Biblia Le Amewo Ƒe Agbenɔnɔ Trɔm

NU KAE ŋutsu aɖe si le Scotland de dzesii be enye viɖenu wu dzidzedzekpɔkpɔ le asitsatsa me? Nu kae kpe ɖe Brazil ŋutsu aɖe ŋu wòdzudzɔ agbe gbegblẽ nɔnɔ kple kokein sesẽ nono? Aleke Slovenia ŋutsu aɖe si nye aha tsu nola la wɔ te ŋu dzudzɔ aha geɖe nono? Xlẽ woƒe numenyawo nàkpɔ.

“Menɔ agbe ɖum.”—JOHN RICKETTS

ƑE SI ME WODZII: 1958

DUKƆ SI ME WÒTSO: SCOTLAND

AME SI TƆGBI WÒNYE TSÃ: ASITSALA SI NU DZE EDZI NA

AGBE SI MENƆ TSÃ: Ganyawo de míaƒe ƒomea dzi. Fofonye nye Britain asrafomegã, eya ta ƒomea ʋuna edziedzi. Tsɔ kpe ɖe Scotland ŋu la, míenɔ England, Germany, Kenya, Malaysia, Ireland, kple Cyprus. Tso esime mexɔ ƒe enyi la, menɔ sukukpo vovovowo dzi de suku le Scotland. Mewu suku nu mlɔeba le Cambridge Yunivɛsiti.

Esi mexɔ ƒe 20 la, menɔ mɔ̃memi ƒe asitsadɔa me ƒe enyi. Gbã la, mewɔ dɔ sia le South America, emegbe le Afrika, kpakple mlɔeba le Western Australia. Esi meʋu yi Australia la, meɖo asitsadɔwɔƒe aɖe si meva dzra emegbe.

Viɖe si mekpɔ tso dɔwɔƒea dzadzra me la wɔe be mexɔ dzudzɔ le dɔ me esi mexɔ 40. Mezã nye vovoɣia tsɔ nɔ mɔ zɔm. Medo dzokeke ɖi tsa le Australia godoo zi eve sɔŋ. Menɔ agbe ɖum.

ALE SI BIBLIA TRƆ NYE AGBENƆNƆ: Hafi maxɔ dzudzɔa gɔ̃ hã la, menɔ mɔ si dzi mato ada akpe na Mawu ɖe ale si agbea dze edzi nam ta la dim. Meva nɔ Anglikan Sɔlemea, si nye ha si me wodzim ɖo la dem. Gake sɔlemea mefia nu boo aɖeke tso Biblia me o. Eyome Mormontɔwo srɔ̃ nu kplim, gake woƒe nu megava dze ŋunye o, le esi wometu woƒe dzixɔsewo ɖe Biblia dzi bliboe o ta.

Gbe ɖeka, Yehowa Ðasefowo va ƒo ʋɔ nam. Mede dzesii enumake le dze si woɖo kplim la me be wotu woƒe nufiafiawo ɖe Biblia dzi bliboe. Mawunyakpukpui siwo woxlẽ nam dometɔ ɖekae nye 1 Timoteo 2:3, 4. Kpukpui mawo gblɔ be Mawu ƒe lɔlɔ̃nue nye be “woaɖe ame ƒomeviwo katã, eye nyateƒe ƒe sidzedze vavãtɔ la nasu wo si.” Ale si Ðasefoawo te gbe ɖe sidzedze vavãtɔ si wotu ɖe Biblia dzi la dzi, ke menye sidzedze dzro ko o la wɔ dɔ ɖe dzinye.

Esi Yehowa Ðasefowo srɔ̃ Biblia kplim la, sidzedze vavãtɔ ma va su asinye. Le kpɔɖeŋu me, meva srɔ̃e be Mawuɖekaetɔ̃ ƒe nufiafia si ŋu gɔmesese mele o la nye aʋatso; Mawu kple Yesu menye Mawuɖekaetɔ̃ ƒe akpa aɖeke o, ke  boŋ wole vovo. (Yohanes 14:28; 1 Korintotɔwo 11:3) Dzi dzɔm be meva dze si nyateƒenya bɔbɔe ma. Evem be megblẽ ɣeyiɣi tsɔ nɔ agbagba dzem be mase Mawuɖekaetɔ̃ ƒe nufiafia manyatalenua gɔme!

Eteƒe medidi o, meva te Yehowa Ðasefowo ƒe kpekpewo dede. Vividodoɖeameŋu kple agbe nyui nɔnɔ si xɔ aƒe ɖe wo dome la wɔ dɔ ɖe dzinye. Ðeko menɔ wo kpɔm abe ame kɔkɔewoe wonye ene. Lɔlɔ̃ akuakua si le wo dome la na mekpɔe be meke ɖe subɔsubɔha vavãtɔ ŋu.—Yohanes 13:35.

