Esi Yehowa Mawue * nye nuwo katã Wɔla kple ŋusẽkatãtɔ ta la, ame geɖe susuna be eya gbɔe nu vɔ̃ɖi ɖe sia ɖe kple nu siwo katã dzɔna le xexea me la tsona. Gake bu nya si Biblia gblɔ tso Mawu vavãa ŋu la ŋu kpɔ:

•  “Yehowa enye dzɔdzɔetɔ le eƒe mɔwo katã me.”—Psalmo 145:17.

• “[Mawu] ƒe mɔwo katã dzɔ. Mawu nyateƒetɔ wònye, eye alakpa mele eme o, nuteƒewɔla kple dzɔdzɔetɔ wònye.”—5 Mose 32:4.

• “Yehowa ƒe dɔmetɔtrɔ sɔ gbɔ ŋutɔ, eye wòkpɔa nublanui na ame.”—Yakobo 5:11.

Menye Mawue nana nu vɔ̃ɖiwo dzɔna o. Gake ɖe wòƒonɛ ɖe amewo nu be woawɔ nu vɔ̃ɖia? Kura o. Ŋɔŋlɔawo gblɔ be: “Ne ame aɖe le tetekpɔ me tom la, negagblɔ be: ‘Mawue le teyem kpɔ’ o.” Nu ka tae? Elabena “womate ŋu atsɔ nu vɔ̃ɖiwo ate Mawu kpɔ o, eye eya ŋutɔ hã metea ame aɖeke kpɔ o.” (Yakobo 1:13) Mawu metea ame aɖeke kpɔna alo ƒonɛ ɖe ame nu be wòawɔ nu gbegblẽ o. Menye Mawu gbɔe wòtsona be nu vɔ̃ɖiwo dzɔna o, eye meƒonɛ ɖe amewo nu hã be woawɔ nu baɖa o. Ekema ame kae nana nu vɔ̃ɖiwo dzɔna? Alo nu ka gbɔe wòtsona?

Susu siwo tae amegbetɔwo kpea fu ɖo la dometɔ ɖeka dze le Biblia me nya siawo me: “Azãgbe kple nuɖiɖeame li na wo katã.” (Nyagblɔla 9:11) Ne afɔku adzɔ ɖe ame aɖe dzi alo madzɔ ɖe edzi o la, atso afi si amea le hafi afɔkua dzɔ la gbɔ. Ƒe 2,000 kloe ye nye esia la, Yesu Kristo ƒo nu tso xɔ kɔkɔ aɖe si mu dze ame 18 dzi woku la ŋu. (Luka 13:1-5) Menye ale si wonɔ agbee la tae xɔa mu dze wo dzi ɖo o; ɖeko wòva eme be wonɔ xɔ kɔkɔa te esime wòmu. Nyitsɔ laa la, anyigba ʋuʋu sesĩe le Haiti le January 2010 me; Haiti dziɖuɖua gblɔ be ame 300,000 sɔŋ ye ku. Menye ame si ƒomevi wonye tae woku ɖo o, ɖeko afɔkua ɖi ɖe wo. Dɔlélewo hã tea ŋu dzea ame sia ame dzi le vo me.

Ame aɖewo abia be: ‘Ðe Mawu mate ŋu axe mɔ ɖe afɔku dziŋɔ mawo nu hafi oa? Ðe mate ŋu akpɔ ame nyuiwo ta be vɔ̃ nagadzɔ ɖe wo dzi oa?’ Hafi Mawu nate ŋu ade asi nyawo me le mɔ siawo nu la, ele be wòanya do ŋgɔ be afɔkuawo gbɔna dzɔdzɔ ge. Togbɔ be ŋutete le Mawu si be wòanya nu si adzɔ le etsɔme hã la, nya si wòle be míabiae nye: Ðe Mawu wɔa ŋutete si le esi be wòanya nu si adzɔ le etsɔme la ŋu dɔ be yeatsɔ anya nu sia nua?—Yesaya 42:9.

