Ameɖokuifuflu nye ameɖokuibeble si wɔnɛ be ame ŋea aɖaba ƒua ale si nuwo le ŋutɔŋutɔ dzi, eye metea ŋu dana sɔna le nuŋububu me o. Le kpɔɖeŋu me, ame aɖewo trɔna ɖe ahanono ŋu ne kuxiwo do mo ɖa. Le gɔmedzedzea me la, ahaa ate ŋu ana dzi naɖo eƒo be wòanɔ te ɖe kuxiawo nu. Gake mlɔeba la, ame siwo ɖoa ŋu ɖe aha ŋu la gblẽa nu le wo ɖokui ŋu. Alea kee wòle le subɔsubɔdzixɔsewo gomea?

Ame aɖewo susuna be xɔse fia be woaxɔ nya sia nya ko dzi ase. Wogblɔna be ame siwo lé xɔse me ɖe asi la medina be yewo ŋutɔ yewoade ŋugble le nyawo ŋu o alo be wometua woƒe dzixɔsewo ɖe kpeɖodzi sẽŋuwo dzi o. Woƒe nyawo fia be ame siwo si xɔse sẽŋu le la ŋea aɖaba ƒua ale si nuwo le ŋutɔŋutɔ dzi.

Biblia gblɔ nya geɖe tso xɔse ŋu. Gake megblɔ kpɔ be míaxɔ nya sia nya ko dzi ase o. Eye mede kuviawɔwɔ le nuŋububu me dzi hã o. Ke boŋ egblɔ tso ame siwo xɔa nya sia nya dzi sena ŋu be wonye ame bebewuwo. (Lododowo 14:15, 18) Vavãe, anye bometsinuwɔwɔ be míaxɔ nya aɖe be enye nyateƒe esi míekpɔ eŋuti kpeɖodziwo o! Ðeko wòanɔ abe ɖe míetsyɔ nu ŋku dzi hafi le agbagba dzem be míatso mɔdodo si dzi ʋuwo sɔ gbɔ ɖo la me ene le esi ame aɖe be míawɔe ta ko.

Biblia mede dzi ƒo be míaxɔ nya sia nya dzi ase o, ke boŋ exlɔ̃ nu mí be míana míaƒe kpɔɖeŋuŋkuwo nanɔ ʋuʋu ɖi be woagable mí o. (Mateo 16:6) Be míaƒe ŋkuwo nanɔ ʋuʋu ɖi bia be míawɔ míaƒe “tamebubu ŋutete” ŋu dɔ. (Romatɔwo 12:1) Biblia fia mí be míade ŋugble le kpeɖodziwo ŋu be míaƒe nyataƒoƒowo nanye esiwo me susu le siwo míetu ɖe nyateƒe dzi. Esia ƒe kpɔɖeŋuwo dze le agbalẽ siwo apostolo Paulo ŋlɔ la me.

Esi Paulo ŋlɔ agbalẽ na Roma hamea la, medi be woaxɔ Mawu dzi ase le esi wògblɔe na wo be woaxɔ edzi ase ta ko o. Ke boŋ ede dzi ƒo na wo be woabu nu siwo ɖo kpe edzi be Mawu li ŋutɔŋutɔ la ŋu. Eŋlɔ bena: “[Mawu ƒe] nɔnɔme makpɔmakpɔawo dzena gaglãa wokpɔna tso xexea wɔwɔ dzi heyina, elabena wodzena wokpɔna le nu siwo wòwɔ la me, ɛ̃, eƒe ŋusẽ mavɔmavɔ kple Mawunyenye la dzena, ale be [ame siwo gbe Mawu la mate] ŋu ado taflatsɛ o.” (Romatɔwo 1:20) Paulo ɖe susu kple Hebritɔwo le mɔ sia tɔgbi nu le agbalẽ si wòŋlɔ na wo la me. Egblɔ be: “Nyateƒee, aƒe sia aƒe la, ame aɖee tsonɛ, gake ame si wɔ nuwo katã lae nye Mawu.” (Hebritɔwo 3:4) Le agbalẽ aɖe si Paulo ŋlɔ na Kristotɔ siwo nɔ Tesalonika me la, ede dzi ƒo na wo be woagaxɔ nya sia nya ko dzi ase o, ke boŋ be ‘woado nuwo katã akpɔ.’—1 Tesalonikatɔwo 5:21.

Xɔse si wometu ɖe kpeɖodzi sẽŋuwo dzi o la ate ŋu akplɔ ame atrae ahagblẽ nu le eŋu hã. Paulo gblɔ tso ame aɖewo siwo doa vevie mawusubɔsubɔ le eŋɔli ŋu be: “Mele ɖase ɖim na wo be, dzo le wo me ɖe Mawu ŋu; gake menye le sidzedze vavãtɔ nu o.” (Romatɔwo 10:2) Ekema ɖe mele vevie ŋutɔ be míawɔ ɖe aɖaŋu sia si Paulo ɖo na Roma hamea dzi oa? Eŋlɔ bena: “Mina woatrɔ miaƒe nɔnɔme to miaƒe tamesusu wɔwɔ yeyee me, bene miado Mawu ƒe lɔlɔ̃nu nyui dzeameŋu si le blibo la kpɔ na mia ɖokui.” (Romatɔwo 12:2) Xɔse si míetu ɖe Mawu ŋuti sidzedze vavãtɔ dzi la menye ameɖokuifuflu o, ke boŋ enye ‘akpoxɔnu gã’ si kpɔa mía ta tso nu siwo ate ŋu agblẽ nu le míaƒe seselelãme alo mawusubɔsubɔ ŋu la si me.—Efesotɔwo 6:16.