VIÐE SIWO MEKPƆ: Esi mexɔ nyɔnyrɔ vɔ megbe la, medo go nyɔnu nyui aɖe si ŋkɔe nye Diane. Yehowa Ðasefowo ƒe ƒome mee wonyii le, eye nɔnɔme nyui geɖe siwo le esi la na eƒe nu nyo ŋunye. Le ɣeyiɣi aɖe megbe la, míeɖe mía nɔewo. Zɔhɛ kple kpeɖeŋutɔ si Diane nye nam la nye yayra tso Yehowa gbɔ vavã.

Eva nye mía kple Diane ƒe didi vevie be míaʋu ayi afi si Biblia me nya nyuia ŋuti gbeƒãɖela geɖe wu hiã le. Eya ta le ƒe 2010 me la, míeʋu yi Belize le Central America. Le afi sia la, míeɖea gbeƒã na ame siwo lɔ̃ Mawu hedi vevie be yewoasrɔ̃ nu geɖe tso Biblia me.

Nyateƒea nyanya ku ɖe Mawu kpakple eƒe Nya, Biblia, ŋu na mekpɔ dzidzeme. Gbe sia gbe gbeƒãɖeɖedɔa na mele vivi sem na Biblia fiafia amewo. Ne mekpɔ ale si Biblia me nyateƒea le amewo ƒe agbenɔnɔ trɔm abe ale si wònɔ le gonyeme ene la, dzi dzɔam ale gbegbe. Azɔ ko, meva kpɔ mɔ nyuitɔ si dzi mato ada akpe na Mawu ɖe agbe si mele vivi sem na la ta.

“Wowɔ nuɖe ŋunye nyuie ŋutɔ.”​—MAURÍCIO ARAÚJO

ƑE SI ME WODZII: 1967

DUKƆ SI ME WÒTSO: BRAZIL

AME SI TƆGBI WÒNYE TSÃ: AGBE GBEGBLẼ NƆLA

AGBE SI MENƆ TSÃ: Avaré, si nye du sue aɖe si le São Paulo ye menɔ tsi. Dua me tɔ akpa gãtɔ nye lebledɔwɔlawo.

Fofonye ku esi nye fu nɔ danye ƒo. Esime menye ŋutsuvi dzaa la, ne danye do go la, metsɔa eƒe awuwo dona. Meva nɔ nu wɔm abe nyɔnu ene, eye amewo buam be menye ŋutsu si dɔna kple ŋutsu. Le ɣeyiɣi aɖe megbe la, meva nɔ dɔdɔm kple ŋutsuviwo kple ŋutsu tsitsiwo siaa.

Esi menɔ dodom le nye ƒewuiwo me la, menɔa ame siwo madɔ kplii la dim vevie (ŋutsuwo kple nyɔnuwo siaa) le afi sia afi si makpɔ wo le—le ahanoƒewo, zãmodzakaɖeƒewo, kple sɔlemewo gɔ̃ hã me. Le dukɔa ƒe azãɖuɣiwo la, medzrana ɖo abe nyɔnu ene heɖua ɣe le sukuwɔnawo me. Mexɔ ŋkɔ ŋutɔ.

Ŋutsu siwo dɔna kple ŋutsuwo, gbolowo, kple atike vɔ̃ɖi zãlawo nɔ xɔ̃nyewo dome. Wo dometɔ aɖewo na metè kokein zazã kpɔ, kasia enono va zu numame nam. Ɣeaɖewoɣi la, míenɔa enono dzi zã bliboa. Ɣebubuɣiwo la, meɖea ɖokuinye ɖe aga ɖanoa kokein ŋkeke bliboa. Meva ɖi  ku ale gbegbe be wobewobewo nɔ ɖiɖim be mexɔ ɖikanakudɔ.

ALE SI BIBLIA TRƆ NYE AGBENƆNƆ: Ɣeyiɣi sia me lɔƒoe medo go Yehowa Ðasefowo. Wowɔ nu ɖe ŋunye nyuie ŋutɔ. Mawunyakpukpui siwo woxlẽ nam dometɔ ɖekae nye Romatɔwo 10:13, si gblɔ be: “Ame sia ame si yɔa Yehowa ƒe ŋkɔ la, woaɖee.” Nya mawo na mekpɔ vevienyenye si le Yehowa ƒe ŋkɔa zazã ŋu la dze sii. Zi geɖe ne meno kokein sesẽa zã bliboa vɔ la, meʋua fesre hewua mo dzi doa gbe ɖa na Yehowa kple aɖatsiwo nɔa kuku ɖem nɛ be wòakpe ɖe ŋunye.

