Srɔ̃ Woƒe Xɔse

Ewɔ Nu Le Aɖaŋudzedze Me

ABIGAIL kpɔ ale si gbegbe ŋɔdzi lé ɖekakpuiae la dze sii. Vɔvɔ̃ ɖo ɖekakpuia ŋutɔ—eye esɔ be vɔvɔ̃ naɖoe. Afɔku dziŋɔ aɖe lili wo. Le ɣeyiɣi ma tututu me la, aʋakalẽtɔ 400 nɔ mɔ dzi gbɔna heɖoe kplikpaa be yewoawu ŋutsu ɖe sia ɖe le Abigail srɔ̃ Nabal ƒe aƒe me. Nu ka tae?

Nabal ƒe nuwɔnae na woɖo xaxa me. Ewɔ ŋutasẽnu aɖe vevemaseɖeamenutɔe, abe ale si ko wòwɔnɛ ɖaa ene. Gake fifia ya la, menye ame si ŋu wòawɔ nu sia ɖo la ŋue wòwɔe ɖo o—aʋawɔla wɔnuteƒe siwo xɔ hehe nyuie la ƒe aʋafia malɔ̃nugbɔa ŋue wòwɔe ɖo. Eya ta Nabal ƒe dɔwɔlawo dometɔ ɖeka, si ɖewohĩ anya nye eƒe alẽkplɔvi la, si du va Abigail gbɔ heka ɖe edzi be ato aɖaŋu aɖe dzi akpɔ yewo ta. Gake ɖe nyɔnu ɖeka ate ŋu akpe aʋakɔ blibo dzia?

Gbã la, mina míaƒo nu tso nyɔnu dzeaɖaŋu sia ŋu vie. Ame kae nye Abigail? Aleke wòdzɔe be afɔku sia do mo ɖa? Eye nu kae míate ŋu asrɔ̃ tso xɔse si nɔ esi la me?

‘Eƒe Tagbɔ Kɔ, Eye Wòdze Tugbe’

Abigail kple Nabal mesɔ na wo nɔewo kura o. Asesẽ ŋutɔ be Nabal nakpɔ nyɔnu nyui aɖe de Abigail nu, evɔ Abigail ya va kpɔe be ŋutsu si yeɖe la vloe wu ɖe sia ɖe si yekpɔ kpɔ. Ke hã, alɔme nɔ ŋutsua si ŋutɔ. Eya ta ebua eɖokui ameŋkutae. Gake alekee ame bubuwo bunɛ? Le nyateƒe me la, womeƒo nu gbegblẽ tso Bibliameme aɖeke ŋu de Nabal nu o. Eƒe ŋkɔa gɔ̃ hã gɔmee nye “Movitɔ,” alo “Bometsila.” Míenya ne edzilawoe tsɔ ŋkɔ ma nɛ le edziɣi loo, alo megbeŋkɔe wònye amewo va tsɔ nɛ le eƒe nuwɔnawo ta o. Aleke kee wòɖale o, ɖeko ŋkɔa sɔ kpli ta. Nabal ‘nye ŋlɔmitɔ, eye wòvɔ̃ɖi.’ Enye ŋutasẽla kple ahanoxe, eye amewo katã kloe vɔ̃na nɛ eye wolé fui.—1 Samuel 25:2, 3, 17, 21, 25.

Gake Abigail ya to vovo kura. Eƒe ŋkɔa gɔmee nye “Fofonye Do Dzidzɔ Na Eɖokui.” Enyea dzidzɔ na vifofo geɖe ne wodzi nyɔnuvi dzetugbe aɖe, gake vifofo nyanu kpɔa dzidzɔ geɖe wu ne ekpɔe be nɔnɔme nyuiwo le ye vi si. Zi geɖe la, ame si nya kpɔ ŋutɔ le gotagome la mete ŋu tua nɔnɔme nyuiwo abe aɖaŋudzedze, nunya, dzideƒo, alo xɔse ene ɖo o. Gake mele nenema le Abigail ya gome o. Biblia gblɔ be eƒe “tagbɔ kɔ, eye wòdze tugbe.”—1 Samuel 25:3.

