɔa ŋu kpɔ.

 Biblia gblɔ be Mawu “[atsrɔ̃] ame siwo le anyigba la gblẽm.” (Nyaɖeɖefia 11:18) Mawunyakpukpui sia na míenya nu etɔ̃ aɖewo:

1.  1. Amegbetɔwo ƒe nuwɔna agblẽ nu le anyigbaa ŋu vevie.

2.  2. Mawu maɖe mɔ amewo nagblẽ anyigbaa ɖikaa o.

3.  3. Mawue aɖɔ ale si wole anyigbaa gblẽm ƒe kuxia ɖo, ke menye amegbetɔwo o.

 Biblia gblɔ be “anyigba [la] li tegbee.” (Nyagblɔla 1:4) Amegbetɔwo anɔ edzi ɖaa.

•   “Ame dzɔdzɔewo anyi anyigba la dome, eye woanɔ edzi tegbee.”—Psalmo 37:29.

 Mawu ana míaƒe anyigbaa naganɔ nɔnɔme nyui me abe tsã ene.

•   “Gbegbe kple kuɖiɖinyigba akpɔ dzidzɔ, tagba atso aseye, eye wòaƒo se abe dzogbenya ene.”—Yesaya 35:1.