Esi metsi dzi ɖe danye, si nɔ nu xam henɔ veve sem vevie ɖe ale si menɔ nye agbe dome gblẽm to atike vɔ̃ɖi zazã me ŋu ta la, meɖoe kplikpaa be madzudzɔ. Ema megbe kpuie la, melɔ̃ be Ðasefoawo nasrɔ̃ Biblia kplim. Woka ɖe edzi nam be Biblia sɔsrɔ̃ ado ŋusẽm madzudzɔ atike vɔ̃ɖi zazã, eye ekpe ɖe ŋunye hã vavã!

Esi meyi Biblia sɔsrɔ̃a dzi la, meva de dzesii be ehiã be matrɔ nye agbenɔnɔ. Esesẽ nam ŋutɔ be madzudzɔ gomekpɔkpɔ le ŋutsu kple ŋutsu ƒe dɔdɔ me, elabena tso keke nye ɖevime kee medze agbe sia nɔnɔ gɔme. Gake nu si kpe ɖe ŋunyee nye be meƒo asa na nu siwo nɔ ŋusẽ gbegblẽ kpɔm ɖe dzinye. Medzudzɔ hadede kple xɔ̃nye tsãtɔwo, eye nyemegayia ahadzraƒewo kple zãmodzakaɖeƒewo o.

Togbɔ be tɔtrɔ siawo menɔ bɔbɔe o hã la, enyanya be Yehowa tsɔ ɖe le eme nam, eye wòse avu si wɔm mele gɔme la fa akɔ nam. (1 Yohanes 3:19, 20) Kaka ƒe 2002 naɖo la, meɖe asi le ŋutsu kple ŋutsu ƒe dɔdɔ me nuwɔna ɖe sia ɖe ŋu keŋkeŋ, eye ƒe ma mee mexɔ nyɔnyrɔ zu Yehowa Ðasefo.

VIÐE SIWO MEKPƆ: Tɔtrɔ siawo wɔ dɔ ɖe danye dzi ale gbegbe be eya hã te Biblia sɔsrɔ̃. Nublanuitɔe la, gbagbadɔ va dze edzi. Ke hã, lɔlɔ̃ si le esi na Yehowa kpakple Biblia me nyateƒea sɔsrɔ̃ la le dzidzim ɖe edzi.

Ƒe enyie nye esia mele gbe sia gbe gbeƒãɖeɖedɔa wɔm, si wɔe be mezãa nye ɣeyiɣi akpa gãtɔ tsɔ fiaa Biblia amewo. Ele eme be megawɔa avu kple dzodzro vɔ̃wo ɣeaɖewoɣi ya. Gake nye dzi dzea eme esi menyae be zi ale si nyemena dzodzro mawo ɖu dzinye o ko la, nye nu dzea Yehowa ŋu.

Tete ɖe Yehowa ŋu, kpakple nu si dzea eŋu wɔwɔ nana mesena le ɖokuinye me be bubu le ŋunye. Fifia, menye dzidzɔme.

“Menye ahanoxe.”​—LUKA ŠUC

ƑE SI ME WODZII: 1975

DUKƆ SI ME WÒTSO: SLOVENIA

AME SI TƆGBI WÒNYE TSÃ: AHA TSU NOLA

AGBE SI MENƆ TSÃ: Wodzim le Ljubljana, si nye Slovenia ƒe fiadua. Menye ɖevi kpɔdzidzɔ va se ɖe esime fofonye wu eɖokui esime mexɔ ƒe ene. Esi afɔku sia dzɔ la, eva hiã be danye nawɔ dɔ sesĩe adi gbe sia gbe bolo na mía kple fonye si hã nye ɖevi sue la.

Esi mexɔ ƒe 15 la, meva nɔ mamanye gbɔ. Egbɔnɔnɔ dze ŋunye, elabena medze xɔlɔ̃ geɖewo le nuto ma me. Ablɔɖe  geɖe wu hã va su asinye. Esi mexɔ ƒe 16 la, meva nɔ ha dem kple ame siwo tsɔ ahanono ɖo dɔe le kwasiɖanuwuwuwo. Mena nye ɖa to legbee, medoa awu abe gbevu ene, eye mede asi atamanono me.

Togbɔ be mezã atike vɔ̃ɖi vovovowo kpɔ hã la, ahanonoe meva tsɔ ɖo dɔe, le esi mesea vivi nɛ wu ta. Teti la, wain kɔŋkɔ ʋɛ aɖewo koe menona, gake kasia, meva noa atukpa ɖeka alo esi wu ema zi ɖeka. Meva bi ɖe ale si maɣla ale si gbegbe memui la ɖe amewoe me. Zi geɖe la, ahaa ƒe ʋeʋẽ le nunye koe amewo tsɔ dea dzesii be meno aha. Ke hã, womenyana kura be meno wain alo biya lita geɖe alo soɖabi gɔ̃ hã o!