Ame aɖewo abia egbea be nu ka tae nyɔnu nyanu ma va ɖe ŋutsu yakame ma gbegbe ɖo hã. Ðo ŋku edzi be dzilawoe wɔa ɖoɖo ɖe srɔ̃ɖeɖe geɖe ŋu le Biblia ŋlɔɣiwo. Ne mele nenema o hã la, dzilawo kpɔa ŋusẽ gã aɖe ɖe ame si wo vi aɖe la tiatia dzi. Ðe wòanye be Abigail dzilawo da asi ɖe srɔ̃ɖeɖe sia dzi, alo be woawoe tia Nabal nɛ gɔ̃ hã le eƒe kesinɔnuwo kple ŋkɔxɔxɔ ta? Ðe wòanye be ahedada kolikoli ƒoe ɖe wo nu be woadi nu sia tɔgbia? Aleke kee wòɖale o, Nabal ƒe kesinɔtɔnyenye mena wònye srɔ̃ŋutsu nyui o.

Dzila nyanuwo tsɔa moveviɖoɖo fiaa nu wo viwo tso nukpɔsusu nyui ƒe amesinɔnɔ le srɔ̃ɖeɖe ŋu ŋuti. Womeƒonɛ ɖe wo viwo nu be woaɖe gatɔ alo be woate gbeɖoɖoɖi esi wometsi atsɔ srɔ̃ɖeɖemegbanɔamedziwo o. (1 Korintotɔwo 7:36) Ke hã, mɔnukpɔkpɔ mesu  Abigail si wòbu nu siawo ŋu o. Nu kae dzɔ o, nu kae meɖadzɔ o, eɖe Nabal xoxo, eye wòɖoe kplikpaa be yeawɔ yetɔ sinua le nɔnɔme sesẽ si me wòge ɖo la me.

“Eda Gbe Ðe Wo Gbɔ”

Fifia Nabal na Abigail gaxaxa wu tsã. Menye ame bubu aɖekee wòdzu tsɔ wu David o. David nye Yehowa subɔla wɔnuteƒe si nyagblɔɖila Samuel si ami na wònye kpeɖodzi be Mawu tiae be wòava ɖu fia ɖe Saul teƒe. (1 Samuel 16:1, 2, 11-13) David si nɔ sisim le Fia Saul si nɔ ŋu ʋãmee hedi be yeawui nu la va tsi gbedadaƒo kple eƒe aʋawɔla wɔnuteƒe 600-awo.

Du si nye Maon mee Nabal nɔ, gake ewɔa dɔ le afi si gogo Karmel, * eye edze abe anyigba aɖe nɔ esi le afi ma ene. Du mawo le tonuto siwo me gbe damawo bɔ ɖo la me, si na wòde alẽkplɔlawo dzi, eye Nabal nye wo dometɔ ɖeka si si alẽ 3,000 nɔ. Gake avenutowo sɔŋ ye ƒo xlã teƒe mawo. Paran-gbedzi xɔ anyiehe gome keŋ. Nuto ɖiaƒedo si yɔ fũu kple bali kple agadowo la hã xɔ ɣedzeƒe gome ɖo ta Dzeƒua gbɔ lɔƒo. Nuto mawo mee David kple eŋumeawo va tsi henɔ vutri gbam be yewoakpɔ yewoƒe agbe ta, eye ɖikeke mele eme o be wonɔ nɔnɔme sesẽ geɖewo me tom henɔa agbe ɖe adedada ko nu. Wodoa go lãkplɔvi siwo nɔ kesinɔtɔ Nabal ƒe alẽwo kplɔm la enuenu.

Alekee asrafo veviedonula siawo wɔ nu ɖe alẽawo ŋu? Woate ŋu anɔ alẽawo dometɔ aɖewo lém edziedzi hena woƒe nuɖuɖu, gake womewɔ naneke nenema o. Ke boŋ wonɔ abe gli sesẽ aɖe ene nɔ Nabal ƒe alẽhawo kple dɔlawo ŋu godoo. (1 Samuel 25:15, 16) Afɔku geɖe dzea ŋgɔ alẽwo kple alẽkplɔlawo. Lãlénuwo bɔ ɣemaɣi ŋutɔ. Eye Israel ƒe anyiehe gome liƒoa hã gogo afi ma, si wɔe be dukɔ bubu me tɔwo ƒe adzohawo kple fiafiwo va dzea ame dzi enuenu. *

Menɔ bɔbɔe na David be wòanɔ nuɖuɖu kpɔm na eŋume mawo katã le gbedadaƒo afi ma o. Eya ta gbe ɖeka la, David dɔ ame ewo aɖewo be woaɖabia kpekpeɖeŋu tso Nabal gbɔ. David tia ɣeyiɣia nunyatɔe. Enye fukoko na alẽwo ƒe ɣeyiɣi si me dɔmenyowɔwɔ kple azãɖuɖu yia edzi le zi geɖe. Nya siwo David de asi na eƒe amedɔdɔawo la nye nya dzeto siwo ɖe bubudeameŋu fia. Eyɔ eɖokui gɔ̃ hã be ‘viwò David’ bubudeameŋutɔe, ɖewohĩ le esi Nabal tsi wui ta. Aleke Nabal wɔ nui?—1 Samuel 25:5-8.