Ŋɔŋlɔawo gblɔ be: “Mía Mawu le dziƒo, nu sia nu, si dze eŋu la, wòwɔna.” (Psalmo 115:3) Nu si le vevie na Yehowa lae wòwɔna, ke mewɔa nu ɖe sia ɖe ko le esi ŋutetea le esi ta o. Esia nye nyateƒe le nu siwo wòtiana be yeanya do ŋgɔ hã gome.  Le kpɔɖeŋu me, esi nu vlo wɔwɔ xɔ aƒe ɖe blemadu siwo nye Sodom kple Gomora me la, Mawu gblɔ na blemafofo Abraham be: “Maɖi ayi, ne makpɔ bena, nya, siwo katã sem mele le wo ŋuti la, le eme loo, alo mele eme o, ne manya.” (1 Mose 18:20, 21) Do ŋgɔ na esia la, Yehowa metso nya me be yeanya ale si gbegbe vɔ̃ɖinyenye xɔ aƒe ɖe du mawo mee o. Esia fia be menye nu sia nue Yehowa tiana be yeanya do ŋgɔ o. (1 Mose 22:12) Ke hã esia menye blibomademade alo gbɔdzɔgbɔdzɔ le Mawu gome kura o. Esi wònye be Mawu ƒe “nuwɔwɔ de blibo” ta la, ewɔa ŋutete si le esi be yeanya nu si adzɔ le etsɔme la ŋu dɔ le mɔ si ana eƒe tameɖoɖo nava eme la nu; mezia amegbetɔwo dzi gbeɖe be woanɔ agbe le mɔ aɖe nu o. * (5 Mose 32:4) Ekema aleke míaƒo nya tae? Kpuie ko la, ne Mawu kpɔe be ehiã ko hafi wòwɔa eƒe etsɔmenyanya ƒe ŋutetea ŋu dɔ.

Vɔ̃ɖinyenye si le edzi yim la ƒe fɔbubua le amegbetɔwo hã dzi. Bu ale si Biblia ɖɔ ale si wòdzɔnae be ame tea ŋu wɔa nu gbegblẽ la ŋu kpɔ. Egblɔ be: “Nu si tea ame sia ame kpɔ lae nye ye ŋutɔ ƒe nudzodzro si henɛ, eye wòblenɛ. Azɔ ne nudzodzro la fɔ fu la, edzia nu vɔ̃; eye ne nu vɔ̃ hã va tsi la, edzia ku.” (Yakobo 1:14, 15) Ne amewo ɖi kɔ na woƒe dzodzro vɔ̃wo alo ɖe mɔ dzodzro siawo ɖu wo dzi la, woakpɔ emetsonu gbegblẽawo godoo. (Romatɔwo 7:21-23) Tso blema ke la, amegbetɔwo wɔa nu dziŋɔwo eye esia hea fukpekpe manyagblɔwo vɛ. Gakpe ɖe eŋu la, ame vɔ̃ɖiwo tea ŋu kplɔa ame bubuwo dea nu gbegblẽ wɔwɔ me, si wɔnɛ be nu gbegblẽ wɔwɔ gadoa gã ɖe edzi.—Lododowo 1:10-16.

Ðe wòle be Mawu naxe mɔ na amewo be woagawɔ nu vɔ̃ɖi oa? Bu ale si wòwɔ amegbetɔwoe ŋu kpɔ. Ŋɔŋlɔawo gblɔ be Mawu wɔ amegbetɔ ɖe eya ŋutɔ ƒe nɔnɔme nu. Eya ta ŋutete le amegbetɔwo si be woaɖe Mawu ƒe nɔnɔme nyuiwo afia. (1 Mose 1:26) Mawu na tiatiawɔwɔ ƒe ablɔɖe amegbetɔwo, eya ta woate ŋu atiae be yewoalɔ̃ Mawu ahawɔ nuteƒe nɛ, nenye be woyia edzi wɔa nu si sɔ le eŋkume. (5 Mose 30:19, 20) Ne Mawu ƒonɛ ɖe mía nu be míawɔ yeƒe didiwo dzi la, ɖe esia mafia be ele mɔ xem ɖe míaƒe tiatiawɔblɔɖea nu oa? Ðeko esia awɔe be amegbetɔwo nava nɔ abe mɔ̃ siwo ŋu wotrɔ asi le be woawɔ nu si tututu woɖo na wo la nuŋumabumabui ene. Nenema kee wòanɔ ne nyateƒee wònye be Kismet, alo dzɔgbesee ɖo nu sia nu si míewɔna kple nu sia nu si dzɔna ɖe mía dzi la ɖi. Ðe mele be míakpɔ dzidzɔ be Mawu de bubu mía ŋu esi wòɖe mɔ na mí be míawo ŋutɔwo míatia nu si míawɔ oa? Gake esia mefia be amegbetɔwo ƒe  vodadawo kple nyametsotso gbegblẽ siwo wowɔna la me tsonuwo ayi edzi anɔ fu ɖem na ameƒomea tegbee o.

