Mawu Tsɔ Ðe Le Eme Na Mí​—Nu Si Na Míeka Ðe Edzi

NYA vevi aɖe si amewo biaa wo ɖokuiwo ƒe akpe nanewoe nye esia ye nye: Ne Mawu lɔ̃ mí la, ke nu ka tae fukpekpewo sɔ gbɔ ɖe xexea me alea gbegbe ɖo? Àlɔ̃ ɖe edzi be ne èlɔ̃ ame aɖe la, màdi be amea nakpe fu o, eye ne amea ɖo xaxa me la, àdze agbagba be yeakpe ɖe eŋu godoo. Esi nya sia nye nyateƒe, evɔ fukpekpewo sɔ gbɔ ɖe xexea me alea gbegbe ta la, ame geɖewo susuna be esia fia be Mawu metsɔa ɖeke le eme na mí o. Eya ta hafi míadzro ale si Mawu le fukpekpewo ɖe ge ɖae me la, gbã la, ele vevie be míakpɔ kpeɖodzi siwo ɖee fia be Mawu lɔ̃ mí vavã, alo be etsɔa ɖe le eme na mí.

Nuwɔwɔwo Ðoa Kpe Edzi Be Mawu Lɔ̃ Mí

Yehowa Mawu ye “wɔ dziƒo kple anyigba kple atsiaƒu kple nu siwo katã le wo me.” (Dɔwɔwɔwo 4:24) Ne míede ŋugble tso nu siwo Mawu wɔ ŋu la, míaƒo nya ta godoo be etsɔa ɖe le eme na mí. Le kpɔɖeŋu me, de ŋugble tso nu siwo doa dzidzɔ na wò ŋu kpɔ. Ðe nuɖuɖu viviwo doa dzidzɔ na wòa? Yehowa ate ŋu awɔ nuɖuɖu ɖeka ƒomevi ko be wòalé míaƒe agbe ɖe te hafi. Ke hã, ewɔ nuɖuɖu ƒomevi vovovo siwo xexlẽme meli na o la be míase vivi na wo. Nenema kee Yehowa  wɔ ati kple seƒoƒo nyui ƒomevi vovovowo, kpakple towo kple baliwo hã tsɔ ɖo atsyɔ̃ na anyigba la be agbenɔnɔ navivi eye wòado dzidzɔ na mí.

De ŋugble le ale si wowɔ míi hã ŋu kpɔ. Ŋutete si le mía si be míado nukokoe na ame, be hadzidzi navivi mía nu, eye be míakpɔ ŋudzedze ɖe nu siwo nya kpɔ ŋu la katã mehiã hena agbeléle ɖe te o—wo katã wonye nu siwo Mawu na mí be agbea navivi na mí. Azɔ de ŋugble tso hadede kple amewo hã ŋu kpɔ. Ame kae li si hadede kple xɔlɔ̃ nyuiwo, alo ame aɖe si wòlɔ̃na vevie ƒe asikpakpla kɔ nɛ medoa dzidzɔ na o? Vavãe, ŋutete si le mía si be míalɔ̃ ame la ŋutɔ hã nye nunana tso Mawu lɔ̃ame la gbɔ! Esi wònye be Mawu wɔ amegbetɔwo hede ŋutete wo me be woalɔ̃ ame ta la, ele be nɔnɔme nyui ma nanye Mawu ƒe amenyenye ƒe akpa aɖe.

Biblia Ka Ðe Edzi Na Mí Be Mawu Lɔ̃ Mí

Biblia gblɔ na mí be Mawu nye lɔlɔ̃. (1 Yohanes 4:8) Menye nuwɔwɔwo me koe eƒe lɔlɔ̃ dzena le o, ke míekpɔa kpeɖodzi siwo ɖee fia be elɔ̃ mí la le eƒe Nya, Biblia la, hã me. Le kpɔɖeŋu me, Biblia na mɔfiame geɖewo, siwo naa ame nɔa lãmese nyui me, siwo dea dzi ƒo be woada asɔ le nuwo katã me, eye wòxlɔ̃ nu mí tso aha tsu nono kple nu tsu ɖuɖu hã ŋu.—1 Korintotɔwo 6:9, 10.

Biblia gaɖo aɖaŋu nyuiwo hã tso amegbetɔwo dome ƒomedodowo ŋu hede dzi ƒo na mí be míalɔ̃ mía nɔewo, eye míade bubu kple asixɔxɔ amewo ŋu ahawɔ nu ɖe wo ŋu dɔmenyotɔe. (Mateo 7:12) Eƒo nu tsi tsitre ɖe nuwɔna kple nɔnɔme siwo naa amewo kpea fu, abe ŋukeklẽ, amenyagbɔgblɔ, ŋuʋaʋã, ahasiwɔwɔ kple amewuwu ene ŋu. Ne ame sia ame dzea agbagba nɔa agbe ɖe aɖaŋuɖoɖo nyui siwo le Biblia me nu la, fukpekpewo dzi aɖe akpɔtɔ godoo le xexea me katã.

Gake Mawu ƒe lɔlɔ̃ɖeɖefia gãtɔ kekeake ye nye esi wòtsɔ Via, Yesu, na abe fexexe ɖe ameƒomea ta ene. Yohanes 3:16 gblɔ be: “Mawu lɔ̃ xexea ale gbegbe be wòtsɔ eƒe Tenuvi la na, bene ame sia ame si ɖenɛ fiana be yexɔ edzi se la nagatsrɔ̃ o, ke boŋ wòakpɔ agbe mavɔ.” Esia ɖee fia be Yehowa wɔ ɖoɖo xoxo be yeaɖe ku kple fukpekpe ƒomevi ɖe sia ɖe ɖa tegbee.—1 Yohanes 3:8.

Eme kɔ ƒãa be kpeɖodzi gbogbo aɖewo li be Yehowa lɔ̃ mí. Ekema efia be ne míele fu kpem la, medoa dzidzɔ nɛ o. Ele fukpekpewo ɖe ge ɖa. Mehiã be míasusu nya aɖeke agblɔ le nya sia ŋu o—Biblia la gblɔ ale si tututu Mawu le fukpekpewo ɖe ge ɖae la na mí.

[Nɔnɔmetata si le axa 4]

Ŋutete si le mía si be míalɔ̃ ame la nye nunana tso Mawu lɔ̃ame la gbɔ