NYATI SI LE AKPAA DZI | ÀLƆ̃ AXƆ MAWU ƑE NUNANA GÃTƆ KEKEAKE LA?
Nunana Si Ðeke Mesɔ Kplii O
PENSILKPANU (taille crayon) si le abe tɔdziʋu sue si Jordan lé ɖe asi la medze nu gã aɖeke o. Gake enye eƒe nu vevitɔwo dometɔ ɖeka. Jordan gblɔ be: “Russell si nye míaƒe ƒomea ƒe xɔlɔ̃ tsitsi aɖee tsɔe nam le nye ɖevime.” Jordan va se le Russell ƒe ku megbe be ekpe ɖe ye tɔgbui kple ye dzilawo ŋu ŋutɔ eye wòde dzi ƒo na wo le nɔnɔme sesẽwo me. Jordan gblɔ be: “Fifia si meva nya nu geɖe tso Russell ŋu la, ewɔe be nunana sue sia xɔ asi nam wu tsã.”
Abe ale si wòdzɔ le Jordan gome ene la, nunana aɖewo maɖi naneke le ame aɖewo gbɔ o. Gake ame si kpɔa ŋudzedze ɖe nu si wonae ŋu la, bua nua nu vevi alo nu xɔasii. Biblia ƒo nu tso nunana xɔasi aɖe si ɖeke mesɔ kplii o la ŋu ale: “Mawu lɔ̃ xexea ale gbegbe be wòtsɔ eƒe Tenuvi la na, be ame sia ame si xɔa edzi sena la nagatsrɔ̃ o, ke boŋ wòakpɔ agbe mavɔ.”—Yohanes 3:16.
Nunana si ana exɔla nakpɔ agbe mavɔ ye wònye! Ðe nunana aɖe xɔ asi wu esia? Togbɔ be ame aɖewo made dzesi asixɔxɔ si le nunana sia ŋu o hãa, Kristotɔ vavãwo ya kpɔe be ‘exɔ asi’ ale gbegbe. (Psalmo 49:8; 1 Petro 1:18, 19) Nu ka tae Mawu tsɔ Via ƒe agbe na ɖe xexea ta?
Apostolo Paulo ɖe nu si tae la me ale: “To ame ɖeka dzi nu vɔ̃ va xexea me, eye to nu vɔ̃ me ku la va, ale ku la kaka ɖe amewo katã dome, esi wo katã wɔ nu vɔ̃ ŋuti.” (Romatɔwo 5:12) Ame gbãtɔ Adam, ɖoe koŋ wɔ nu vɔ̃ ɖe Mawu ŋu eye wòkpɔ emetsonua. To Adam dzi la, eƒe dzidzimeviwo katã le kukum.
“Nu vɔ̃ ƒe fetue nye ku, ke Mawu ƒe nunanae nye agbe mavɔ to Kristo Yesu mía Aƒetɔ la dzi.” (Romatɔwo 6:23) Mawu dɔ Via, Yesu Kristo, ɖo ɖe anyigba dzi be wòatsɔ eƒe agbe debliboa asa vɔe ɖe xexea ta ale be yeaxɔ na amegbetɔwo tso ku si me. Ame siwo katã xɔa Yesu ƒe vɔsa si woyɔna be “tafe” la dzi sena la akpɔ agbe mavɔ.—Romatɔwo 3:24.
Paulo gblɔ tso yayra siwo katã Mawu ana esubɔlawo to Yesu Kristo dzi ŋu be: “Woada akpe na Mawu le eƒe nunana faa si wu gbɔgblɔ la ta.” (2 Korintotɔwo 9:15) Nyateƒee, tafea wɔ nuku ale gbegbe be mímate ŋu aɖɔe wòade edeƒe o. Gake le nu siwo katã Mawu na amegbetɔwo faa dome la, nu ka tae tafea le etɔxɛ? Mɔ ka nue wòto vovo na Mawu ƒe nunana bubuwo le? * Eye aleke wòle be míawɔ nu ɖe eŋu? Míele kpewòm be nàxlẽ ale si Biblia ɖo nya siawo ŋu le nyati eve siwo kplɔ esia ɖo la me.
^ mm. 8 Yesu lɔ̃ faa tsɔ eƒe “agbe ɖo anyi ɖe mía ta.” (1 Yohanes 3:16) Gake esi vɔsa sia nye Mawu ƒe tameɖoɖo ƒe akpa aɖe ta la, nyati siawo ƒo nu tso Mawu ŋu be eya koŋ ye nye tafea Nala.