Ne èbia nya si dze le magazine sia ƒe ŋgɔgbekpaa dzi la Hindutɔ alo Buddhatɔ aɖe la, ɖewohĩ aɖo eŋu na wò ale: “Karma ƒe sea gbɔe wòtsona be vɔ̃ dzɔna ɖe ame nyuiwo dzi. Nu siwo wowɔ le agbe si wonɔ va yi me hafi gbugbɔgadzɔ la ƒe fetu xɔm wole.” *

Le Karma ƒe nufiafiaa gome la, anyo be míanya nya si Biblia gblɔ tso ku ŋu. Le Eden bɔa me afi si wowɔ ame gbãtɔ, Adam, ɖo la, Wɔla la gblɔ nɛ be: “Ðu abɔmetiawo katã ƒe tsetse faa; ke ati, si na wodzea si nyui kple vɔ̃ la, mègaɖu eya ƒe tsetse aɖeke o; gbe si gbe nàɖu eƒe ɖe, ku ke nàku.” (1 Mose 2:16, 17) Ne ɖe Adam ɖo to Mawu eye mewɔ nu vɔ̃ o la, anye ne anɔ agbe tegbee hafi. Eya ta tomaɖomaɖo Mawu ƒe se ye he ku vɛ. Esi atsu kple asi gbãtɔa te vidzidzi la, “ku la kaka ɖe amewo katã dome.” (Romatɔwo 5:12) Eya ta eme kɔ be Ŋɔŋlɔawo gblɔ be ‘nu vɔ̃ ƒe fetue nye ku.’ (Romatɔwo 6:23) Biblia gblɔ hã be: “Ame si ku la, woɖee tso eƒe nu vɔ̃ me.” (Romatɔwo 6:7) Ne míagblɔe bubui la, efia be amewo meyia edzi kpea fu ɖe woƒe nu vɔ̃wo ta le ku megbe o.

Egbea la, ame miliɔn geɖe gblɔna be Karma ƒe sea gbɔe amegbetɔwo ƒe fukpekpewo tsona. Ame si xɔ nufiafia sia dzi se la sea egɔme be ye kple ame bubuwo yewodze na fu siwo kpem yewole, eye metena ɖe edzi boo o. Gake nyateƒeae nye be le dzixɔse sia ƒe nya nu la, mɔkpɔkpɔ aɖeke meli be fukpekpe nu ava yi o. Woxɔe se be nu si ko gbɔ gbɔdzɔe ate ŋu atsoe nye be ame nanɔ agbe ɖɔʋu eye sidzedze tɔxɛ nasu esi ale be wòakpɔ ablɔɖe tso gbugbɔgadzɔ enuenu si me. Gake dzixɔse siawo to vovo sãa na nya si Biblia gblɔ. *

Ke hã menye amegbetɔwo koŋ gbɔe vɔ̃ɖinyenye tso o. Satana Abosam, si nye Mawu ƒe dɔla wɔnuteƒe tsã la “meli ke ɖe nyateƒe la me o” eye eyae na nu vɔ̃ va xexea me. (Yohanes 8:44) Ena amegbetɔwo dze aglã le Eden bɔa me. (1 Mose 3:1-5) Yesu Kristo yɔe be “vɔ̃ɖitɔ la” kple “xexea dzi ɖula.” (Mateo 6:13; Yohanes 14:30) Ame akpa gãtɔ dze Satana yome esi woɖoa to eƒe beble si nye be woagazɔ Yehowa ƒe mɔ dzɔdzɔeawo dzi o la ta. (1 Yohanes 2:15, 16) Biblia gblɔ le 1 Yohanes 5:19 be: “Xexe blibo la katã le vɔ̃ɖitɔ la ƒe ŋusẽ te.” Mawudɔla bubuwo hã va zu gbɔgbɔ vɔ̃wo eye wowɔ ɖeka kple Satana. Biblia gblɔ be Satana kple eƒe gbɔgbɔ vɔ̃wo “le anyigba dzi nɔlawo katã blem,” si wɔe be wodo “baba na anyigba.” (Nyaɖeɖefia 12:9, 12) Eya ta Satana Abosam koŋ dzie fukpekpe siwo vaa mía dzi la ƒe fɔbubua le.

Eme kɔ ƒãa be menye Mawu gbɔe vɔ̃ siwo dzɔna ɖe ame nyuiwo dzi la tsona o; eye menye eyae nana wokpea fu hã o. Ke boŋ edo ŋugbe be yeaɖe vɔ̃ɖinyenye ɖa keŋkeŋ, abe ale si wòdze le nyati si kplɔe ɖo me ene.