BIBLIA gblɔ be: ‘Ame si ke melɔ̃a ame o la, medze si Mawu o; elabena Mawu enye lɔlɔ̃.’ (1 Yohanes 4:8) Eya ta ele be subɔsubɔha nyuitɔ naƒã havilɔlɔ̃ ɖe amewo me.

Subɔsubɔha geɖewo doa vevie nu le kpekpeɖeŋunana dɔnɔwo, ame tsitsiwo, kple ame dahewo me. Wodea dzi ƒo na woƒe hameviwo be woawɔ ɖe apostolo Yohanes ƒe aɖaŋuɖoɖo sia dzi be: ‘Ame si ke xexemenuwo le esi, eye wòkpɔ nɔvia hiã tui, eye wòsẽ dzime ɖee heku ŋɔe la, ekema aleke Mawu ƒe lɔlɔ̃ la nɔa emee mahã? Viwo, migana míatsɔ nya kple aɖe alɔ̃ amee o, ke boŋ míatsɔ  nuwɔwɔ kple nyateƒe alɔ̃ amee.’—1 Yohanes 3:17, 18.

Gake nu kae dzɔna ne dukɔwo kpe aʋa? Ðe wòle be woawɔ ɖe Mawu ƒe sedede si nye, “lɔ̃ hawòvi abe wò ŋutɔ ɖokuiwò ene” la dzi le ŋutifafamenɔɣiwo, evɔ woaŋe aɖaba aƒu edzi ne dukɔ aɖe ho aʋa ɖe bubu ŋua?—Mateo 22:39.

Yesu gblɔ be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.” (Yohanes 13:35) Ne èle biabia siwo gbɔna ŋu ɖom la, bia ɖokuiwò be: ‘Ðe subɔsubɔha sia me nɔlawo ɖea lɔlɔ̃ fiaa ame sia ame ɣeawokatãɣi menye le nya gbɔgblɔ me ko o, ke le nuwɔna me hã?’

NU SI BIBLIA FIA:

Yesu de se na eƒe nusrɔ̃lawo be: ‘Mele egblɔm na mi bena: Milɔ̃ miaƒe ketɔwo; miwɔ nyui na ame siwo léa mi ɖe ke me.’—Mateo 5:44.

Esime asrafowo va Yesu lé ge la, apostolo Petro ɖe yi ɖe go be yeaʋli eta. Gake Yesu gblɔ nɛ be: ‘Gbugbɔ wò yi la ɖo eteƒe; elabena ame siwo katã dia yi la, yi kee woatsɔ awu woe.’—Mateo 26:52.

Apostolo Yohanes ŋlɔ be: ‘Esia me mawuviwo kple abosamviwo dze ƒãa le. Ame sia ame, si mewɔa nu dzɔdzɔe o, kple ame si ke melɔ̃a nɔvia o la, metso Mawu me o. Elabena esiae nye gbedeasi, si miese tso gɔmedzedzea me la, bene míalɔ̃ mía nɔewo; menye abe Kain, si tso vɔ̃ɖitɔ la me, eye wòwu nɔvia la ene o.’—1 Yohanes 3:10-12.

NYABIASE:

Ðe subɔsubɔha sia dea dzi ƒo na eƒe hameviwo be woakpɔ gome le aʋawɔwɔ mea?

NU SI BIBLIA FIA:

Esi amewo kpɔ Yesu ƒe nukunuwɔwɔwo teƒe la, wo dometɔ aɖewo di be yewoana wòakpɔ gome le dunyahehe me. Aleke wòwɔ nui? “Esi Yesu dze sii bena, wole vava ge, eye woalé ye sesẽ aɖo fiae la, eɖe eɖokui ɖe aga yi ɖe to la dzi.”—Yohanes 6:15.

Esi wolé Yesu hetsɔ nya ɖe eŋu alakpatɔe be ele zi dem amewo me be woatsi tsitre ɖe dziɖuɖua ŋu la, egblɔ be: ‘Nye fiaɖuƒe metso xexe sia me o; nye fiaɖuƒe, ɖe wòtso xexe sia me la, ne nye dɔlawo aʋli tanye, bena womagadem asi na Yudatɔwo o; ke azɔ la nye fiaɖuƒe metso afi sia o.’—Yohanes 18:36.

Esi Yesu nɔ gbe dom ɖa na Mawu tso eƒe nusrɔ̃lawo ŋu la, egblɔ be: ‘Nye la metsɔ wò nya la na wo, eye xexea me lé fu wo, elabena wometso xexea me o, abe ale si nye hã nyemetso xexea me o ene.’—Yohanes 17:14.

 NYABIASE:

Ðe subɔsubɔha sia dzea Yesu ƒe kpɔɖeŋu yome hegbea eɖokui ƒoƒo ɖe dunyahehe me, nenye be ema ana dunyahela aɖewo nalé fu wo gɔ̃ hã?

NU SI BIBLIA FIA:

Esi aʋamatsomatsotɔ gbãtɔ siwo menye Yudatɔwo o va zu Kristotɔwo megbe la, apostolo Petro gblɔ be: ‘Mawu mekpɔa ame ŋku me o, hafi boŋ le dukɔ sia dukɔ me, ame si ke vɔ̃nɛ, eye wòwɔa nu dzɔdzɔe la, eya dzea eŋu.’—Dɔwɔwɔwo 10:34, 35.

Yakobo ŋlɔ na ƒe alafa gbãtɔ me Kristotɔwo be: ‘Nɔvinyewo, migatsɔ ame ŋkumekpɔkpɔ lé Yesu Kristo, mía Aƒetɔ, si nye ŋutikɔkɔe ƒe Aƒetɔ la, ƒe dzixɔse me ɖe asi o. Elabena ne ŋutsu aɖe de sikasigɛ asi, eye wòdo awu nyui heva yi ɖe miaƒe ƒuƒoƒe, eye ame dahe aɖe hã do awu ƒoɖi va eme, eye mielé ŋku ɖe ame si do awu nyui la ŋu, eye miegblɔ bena: Wò la, bɔbɔ nɔ teƒe nyui sia, eye miegblɔ na ame dahe la bena: Wò la tsi tre ɖe afi ma alo bɔbɔ nɔ afii le nye afɔɖodzinu te la, ɖe miede vovo amewo dome le mia ɖokui me, eye miezu tamesusu vɔ̃wo ʋɔnudrɔ̃lawo o mahã?’—Yakobo 2:1-4.

NYABIASE:

Ðe subɔsubɔha sia fiaa nu be Mawu bua amewo katã sɔsɔe, eye be mele be hameviwo nade vovototo amewo me le ŋutigbalẽ ƒe amadede loo alo woƒe kesinɔtɔnyenye alo ahedada ta oa?