Edo dziku vevie! Esi ɖekakpui si ŋu míeƒo nu tso le nyati sia ƒe gɔmedzedze la nɔ ale si Nabal wɔ nui bɔm na Abigail la, egblɔ be, “eda gbe ɖe wo gbɔ.” Nabal si ƒe asi me sẽ ŋutɔ la do ɣli heto nyatoƒoe le eƒe abolo, tsi, kple lã siwo gbɔ melɔ̃a nu le o ŋu. Eɖu fewu le David ŋu be enye yakame, eye wòtsɔe sɔ kple subɔvi si si dzo le eƒe aƒetɔ gbɔ. Nabal ƒe nukpɔsusu anya sɔ kple Saul si lé fu David kaɖikaɖi la tɔ. Wo ame evea siaa ƒe nukpɔsusu mewɔ ɖeka kple Yehowa tɔ o. Mawu lɔ̃ David hebui be enye fia si ava ɖu Israel dzi,  ke menye abe subɔvi dzeaglã aɖe ene o.—1 Samuel 25:10, 11, 14.

Esi David ƒe amedɔdɔawo trɔ gbɔ va gblɔ nu si dzɔ nɛ la, edo dɔmedzoe vevie. Eɖe gbe na wo be: ‘Mia dome ame sia me neta yi!’ David ŋutɔ bla akpa hekplɔ eŋume 400 wodze mɔ yina nu tu ge kple Nabal. Eka atam be yeabu mo na Nabal kple eƒe aƒemetɔwo katã. (1 Samuel 25:12, 13, 21, 22) Esɔ be David nado dziku ya, gake mɔ si nu wòdi be yeaɖe dzikua afia le lae menyo o. Biblia gblɔ be: “Ame ƒe dɔmedzoe menana wòwɔa nu dzɔdzɔe abe ale si Mawu di ene o.” (Yakobo 1:20) Ke aleke Abigail awɔ akpɔ eƒe aƒemetɔwo ta?

“Woakafu Wò Nunya”

Le mɔ aɖe nu la, Abigail ɖe afɔ gbãtɔ si awɔ akpa aɖe le nyaa gbɔ kpɔkpɔ me la xoxo. To vovo na srɔ̃a Nabal la, ele klalo be yeaɖo to. Ðekakpuia gblɔ tso Nabal ŋu be: “Ame vɔ̃ɖi wònye, eye ame aɖeke mekpɔ mɔ aƒo nu ɖe egbɔ o.” * (1 Samuel 25:17) Nublanuitɔe la, ale si Nabal bua eɖokui ame vevii la wɔe be meɖoa to ame aɖeke o. Ame geɖe ɖea dadagbɔgbɔ ma fiana egbea. Gake ɖekakpuia nya be Abigail ya mele nenema o, esia tae wòte ɖe eŋu heɖe nyawo dzi nɛ ɖo.

Abigail bu tame hewɔ nu kpata. Míexlẽ be: “Tete Abigail wɔ kaba.” Zi gbɔ zi ene sɔŋ wogblɔ tso nyɔnu sia ŋu le nudzɔdzɔ sia me be ‘ewɔ kaba.’ Eƒo nunana nyuiwo nu ƒu na David kple eƒe ameawo. Abolo, wain, alẽ, blitɔtɔe, waintsetse ƒuƒu bolo, kple gbotsetsebolo hã nɔ nu siawo dome. Edze ƒãa be Abigail nya ale si wòadzra nu nyuiwo ɖo ɖi, eye wòléa fɔ ɖe aƒemedɔ ŋu wɔna abe nyɔnu zazɛ̃ si ŋu wova ƒo nu tso emegbe le Lododowo ƒe agbalẽa me ene. (Lododowo 31:10-31) Etsɔ nunanawo na eƒe dɔlawo be woatsɔ anɔ yiyim, emegbe eya ŋutɔ ɖeɖe va dze wo yome. Nuŋlɔɖia gblɔ be: “Ke megblɔ nya aɖeke na [srɔ̃a] Nabal o.”—1 Samuel 25:18, 19.