Zi geɖe ne mía kple xɔ̃nyewo míeno aha le zãɣeɖuƒewo vɔ la, nyee dea abɔ abɔ me na wo hafi wotea ŋu ɖea zɔ, togbɔ be manya no aha si wono la ƒe teƒe eve hã. Gbe ɖeka mesee xɔ̃nyewo dometɔ ɖeka gblɔ be menye gudugba si gɔme le vo. Enye Sloveniagbe me gbɔɖiamenya si fia be menye ahanoxe, eye wozãnɛ na ame si tea ŋu noa aha wu ame bubuwo. Nya si wògblɔ la vem ŋutɔ.

Meva nɔ ŋugble dem le ale si mele agbea nɔmee ŋu. Mese le ɖokuinye me be viɖe aɖeke mele ŋunye o. Nyemegava nya ta le nye agbe nu o.

ALE SI BIBLIA TRƆ NYE AGBENƆNƆ: Ɣemaɣi la, meva de dzesii be nye sukuxɔmehatiwo dometɔ ɖeka trɔ; eva fa tu wu tsã. Esi medi be manya nu si gbɔ wòtso ta la, mekpee míeyi numeɖenudzraƒe aɖe be míaɖo dze tso eŋu. Egblɔ nam be Yehowa Ðasefowo va le Biblia srɔ̃m kpli ye. Egblɔ nu siwo srɔ̃m wònɔ la dometɔ aɖewo nam. Ke nu mawo katã nye nu yeye nam, elabena nyemexɔ hehe aɖeke le mawusubɔsubɔ me o. Ðasefowo va nɔ Biblia srɔ̃m kple nye hã, eye mete woƒe kpekpeawo dede.

Biblia sɔsrɔ̃ na meva nya nyateƒenya ʋãme wɔdɔɖeamedzi geɖe. Le kpɔɖeŋu me, mesrɔ̃e be míele ɣeyiɣi si Biblia yɔ be “ŋkeke mamlɛawo” la me. (2 Timoteo 3:1-5) Mesrɔ̃e hã be eteƒe madidi o, Mawu aɖe ame vɔ̃ɖiwo ɖa le anyigba dzi, eye wòana mɔnukpɔkpɔ ame nyuiwo be woanɔ agbe tegbee le Paradiso me. (Psalmo 37:29) Medi vevie be manɔ agbe dzadzɛ bene manɔ ame nyui mawo dome.

Meva nɔ Biblia me nyateƒe siwo srɔ̃m menɔ la ŋu nya gblɔm na xɔ̃nyewo. Wo dometɔ geɖe ɖe alɔme le ŋunye ɖe esia ta, gake nu nyuiwo boŋue va do tso eme. Woƒe nuwɔnaa na mekpɔe be menye xɔlɔ̃ vavãwoe wonye o. Meva de dzesii be ame siwo medea ha kplii ƒe ŋusẽkpɔɖeamedzi hã le eme tae menye aha tsu nola ɖo. Le kwasiɖaa me la, ale si kwasiɖaa nawu enu ne woagava mu aha ake ŋu koe woƒe susu nɔna.

Medzudzɔ hadede kple xɔlɔ̃ mawo heva dze xɔlɔ̃ nyuiwo le Yehowa Ðasefowo dome. Wo dome nɔnɔ nye dzideƒotsoƒe gã aɖe nam, elabena wolɔ̃ Mawu tso dzi me, eye wodzea agbagba vevie be yewoanɔ agbe ɖe eƒe nudidiwo nu. Vivivi la, mete ŋu dzudzɔ aha tsu nono.

VIÐE SIWO MEKPƆ: Megahiã be mano aha hafi akpɔ dzidzɔ o, eye medaa akpe na Yehowa ɖe esia ta. Ne ɖe megakpɔtɔ le agbe nɔm abe tsã ene la, anye ne nyemanya afi si manɔ egbea gɔ̃ hã o. Ke meka ɖe edzi be ale si mele agbea nɔm fifia la nyo wu tsã.

Ƒe adree nye esia mɔnukpɔkpɔ su asinye mele dɔ wɔm le Yehowa Ðasefowo ƒe alɔdzedɔwɔƒe si le Slovenia. Esi menya Yehowa heva le esubɔm ta la, viɖe ŋutɔŋutɔ le nye agbe ŋu azɔ.