Srɔ̃ Nu Tso Mawu Ƒe Nya La Me

Aleke Nàwɔ Ade Dzesi Tadedeagu Vavãtɔ?

Nyati sia adzro nyabiase siwo nànya bia kpɔ la me, eye afia wò afi si nàkpɔ ŋuɖoɖoawo le le wò Biblia me. Adzɔ dzi na Yehowa Ðasefowo be yewoadzro nyabiase siawo ƒe ŋuɖoɖowo me kpli wò.

1. Subɔsubɔha vavã ɖeka koe lia?

Subɔsubɔha ɖeka, si nye subɔsubɔha vavãtɔ, ko ŋue Yesu fia nu eyomedzelawo tsoe. Ele abe mɔ si kplɔa ame yia agbe mee ene. Yesu gblɔ tso mɔ ma ŋu be: “Ame ʋɛ aɖewo koe nye ame siwo kpɔnɛ.” (Mateo 7:14) Tadedeagu si wotu ɖe Mawu ƒe Nya, si nye nyateƒe, la dzi koe dzea Mawu ŋu. Tadeagula vavãwo katã wɔa nu le ɖekawɔwɔ me le xɔse ɖeka me.—Xlẽ Yohanes 4:23, 24; 14:6; Efesotɔwo 4:4, 5.

2. Nu ka tae subɔsubɔha vovovowo gblɔna be Kristotɔwoe yewonye ɖo?

Aʋatsonyagblɔɖilawo na woƒe alakpanufiafiawo xɔ aƒe ɖe Kristo hamea me le woawo ŋutɔwo ƒe viɖe ta. Abe ale si Yesu gblɔe ɖi ene la, wodzena abe ‘alẽwo’ ene le amewo ŋkume, ke wowɔa nu abe amegãxi dɔwuiwo ene. (Mateo 7:13-15, 21, 23) Le Yesu ƒe apostoloawo ƒe ku megbe koŋue alakpa Kristotɔnyenye do.—Xlẽ Dɔwɔwɔwo 20:29, 30.

3. Nu siwo míatsɔ ade dzesi tadedeagu vavãtɔ dometɔ aɖewo ɖe?

Tadeagula vavãwo dea bubu Biblia ŋu be enye Mawu ƒe Nya. Wodzea agbagba nɔa agbe ɖe mɔfiame siwo le eme la nu. Eya ta subɔsubɔha vavãtɔ le vovo na subɔsubɔha siwo wotu ɖe amegbetɔwo ƒe susuwo dzi. (Mateo 15:7-9) Tadeagula vavãwo meɖea gbeƒã nya aɖe vɔ aganɔ agbe si to vovo nɛ o.—Xlẽ Yohanes 17:17; 2 Timoteo 3:16, 17.

Subɔsubɔ vavãtɔ dea bubu Mawu ƒe ŋkɔ, Yehowa ŋu. Yesu na ame bubuwo nya Mawu ƒe ŋkɔ. Ekpe ɖe amewo ŋu wodze si Mawu, eye wòfia wo be woado gbe ɖa be Mawu ƒe ŋkɔ ŋuti nakɔ. (Mateo 6:9) Subɔsubɔha kae le miaƒe nutoa me si dea dzi ƒo na amewo be woazã Mawu ƒe ŋkɔa?—Xlẽ Yohanes 17:26; Romatɔwo 10:13, 14.

  4. Aleke nàwɔ adze si tadeagula vavãwo?

Kristotɔ vavãwo ɖea gbeƒã Mawu Fiaɖuƒea. Mawu dɔ Yesu ɖa be wòaɖe gbeƒã Fiaɖuƒe ma. Mawu Fiaɖuƒeae nye ameƒomea ƒe mɔkpɔkpɔ ɖeka kolia. Yesu nɔ nu ƒom tso eŋu va de asi na eƒe kugbe. (Luka 4:43; 8:1; 23:42, 43) Egblɔ na eyomedzelawo be woaɖe gbeƒã Mawu Fiaɖuƒea. Ne ame aɖe va gbɔwò be yeaƒo nu tso Mawu Fiaɖuƒea ŋu na wò la, subɔsubɔha ka mee nàsusu be wòtso.—Xlẽ Mateo 10:7; 24:14.

Yesu yome dzelawo menye xexe vɔ̃ɖi sia ƒe akpa aɖeke o. Womekpɔa gome le xexea me ƒe dunyahenyawo kple hadomenyaʋiʋliwo me o. (Yohanes 17:16) Azɔ hã, womesrɔ̃a xexe sia ƒe nɔnɔmewo kple nuwɔna siwo gblẽa nu le ame ŋu la o.—Xlẽ Yakobo 1:27; 4:4.

5. Nu kae nye nu vevitɔ si ɖea dzesi le Kristotɔ vavãwo ŋu?

Lɔlɔ̃ akuakua le Kristotɔ vavãwo si na wo nɔewo. Mawu ƒe Nya la sɔsrɔ̃ wɔe be wodea bubu ame ƒomevi ɖe sia ɖe ŋu. Togbɔ be alakpasubɔsubɔhawo daa megbe na aʋa siwo dukɔwo wɔna hã la, tadeagula vavãwo ya mewɔa esia o. (Mixa 4:1-4) Eye womedia wo ɖokui tɔ o, ke boŋ wozãa woƒe ɣeyiɣi kple nunɔamesiwo tsɔ kpena ɖe amewo ŋu hedea dzi ƒo na wo.—Xlẽ Yohanes 13:34, 35; 1 Yohanes 4:20, 21.

Subɔsubɔha kae tua eƒe nufiafiawo katã ɖe Mawu ƒe Nyaa dzi, eye wòdea bubu Mawu ƒe ŋkɔ ŋu heɖea gbeƒãe be Mawu Fiaɖuƒeae nye ameƒomea ƒe mɔkpɔkpɔ ɖeka kolia? Ha ka me tɔwoe lɔ̃a ame, eye womedaa megbe na aʋawɔwɔ o? Kpeɖodziawo fia be Yehowa Ðasefowoe.—1 Yohanes 3:10-12.

Kpɔ agbalẽ sia, Nuka Tututue Nye Biblia ƒe Nufiafia? si Yehowa Ðasefowo ta la ƒe ta 15 lia be nàsrɔ̃ nu geɖe wu tso nya sia ŋu.

[Nɔnɔmetata si le axa 16]

“Wogblɔna le dutoƒo be yewonya Mawu, gake wotsɔ woƒe dɔwɔwɔwo gbe nu le egbɔ.”—Tito 1:16