Ðe esia fia be Abigail mede bubu srɔ̃a ƒe tanyenye ŋu oa? Kura o. Nabal wɔ nu vɔ̃ɖi ɖe Yehowa ƒe amesiamina ŋu, si nye nuwɔna si ate ŋu ana woawu Nabal kple eƒe aƒemetɔ siwo meɖi fɔ aɖeke o la katã. Ne ɖe Abigail meɖe afɔ aɖeke o la, ɖe mafia be eya hã kpɔ gome le srɔ̃a ƒe nu vɔ̃a me oa? Aleke kee wòɖale o, ele be ɖokuibɔbɔ ɖe Mawu te nanɔ vevie nɛ wu eɖokui bɔbɔ ɖe srɔ̃a te.

Eteƒe medidi o, Abigail va do go David kple eŋumeawo. Le afi sia hã la, ewɔ kaba ɖi le eƒe tedzia dzi hebɔbɔ ɖe David ƒe afɔ nu. (1 Samuel 25:20, 23) Azɔ eƒo nu legbe aɖe tsɔ ɖe eƒe dzimenyawo gblɔ heɖe kuku vevie be wòakpɔ nublanui na ye srɔ̃ kple yeƒe aƒemetɔwo. Nu kae na eƒe nyawo wɔ dɔ nyuie?

Exɔ fɔbubua ɖo eɖokui dzi eye wòbia tso David si be wòatsɔe ake ye. Elɔ̃ ɖe edzi nyateƒetɔe be ye srɔ̃ nye yakame abe ale si ko eƒe ŋkɔa fia ene, eye wòɖee fia David be anye bubukoklo ɖa le eɖokui ŋu ne etu nu kple ŋutsu yakame ma. Eɖe ale si wòka ɖe edzi be David nye Yehowa teƒenɔla la gblɔ helɔ̃ ɖe edzi be “Yehowa ƒe aʋawo” wɔm wònɔ. Eɖee fia hã be yenya nu tso ŋugbe si Yehowa do ku ɖe David kple fianyenyea ŋu la ŋu, elabena egblɔ be: ‘Yehowa atsɔ wò aɖo amegã ɖe Israel nu.’ Gakpe ɖe eŋu la, exlɔ̃ nu David be wòagaɖe  afɔ aɖeke si ahe ʋufɔɖiɖi ava edzi alo si azu ‘nu si anɔ mɔ me nɛ,’ si fia ale si eƒe dzitsinya ava nɔ fu ɖem nɛ la o. (1 Samuel 25:24-31) Nya dzeto dedzigbɔname kawo gbegbee nye esi!

Aleke David wɔ nui? Exɔ Abigail ƒe nunanaawo hegblɔ be: ‘Woakafu Yehowa, Israel ƒe Mawu, ame si dɔ wò ɖa nèva kpem egbe! Woakafu wò nunya, eye woakafu wò, ame si xe mɔ nam egbe be, nyemagaɖe hlɔ̃fe o.’ David kafui ɖe ale si dzi nɔ eƒo wòɖe abla va kpe ye la ta, eye wòlɔ̃ ɖe edzi be exe mɔ na ye yemeɖi ʋufɔ o. Egblɔ nɛ be, “Yi aƒe le ŋutifafa me” hegblɔ kpee ɖokuibɔbɔtɔe be: “Mese wò gbe.”—1 Samuel 25:32-35.

“Kpɔ Ða, Wò Dɔlanyɔnu” Enye Esi

Esi Abigail trɔ dzo le David gbɔ la, mado kpo ŋugbledede tso woƒe gododoa ŋu o, eye anɔ eme godoo be ekpɔ vovototo gã si le nuteƒewɔla dɔmenyotɔ David kpakple ŋutsu ŋutasẽla si nye srɔ̃a dome la dze sii ƒãa. Gake mena nu mawo xɔ susu me nɛ o. Nuŋlɔɖia gblɔ be: “[Emegbe] Abigail va Nabal gbɔ.” Ɛ̃, etrɔ gbɔ va srɔ̃a gbɔ heɖoe kplikpaa be yeayi edzi awɔ ye tɔ sinua abe ale si ko yewɔnɛ tsã ene. Enɔ nɛ be wòagblɔ nunana siwo wòtsɔ yi na David kple eŋumewo la ŋu nya nɛ. Edze be wòasee. Ehiã hã be Abigail nagblɔ afɔku gã si dzɔ ɖe wo dzi kloe la ŋu nya nɛ hafi wòava see le ame bubuwo nu—si ana ŋu nagakpee ɖe edzi wu. Gake mate ŋu agblɔe nɛ enumake o. Enɔ aglo tum abe fia ene hemu aha vlevlevle wu gbɔgblɔ.—1 Samuel 25:36.

