Èxɔ Mawu dzi sea? Ðe nàte ŋu atɔ asi nu siwo ɖee fia be eli ŋutɔŋutɔ la dzia? Le nyateƒe me la, nu gbogbo aɖewo ƒo xlã mí siwo ɖo kpe edzi be Wɔla nyanu triakɔ si lɔ̃ ame aɖe li. Nu kawoe ɖo kpe edzi be eli, eye aleke gbegbe kpeɖodzi siawo nu sẽe? Be míakpɔ ŋuɖoɖoa la, na míadzro nya siwo apostolo Paulo gblɔ le lɛta si wòŋlɔ na Kristotɔ siwo nɔ Roma me la me.

Paulo gblɔ be: “[Mawu ƒe] nɔnɔme makpɔmakpɔawo dzena gaglãa wokpɔna tso xexea wɔwɔ dzi heyina, elabena wodzena wokpɔna le nu siwo wòwɔ la me, ɛ̃, eƒe ŋusẽ mavɔmavɔ kple Mawunyenye la dzena, ale be womate ŋu ado taflatsɛ o.” (Romatɔwo 1:20) Abe ale si Paulo gblɔe ene la, Wɔla la ƒe asinu dze le eƒe asinudɔwɔwɔwo ŋu. Na míadzro Paulo ƒe nya siawo me kpɔ.

Paulo gblɔ be, Mawu ƒe nɔnɔmewo dzena wokpɔna “tso xexea wɔwɔ dzi heyina.” Helagbe me nya si gɔme woɖe le afi sia be “xexea” mefia Anyigba si dzi míele o. Ke boŋ efia amegbetɔƒomea. * Eya ta ɖe Paulo nɔ gbɔgblɔm be, tso esime wowɔ amegbetɔwo ko la, woate ŋu akpɔ Wɔla la ƒe nɔnɔmewo le nu siwo wòwɔ la me.

Kpeɖodziwo li zã ƒo xlã mí. Womele ɣaɣla o, ke boŋ ‘wodzena gaglãa.’ Tso nuwɔwɔ klitsuwo dzi va se ɖe suetɔwo dzi la, edze kɔtɛe be Wɔla aɖe li eye nɔnɔme wɔnukuwo le esi. Ðe aɖaŋu si gbegbe dze le nuwɔwɔwo me la meɖo kpe Mawu ƒe nunya dzi na mí oa? Ðe dziŋgɔli si yɔ fũu kple ɣletivi gbogbowo kpakple ƒutsotsoewo ƒe gbeɖeɖewo meɖo kpe eƒe ŋusẽ dzi oa? Ðe nuɖuɖu vivi vovovowo kple agudzedze kpakple ɣe ƒe amigogbagba si nya kpɔna ŋutɔ meɖee fia be elɔ̃ amegbetɔwo oa?—Psalmo 104:24; Yesaya 40:26.

Ðe kpeɖodziawo dze gaglãa nyateƒea? Wodze gaglãa ale gbegbe be ame siwo mekpɔa wo dzea sii o alo gbe be yewomaxɔ Mawu dzi ase o la ‘mate ŋu ado taflatsɛ o.’ Agbalẽnyala aɖe wɔ eƒe kpɔɖeŋu ale: Tsɔe be ʋukula aɖe ŋe aɖaba ƒu mɔfiadzesi si gblɔ be “Trɔ Nàto Miame” la dzi. Kpovitɔ aɖe lée hedo fe nɛ. Ʋukulaa nɔ eɖokui nu ɖem be yemekpɔ dzesia o. Gake kpovitɔa melɔ̃ xɔ eƒe ɖokuinuɖenyawo o, elabe dzesia dze gaglãa eye eƒe ŋkuwo hã le nu kpɔm nyuie. Gawu la, ʋukulaa ƒe agbae wònye be wòakpɔ mɔfiadzesiawo ahazɔ ɖe wo dzi. Nenema kee wòle le ale si nuwɔwɔwo ɖo kpe edzi be Mawu li la hã gome. Kpeɖodziawo dze gaglãa. Esi míenye nuwɔwɔ siwo bua tame ta la, ŋutete le mía si be míakpɔ wo adze sii. Ame si ŋe aɖaba ƒu wo dzi la mate ŋu ado taflatsɛ aɖeke o.

Vavãe nuwɔwɔwo ɖe nu geɖe fia mí tso mía Wɔla la ŋu. Gake agbalẽ aɖe li si ɖe nu geɖe wu fia tso eŋu, eyae nye Biblia la. Míate ŋu akpɔ nyabiase sia ƒe ŋuɖoɖo le eme: Tame kae Mawu ɖo ɖe anyigba kple amegbetɔ siwo le edzi la ŋu? Ne èkpɔ nyabiase sia ƒe ŋuɖoɖo la, ana nàte ɖe Mawu ame si ƒe “nɔnɔme makpɔmakpɔawo dzena gaglãa” le xexea me la ŋu.