Ðe Nàte Ŋu Aka Ðe Subɔsubɔhawo Dzi Le Ganyawo Mea?
Estelle * kple viawo mefena kple sɔlemedede kura o. Se nya si wògblɔ ɖa: “Mebia nye pastɔ be wòakpe ɖe ŋunye masrɔ̃ Biblia.” Gake pastɔa mewɔ ɖoɖo aɖeke be yeasrɔ̃ Biblia kplii o. Mlɔeba la, Estelle dzudzɔ sɔlemea dede. Egblɔ be: “Míaƒe sɔlememegãwo ŋlɔ lɛta nam hena menya be ne nyemagate ŋu ava sɔlemea o hã la, maɖo nye nudzɔdzɔwo ya ɖa. Mekpɔe be menye nye sɔleme dede alo emademade ye le vevie na wo o; nye ga ko dim wole.”
Angelina, si doa vevie mawusubɔsubɔ ŋutɔ la, gblɔ be: “Ɣesiaɣi si míeyi sɔleme la, wotsɔa nudzɔgbawo tsana zi etɔ̃, eye wodina tso mía si be míadzɔ nu de eme zi etɔ̃awo katã. Míaƒe ga ŋu koe wotsi dzi ɖo. Esia na megblɔ na ɖokuinye be, ‘Menye Mawu ƒe gbɔgbɔe le ame siawo dzi o.’”
Ðe subɔsubɔha siwo le miaƒe nutoa me la toa ayemɔ vovovowo dzi zia amewo dzi be woadzɔ ga na yewoa? Ðe nèkpɔe be esia sɔ kple Biblia ƒe mɔfiamewoa?
NU KAE BIBLIA FIA TSO NYA SIA ŊU?
Yesu, si ɖo Kristotɔnyenye anyi la gblɔ be: “Faa miexɔe, faa minae.” (Mateo 10:8) Nunanae Biblia nye tso Mawu gbɔ, eya ta mele be ame aɖeke naxe fe ɖe Mawu ƒe Nyaa sese ta o.
Ke afi kae Kristotɔ gbãtɔwo kpɔ ga le tsɔ kpɔ hamea ƒe nuhiahiãwo gbɔe?
Ame sia ame dzɔ nu “abe ale si wòɖo le eƒe dzi me ene, menye kple veve alo dzizizi o, elabena ame si naa nu kple dzidzɔ lae Mawu lɔ̃na.” (2 Korintotɔwo 9:7) Apostolo Paulo gblɔ be: “Esime míenɔ Mawu ƒe nya la gblɔm na mi la, zã kple keli ye míenɔ dɔ wɔm, bene míagazu agba gã aɖeke na mia dometɔ aɖeke o.” (1 Tesalonikatɔwo 2:9) Edze ƒãa be avɔgbadɔ ye Paulo wɔ tsɔ kpɔ eƒe nuhiahiãwo gbɔ le nyanyuigbɔgblɔdɔa me.—Dɔwɔwɔwo 18:2, 3.
ALEKE YEHOWA ÐASEFOWO WƆA NU LE GO SIA ME?
Zi geɖe la, Yehowa Ðasefowo kpena le xɔ siwo woyɔna be Fiaɖuƒe Akpatawo me, si womeɖoa atsyɔ na kpeɖii o. Afi kae wokpɔa ga le tsɔ kpɔa hamea ƒe nuhiahiãwo gbɔ? Wometsɔa nudzɔgbawo tsana o, eye womemaa agbalẽkotokuwo hã na amewo be woadzɔ ga de eme o. Ne kpekpea vala aɖe di be yeaɖe ŋudzedzekpɔkpɔ afia la, nudzɔɖakawo le Fiaɖuƒe Akpataa me eye ate ŋu adzɔ nu ade eme le ame bubuwo ƒe manyamanya me.
Mɔ ka dzie wòle be subɔsubɔhawo nato akpɔ ga na woƒe nuhiahiãwo?
Magazine sia tata kple eɖoɖoɖa bia ga geɖe zazã. Gake womedoa asi ɖe eŋu o, eye womebiana be amewo nadzɔ nu ɖe eta godogodo o. Taɖodzinua ye nye be woatsɔe aɖe gbeƒã Biblia me nyateƒea.
Aleke nèkpɔe, ɖe esia wɔ ɖeka kple Yesu ƒe nyawo kple ale si Kristotɔ gbãtɔwo wɔea?
^ mm. 2 Míetrɔ ŋkɔ aɖewo le nyati sia kple etɔ̃ siwo kplɔe ɖo me.