Abigail gaɖe dzideƒo kple aɖaŋudzedze fia helala va se ɖe esime ŋu ke eye aha la kɔ le mo nɛ. Eɖo eɖokui me ate ŋu ase Abigail ƒe nyawo gɔme nyuie, gake esia ate ŋu ana wòado dziku vevie hã. Ke hã Abigail te ɖe eŋu hegblɔ nu siwo katã dzɔ la nɛ. Ðikeke mele eme o be Abigail nɔ mɔ kpɔm be ado dɔmedzoe vevie, ɖewohĩ be awɔ nu adãtɔe gɔ̃ hã. Gake nukutɔe la, ɖeko wònɔ anyi ɖi maʋamaʋãe.—1 Samuel 25:37.

Nu kae dzɔ ɖe ŋutsu sia dzi? “Dzi fa ɖe dɔ me nɛ, eye eyama zu kpe ɖi.” Edze abe gbagbadɔ aɖee dze edzi ene. Gake eku le ŋkeke ewo megbe, eye edze ƒãa be menye dɔléle tae o. “Yehowa ƒe [asie] va Nabal dzi, eye wòku.” (1 Samuel 25:38) Ʋɔnu dzɔdzɔe sia si wodrɔ̃e la he Abigail ƒe srɔ̃ɖeɖe sia si zu ta-yi-glã-xaxa ƒe nya la va nuwuwu mlɔeba. Togbɔ be Yehowa megadea nu nyawo me nukutɔe alea egbea o hã la, esia nye kpɔɖeŋu gbagbe aɖe si ɖee fia be ŋlɔmiwɔwɔ alo ŋutasesẽ le ame ƒe ƒometɔwo ŋu aɖeke mele ɣaɣla ɖe Yehowa o. Adrɔ̃ ʋɔnu dzɔdzɔe le eya ŋutɔ ƒe ɣeyiɣi ɖoɖi dzi godoo.

Hekpe ɖe Abigail ƒe gbɔdzɔekpɔkpɔ tso srɔ̃ɖeɖe manyatalenu sia me ŋu la, yayra bubu nɔ elalam. Esi David se Nabal ƒe kua ŋu nya la, edɔ ame ɖe Abigail be woaƒo nu kpli be wòava zu ye srɔ̃. Abigail ɖo eŋu be: “Kpɔ ɖa, wò dɔlanyɔnu [enye esi, be wòaklɔ] eƒe aƒetɔ ƒe dɔlawo ƒe afɔ ŋu abe kosi ene.” Edze ƒãa be mɔnukpɔkpɔ si su Abigail si be wòazu David srɔ̃ la mena wòva zu dadala o; egblɔ be yeanye subɔvi na eƒe subɔviwo gɔ̃ hã! Le afi sia hã la, Abigail gawɔ kaba hedzra eɖokui ɖo be yeayi ɖe David gbɔ.—1 Samuel 25:39-42.

Esia mefia be kuxi aɖeke kura manɔ David kple Abigail ƒe srɔ̃ɖeɖea me o. David ɖe Axinoam xoxo, eye nyɔnu geɖewo ƒe atsuƒenɔnɔ le ŋutsu ɖeka gbɔ nyea kuxi na nyɔnu nuteƒewɔlawo ɣemaɣi. * Azɔ hã, David mezu fia haɖe o; adze ŋgɔ mɔxenu geɖewo eye wòato nɔnɔme sesẽwo me hafi ava subɔ Yehowa le mɔ ma nu. Ke hã, esi Abigail kpe ɖe David ŋu le nɔnɔme siawo katã me, eye wòva dzi ŋutsuvi ɖeka nɛ mlɔeba la, ede dzesii be ŋutsu si yeɖe la dea asixɔxɔ ye ŋu eye wòkpɔa ye ta. Ɣeaɖeɣi la, eyi ɖaxɔe tso adzohawo si me gɔ̃ hã. (1 Samuel 30:1-19) Eya ta David to esia wɔwɔ me srɔ̃ Yehowa Mawu, ame si lɔ̃a nyɔnu nuteƒewɔla dzinɔameƒotɔ dzeaɖaŋu siawo tɔgbi hedea asixɔxɔ wo ŋu.

[Etenuŋɔŋlɔwo]

[Nɔnɔmetata si le axa 19]

Abigail nye toɖola nyui, menɔ abe srɔ̃a ene o

[Nɔnɔmetata si le axa 20]

Abigail ɖe ɖokuibɔbɔ, dzinɔameƒo, kple aɖaŋudzedze fia le nuƒoƒo na David me