Abraham—Ame Si Bɔbɔ Eɖokui

Gbe ɖeka Abraham nɔ anyi ɖe eƒe agbadɔ me nɔ ya xɔm le ŋdɔkutsu dzatsɛ. Esi wòfɔ ta dzi la, ekpɔ amedzro etɔ̃ aɖewo ɖaa, siwo gbɔna dua me. * Etso enumake ƒu du yi ɖakpe amedzroawo, eye wòɖe kuku na wo be woava gbɔ ɖe eme vie le ye gbɔ yeawɔ amedzro na wo. Egblɔ be yeatsɔ “abolo vi aɖe” aɖo wo kɔme, gake abolo dzodzoe, notsi kpeke, notsi tsrolo, kple lã si womè wòbi nyuie ye wòtsɔ ɖo kplɔ̃e na wò. Menye amedzrowɔwɔ ɖedzesi aɖe koe Abraham ɖe fia le kplɔ̃ sia ɖoɖo me o, ke abe ale si míava kpɔe ene la, eɖe ɖokuibɔbɔ vavã hã fia.—1 Mose 18:1-8.

NU KAE NYE ÐOKUIBƆBƆ? Ðokuibɔbɔ nye nuwɔwɔ si me dada alo ɖokuidodoɖedzi mele o. Ðokuibɔbɔla lɔ̃na ɖe edzi be ame bubu ɖe sia ɖe le ŋgɔ na ye le nane me. (Filipitɔwo 2:3) Eɖoa to xɔa aɖaŋuɖoɖo eye wòlɔ̃na faa be yeawɔ dɔ tsɛwo na amewo.

ALEKE ABRAHAM ÐE ÐOKUIBƆBƆ FIAE? Abraham tsɔ dzidzɔ subɔ amewo. Abe ale si míegblɔe le nyati sia ƒe gɔmedzedze ene la, esi Abraham kpɔ amedzro etɔ̃awo la, etso enumake be yeakpɔ woƒe hiahiãwo gbɔ na wo. Srɔ̃a Sara wɔ kaba dze nuɖaɖa gɔme. Gake de dzesi ame si nɔ dɔa ƒe akpa gãtɔ wɔm: Abraham ye ƒu du yi ɖakpe amedzroawo, eyae gblɔ be yeadi nane na wo woade nu me, eyae ƒu du yi lãkpɔa me ɖatia nyivi si woawu, eye eya kee ɖo kplɔ̃a ɖe amedzroawo kɔme. Mebia tso eƒe subɔviwo si be woawɔ dɔ siawo katã o, ke boŋ ŋutsu ɖokuibɔbɔla sia ŋutɔe wɔ dɔ tsɛ siawo. Mewɔ nɛ be amewo subɔsubɔ alea aklo bubu le ye ŋu o.

Abraham ɖo to se ame siwo le ete la ƒe aɖaŋuɖoɖowo. Abraham kple Sara dome dzeɖoɖo ɖeka eve aɖewo ko ŋue Biblia ƒo nu tsoe. Ke hã, egblɔe zi eve ya teti be Abraham ɖo to  se Sara ƒe susuwo eye wòwɔ wo dzi. (1 Mose 16:2; 21:8-14) Eƒe susuawo dometɔ ɖeka “medze Abraham ŋu” kura le gɔmedzedzea me o. Gake esi Yehowa kpɔ be nyɔnua ƒe susua nyo la, egblɔ na Abraham be wòaɖo toe, eye wòlɔ̃ faa wɔ ɖe aɖaŋuɖoɖoa dzi ɖokuibɔbɔtɔe.

NU KAE MÍESRƆ̃ TSO EME? Ne míebɔbɔa mía ɖokui vavã la, anye dzidzɔ na mí be míasubɔ ame bubuwo. Nu sia nu si ahe dzidzeme vae na wo le agbe me la wɔwɔ anye dzidzɔ na mí.

Míate ŋu aɖe ɖokuibɔbɔ afia hã le ale si míexɔa amewo ƒe aɖaŋuɖoɖowoe me. Nunya anɔ eme be míalɔ̃ axɔ ame bubuwo ƒe susu ade eme, ke mele be míagbe susu aɖe xɔxɔ le esi menye míawoe doe ɖa o ta o. (Lododowo 15:22) Ame bubuwo ƒe susuwo xɔxɔ alea ɖea vi, vevietɔ na ame siwo le amewo nu. Dɔdzikpɔla bibi aɖe si ŋkɔe nye John gblɔ be: “Meva de dzesii be dzikpɔla nyui ɖea mɔ be ame bubuwo nate ɖe ye ŋu faa agblɔ woƒe susuwo.” Egblɔ yi edzi be: “Ebia ɖokuibɔbɔ vavã be ame nalɔ̃ ɖe edzi be ame si le ye te la ate ŋu anya nane wɔwɔ nyuie wu ye. Kpuie ko la, ame aɖeke meli si agblɔ be ye ɖeka ko sie susu nyuiwo le o—ne amea ɖanye dzikpɔla gɔ̃ hã.”

Ne míesrɔ̃ Abraham ƒe kpɔɖeŋu heɖoa to xɔa amewo ƒe aɖaŋuɖoɖo, eye míewɔa dɔ tsɛwo gɔ̃ hã na wo la, míaƒe nu adze Yehowa ŋu. Nya lae nye be, “Mawu tsia tsitre ɖe ɖokuidoɖedzilawo ŋu, gake evea ɖokuibɔbɔlawo nu.”—1 Petro 5:5.

[Etenuŋɔŋlɔ]